ក្រុងគែរៈ កីឡាករ Riyad Mahrez បានជួយឲ្យជម្រើសជាតិអាល់ហ្សេរីទទួលជ័យជម្នះដ៏អស្ចារ្យ ២-១ ទៅលើម្ចាស់ជើងឯក ៣ ជំនាន់នីហ្សេរីយ៉ាកាលពីពេលទៀបភ្លឺថ្ងៃចន្ទដើម្បីឡើងទៅជួបនឹងជម្រើសជាតិសេណេហ្គាល់នៅវគ្គផ្ដាច់ព្រ័ត្រនៃព្រឹត្តិការណ៍ Cup of Nations។
ក្រុមអាល់ហ្សេរីបាននាំមុខ ១ គ្រាប់ទៅលើគូប្រជែងខ្លួននៅនាទីទី ៤០ ដោយកីឡាករ William Troost-Ekong នៅមុនពេលជម្រើសជាតិនីហ្សេរីយ៉ារកបាន ១ គ្រាប់វិញដោយការស៊ុតបាល់ពិន័យ ១១ ម៉ែត្រយ៉ាងល្អដោយកីឡាករ Odion Ighalo នៅនាទីទី ៧២ ប៉ុន្តែក្នុងនាទីទី ៩០ កីឡាករ Mahrez បានបន្ថែម ១ គ្រាប់ទៀតដោយការស៊ុតបាល់ free-kick យ៉ាងល្អធ្វើឲ្យក្រុមអាល់ហ្សេរីឈ្នះនីហ្សេរីយ៉ា ២-១ ក្នុងវគ្គ ៤ ក្រុមចុងក្រោយកាលពីពេលទៀបភ្លឺថ្ងៃចន្ទ។
ជ័យជម្នះនេះបានធ្វើឲ្យក្រុមអាល់ហ្សេរីឡើងទៅដល់វគ្គផ្ដាច់ព្រ័ត្រជាលើកដំបូងតាំងពីពួកគេបានលើកពាននេះតែម្ដងគត់នៅឆ្នាំ ១៩៩០ ខណៈពួកគេនឹងត្រូវប្រកួតនៅវគ្គផ្ដាច់ព្រ័ត្រនៅថ្ងៃទី ១៩ ខែកក្កដាជាមួយក្រុមសេណេហ្គាល់ដែលបានឈ្នះជម្រើសជាតិទុយនេស៊ី ១-០ នៅវគ្គ ៤ ក្រុមចុងក្រោយពីយប់ថ្ងៃអាទិត្យ។
កីឡាករ Mahrez បាននិយាយថា៖ «យើងពិតជាសប្បាយចិត្តណាស់ដែលបានឡើងទៅវគ្គផ្ដាច់ព្រ័ត្រនៅ Cup of Nations ព្រោះវាជាអ្វីមួយពិសេសមែនទែន»។
កីឡាកររូបនេះបានបន្ថែមថា៖ «វាជាគោលបំណងរបស់យើងក្នុងការឡើងទៅវគ្គនេះដើម្បីប្រជាពលរដ្ឋ និងក្រុមគ្រួសាររបស់យើង។ យើងដឹងហើយថា ពួកគេកំពុងស្ថិតនៅពីក្រោយខ្នងយើងគ្រប់ពេលទាំងអស់។ វាជាគោលបំណងសំខាន់បំផុតរបស់ខ្ញុំសម្រាប់ក្ដីសុបិនប្រទេសជាតិ។ មែនហើយវាជាក្ដីសុបិនរបស់ខ្ញុំក្នុងការឈ្នះពាននេះ ហើយសង្ឃឹមថាយើងនឹងអាចធ្វើបានដោយជោគជ័យ»។
គ្រូបង្វឹកអាល់ហ្សេរីលោក Djamel Belmadi បានកោតសរសើរ «ទម្រង់លេង និងកម្លាំងកាយចិត្តដ៏អស្ចារ្យរបស់កូនក្រុមគាត់» ជាពិសេសគឺកីឡាករ Mahrez តែម្ដងដែលបានជួយឲ្យក្រុមអាល់ហ្សេរីឈ្នះក្នុងការប្រកួតនេះ។
លោក Belmadi បាននិយាយថា៖ «កូនក្រុមខ្ញុំធ្វើបានល្អនៅតង់ទី ១ ដែលធ្វើឲ្យយើងរកបាន ១ គ្រាប់ ហើយខ្ញុំគិតថាយើងអាចរកបានគ្រាប់បាល់បន្ថែមទៀត ប៉ុន្តែពេលនោះក្នុងតង់ទី ២ ខ្ញុំគិតថាយើងបានជួបស្ថានភាពលំបាករយៈពេល ១៥ នាទីដោយសារយើងមានសម្ពាធខ្លាំង»។
គ្រូបង្វឹករូបនេះបានបន្តទៀតថា៖ «ក្រោយពីមានការស៊ុតបាល់ពិន័យ ១១ ម៉ែត្រពីគូប្រជែងយើងហើយ ខ្ញុំគិតថាកូនក្រុមខ្ញុំបានបង្ហាញទម្រង់លេង និងកម្លាំងកាយចិត្តដ៏អស្ចារ្យរហូតបានជ័យជម្នះនៅនាទីចុងក្រោយដែលយើងរកបាន ១ គ្រាប់ដោយការស៊ុតបាល់ free-kick»។
គ្រូបង្វឹកជម្រើសជាតិនីហ្សេរីយ៉ាលោក Rohr បានទទួលស្គាល់ថាក្រុមអាល់ហ្សេរីគឺសមនឹងទទួលជ័យជម្នះក្រោយពីបានបញ្ចប់ឱកាសរបស់ពួកគេមិនឲ្យឡើងទៅលើវគ្គផ្ដាច់ព្រ័ត្រជាលើកទី ៨។
លោក Rohr បាននិយាយថា៖ «ខ្ញុំត្រូវអបអរសាទរកូនក្រុមរបស់ខ្ញុំចំពោះការប្រឹងប្រែងប្រកួតដ៏អស្ចារ្យជាមួយក្រុមល្អបំផុតនេះ។ ពួកគេបានឈ្នះនៅនាទីចុងក្រោយ ដូច្នេះហើយពួកគេសមនឹងបានបែបនេះក្រោយពីពួកគេស៊ុតបាល់ free-kick បញ្ចូលទីយ៉ាងល្អ»។
គ្រូបង្វឹករូបនេះបាបបន្ថែមថា៖ «វាជាការប្រកួតអស្ចារ្យមួយរហូតដល់នាទីចុងក្រោយ។ ក្រុមអាល់ហ្សេរីធ្វើបានល្អជាងយើងនៅក្នុងតង់ទី ១ ប៉ុន្តែក្នុងតង់ទី ២ យើងលេងបានល្អជាងវិញ ប៉ុន្តែយើងចាញ់ ១ គ្រាប់នៅនាទីចុងក្រោយនៃការប្រកួតនេះ»។
គ្រូបង្វឹកនីហ្សេរីយ៉ារូបនេះបានបន្ថែមទៀតថា៖ «ខ្ញុំគិតថា កូនក្រុមរបស់ខ្ញុំចង់លេងក្នុងម៉ោងបន្ថែម ១៥ នាទី ២ ដងព្រោះពួកគេជឿថាក្រុមអាល់ហ្សេរីនឹងអស់កម្លាំងដែលធ្វើឲ្យពួកគេអាចឈ្នះក្រុមអាល់ហ្សេរីនៅពេលនោះតែម្ដង»៕ SN