ក្រុងវ៉តហ្វតៈ ខ្សែប្រយុទ្ធ Shane Long របស់ក្រុម Southampton បានជាប់កំណត់ត្រាជាអ្នកស៊ុតបាល់បញ្ចូលទីលឿនជាងគេបំផុតក្នុងការប្រកួតក្របខ័ណ្ឌ Premier league បន្ទាប់ពីរូបគេបានស៊ុតបំប៉ោងសំណាញ់ទីរបស់ក្រុម Watford នៅត្រឹមតែ ៧.៦៩ វិនាទីកាលពីថ្ងៃអង្គារមុនពេល Andre Gray វាយបកតាមស្មើឲ្យ Watford វិញនៅនាទីទី ៩០។
ការស៊ុតបាល់បញ្ចូលទីបំបែកឯតទគ្គកម្មថ្មីរបស់កីឡាករ Long នេះបានកើតឡើងភ្លាមៗ បន្ទាប់ពីការកែបាល់ដោយរូបគេបានរត់ទៅពាំងបាល់ដែលទាត់ចេញពីជើងខ្សែការពារ Craig Cathcart របស់ក្រុម Watford ហើយខ្សែប្រយុទ្ធសញ្ជាតិអៀរឡង់រូបនេះបានស្ទុះទៅយកបាល់នោះ រួចបានឆ្កឹះបាល់ផ្លោងពីលើក្បាលអ្នកចាំទី Ben Foster ដើម្បីបញ្ចូលទីយ៉ាងល្អបំផុត។
ការស៊ុតបាល់បញ្ចូលទីរបស់កីឡាករវ័យ ៣២ ឆ្នាំរូបនេះបានជាប់កំណត់ត្រាជាអ្នកបញ្ចូលទីលឿនជាងគេបំផុតសម្រាប់ក្របខ័ណ្ឌ Premier League គឺលឿនជាងខ្សែការពារ Ledley King របស់ក្រុម Tottenham ដែលបានស៊ុតបញ្ចូលទី ត្រឹម ៩.៩ វិនាទីនៅពេលប្រកួតជាមួយក្រុម Bradford កាលពីខែធ្នូ ឆ្នាំ ២០០០ ។
ខ្សែប្រយុទ្ធ Long បានប្រាប់ប្រព័ន្ធផ្សព្វផ្សាយ Sky Sport News ដោយទឹកមុខស្រស់ស្រាយក្រោយការប្រកួតនេះថា៖ «វាជាការបំបែកឯតទគ្គកម្មមួយ មែនទេ?។ នៅពេលចាប់ផ្ដើមការប្រកួតភ្លាម យើងតែងតែធ្វើបែបនេះដើម្បីដាក់សម្ពាធលើគូប្រកួត ហើយនេះជាលើកទី ៩៩ ហើយក្នុងចំណោម ១០០ លើកដែលយើងធ្វើមិនបានសម្រេច ប៉ុន្តែពេលនេះវាជោគជ័យហើយ»។
ការស៊ុតបញ្ចូលទីជាប្រវត្តិសាស្ត្ររបស់ Long ដែលជាការរកគ្រាប់បាល់ទី ៤ របស់គេនៅរដូវកាលនេះ មិនមានន័យថាទទួលបានជោគជ័យនៅកីឡដ្ឋាន Vicarage Road នោះទេ ក្រោយពីកីឡាករ Gray បានជួយឲ្យក្រុម Watford តាមស្មើគ្នា ១-១ វិញនោះ។
កីឡាករ Long បានបន្ថែមថា៖ «វាប្រសើរហើយដែលទទួលបានការបំបែកឯតទគ្គកម្មដូច្នេះ ប៉ុន្តែវានឹងកាន់តែប្រសើរថែមទៀត ប្រសិនបើវាជាការស៊ុតបញ្ចូលទីដែលនាំឲ្យយើងឈ្នះនៅក្នុងការប្រកួតនេះ»។
កីឡាករ King ដែលធ្លាប់ជាអ្នកបំបែកឯតទគ្គកម្មទាត់បញ្ចូលទីបានលឿនជាងគេបាននិយាយថា ការបំបែកឯតទគ្គកម្មនៅអាយុ ១៩ ឆ្នាំរបស់ខ្លួន នៅពេលនេះត្រូវបានគេដណ្ដើមយកហើយ។
ក្រៅពីការបំបែកឯតទគ្គកម្មរបស់ King ខ្សែប្រយុទ្ធ Alan Shearer របស់ Newcastle ក៏បានជាប់ឈ្មោះជាអ្នករកបានគ្រាប់បាល់លឿនជាងគេ ក្នុងប្រវត្តិសាស្ត្រ Premier League ដែរដោយគេបានបញ្ចូលទីនៅវិនាទីទី ១០.៥២ ពេលក្រុមនេះជួបក្រុម Man City ឆ្នាំ ២០០៣។ បន្ទាប់មកទៀតគឺ Christian Eriksen ដែលស៊ុតបញ្ចូលទីនៅវិនាទីទី ១០.៥៤ សម្រាប់ក្រុម Spurs ពេលជួបក្រុម Man United កាលពីរដូវកាលមុន៕