ក្រុងឡុងដ៍៖ លោក Jurgen Klopp គ្រូបង្វឹកក្លិបហង្សក្រហម Liverpool បានរំឭកក្រុមរបស់គាត់ថា ការរក្សាតំណែងជើងឯក Champions League គឺកាន់តែលំបាកជាងការប្រកួតបានជ័យជម្នះដ៏អស្ចារ្យក្នុងទីក្រុង Madrid ប្រទេស អេស្ប៉ាញ កាលពីរដូវកាលមុនទៅទៀត។
ក្រុមរបស់លោក Klopp បានចាប់ផ្ដើមកិច្ចប្រឹងប្រែងឈ្នះពានរង្វាន់អឺរ៉ុបជាលើកទី ៧ ដោយត្រូវធ្វើដំណើរទៅកាន់ទឹកដីរបស់ក្រុម Napoli សម្រាប់ការប្រកួតបើកឆាកនៃពូល E នៅយប់ថ្ងៃអង្គារនេះ។
ក្រុមហង្សក្រហមបានឡើងដល់វគ្គផ្ដាច់ព្រ័ត្រក្របខ័ណ្ឌ Champions League ចំនួន ២ លើកចុងក្រោយ ដោយបានឈ្នះក្រុម Tottenham ក្នុងទីក្រុងរបស់ប្រទេស អេស្ប៉ាញ កាលពីខែមិថុនា ក្រោយពីបានចាញ់ក្រុម Real Madrid កាលពីរយៈពេល ១២ ខែមុន។
ប៉ុន្តែលោក Klopp ជឿថា ក្រុម Liverpool កំពុងប្រឈមនឹងភារកិច្ចដ៏លំបាកមួយក្នុងការឡើងដល់វគ្គផ្ដាច់ព្រ័ត្រនៅក្នុងកីឡដ្ឋាន Ataturk ក្នុងទីក្រុងអ៊ីស្តង់ប៊ុល ប្រទេស តួកគី ជាកន្លែងមួយដែលក្លិបនេះធ្លាប់ទទួលបានការអបអរយ៉ាងខ្លាំង នៅពេលពួកគេបានឈ្នះ Champions League ២០០៥ ទៅលើក្រុម AC Milan នៅកីឡដ្ឋានដដែលនេះ។
មុនពេលក្លិប Liverpool អាចសុបិនយកគំរូតាមអ្នកគ្រប់គ្រងលោក Steven Gerrard និងពានរង្វាន់របស់ក្រុមនេះ លោក Klopp ដឹងថា ពួកគេនឹងត្រូវបង្កើតទំនាក់ទំនងឲ្យបានច្រើនចំពោះអ្វីដែលគាត់រំពឹងថា នឹងមានការប្រកួតប្រជែងយ៉ាងខ្លាំងក្នុងព្រឹត្តិការណ៍នេះ។
ក្លិប Napoli ត្រូវគេរំពឹងថា នឹងធ្វើការសាកល្បងឲ្យខ្លាំងបំផុតចំពោះក្លិប Liverpool នៅក្នុងពូលដែលរួមបញ្ចូលទាំងក្លិប Salzburg និងក្លិប Genk ដែរនោះ។
ក្រុមរបស់លោក Carlo Ancelotti គ្រូបង្វឹកក្លិប Napoli ជិតនឹងបានបញ្ចប់យុទ្ធនាការពានរង្វាន់អឺរ៉ុបរបស់ក្លិប Liverpool ក្នុងដំណាក់កាលប្រកួតក្នុងពូលកាលពីរដូវកាលមុនទៅហើយ ប៉ុន្តែអ្នកចាំទី Alisson Becker បានសង្គ្រោះយ៉ាងល្អនូវគ្រាប់បាល់ដែលស៊ុតដោយកីឡាករ Arkadiusz Milik ដើម្បីរក្សាការឈ្នះ ១-០ នៅកីឡដ្ឋាន Anfield ធ្វើឲ្យក្រុមហង្សក្រហមឡើងទៅវគ្គ ១៦ ក្រុមចុងក្រោយ កាលពីរដូវកាលមុន។
បើទោះជាក្រុមហង្សក្រហមគួរតែបង្កើនល្បឿនសម្រាប់ការប្រកួតជម្រុះក្នុងពូលដោយគ្មានការរំភើបចិត្តខ្លាំងនៅរដូវកាលនេះក៏ពិតមែន ប៉ុន្តែលោក Klopp នៅតែព្រួយបារម្ភចំពោះការប្រកួតក្នុងពូលនេះដដែល។
លោក Klopp បាននិយាយនៅពេលលទ្ធផលស្មើគ្នាកាលពីខែសីហាថា៖ «ខ្ញុំនឹងគ្មានបញ្ហាជាមួយការឡើងដល់វគ្គផ្ដាច់ព្រ័ត្រនេះទេប្រសិនបើវាកើតឡើងម្ដងទៀតនោះ ប៉ុន្តែពេលនេះ ខ្ញុំមិនទាន់ច្បាស់ពេកទេថា តើយើងអាចទៅរួចឬយ៉ាងណានោះទេ»។
គ្រូបង្វឹករូបនេះបានបន្ថែមទៀតថា៖ «យើងមានឱកាសដូចអ្នកផ្សេងអ៊ីចឹងដែរ ព្រោះខ្ញុំមិនបានឃើញក្រុមអង់គ្លេសមានឥទ្ធិពលជាងគេរហូតនោះទេ ហើយខ្ញុំពិតជាគិតថា ក្រុមជាច្រើនមានឱកាសល្អដូចគ្មា»។
គ្រូបង្វឹកសញ្ជាតិអាល្លឺម៉ង់រូបនេះបានបន្តថា៖ «ចូរសម្លឹងមើលក្រុម Borussia Dortmund ហើយប្រាប់ខ្ញុំថា តើយើងខ្លាំងជាងពួកគេ ឬយ៉ាង ណា? វាអស្ចារ្យណាស់ព្រោះពួកគេអាចផ្លាស់ប្ដូរ ៥ លើក ហើយនៅមានក្រុមល្អៗជាច្រើនទៀត»។
លោក Klopp បានបញ្ជាក់ថា៖ «ក្លិប Juventus ក៏នឹងនៅទីនោះ ហើយក្លិប PSG និងក្លិប Real Madrid ក៏នៅទីនោះដែរ។ តើអ្នកគិតថា ក្លិបទាំងនេះបានបោះបង់កាប្រកួតហើយឬ? ហើយឥឡូវ ក្រុម Bayern Munich បាននាំយកកីឡាករ Perisic និង Coutinho ដើម្បីជួយបង្កើនកម្លាំងរបស់ពួកគេផងដែរ ដូច្នេះហើយយើងមិនគួរភ្លេចខ្លួនក្នុងជ័យជម្នះបន្តបន្ទាប់នោះទេ៕ AFP/SN