អង់គ្លេស: អ្នកចាត់ការក្រុម Man City លោក Pep Guardiola មានការសប្បាយចិត្តយ៉ាងខ្លាំងនៅពេល Man City បានផ្ដួលក្រុម Watford ៦-០ ក្នុងការប្រកួតផ្ដាច់ព្រ័ត្រពាន FA Cup ហើយការឈ្នះពានបន្ថែមមួយទៀតនេះជាជ័យជម្នះ និងជាការបង្កើតប្រវត្តិដ៏អស្ចារ្យចុងក្រោយមួយក្នុងរដូវកាលនេះរបស់ Man City ដែលគ្មានក្រុមណាមួយនៅប្រទេសអង់គ្លេសធ្លាប់ធ្វើបានបែបនេះអស់រយៈពេល ១១៦ ឆ្នាំមកហើយ។
ការយកឈ្នះលើក្រុម Watford ៦-០ កាលពីថ្ងៃសៅរ៍នោះបានកើតមានឡើង ក្រោយពីក្រុម Man City រកបានគ្រាប់បាល់ជាបន្តបន្ទាប់ដោយក្នុងនោះខ្សែប្រយុទ្ធ Silva រកបាន ១ គ្រាប់មុនគេនៅនាទីទី ២៦ ខ្សែបម្រើប្រយុទ្ធ Sterling រកបានគ្រាប់បាល់ទី ២ នៅនាទីទី ៣៨ ហើយ K. De Bruyne ជាអ្នករកបានគ្រាប់បាល់ទី ៣ នៅនាទីទី ៦១។ ៧ នាទីក្រោយមកកីឡាករ D. Jesus បានបន្ថែម ១ គ្រាប់ទៀតមុនពេល Sterling រកបាន ២ គ្រាប់ចុងក្រោយនៅនាទីទី ៨១ និងនាទីទី ៨៧។
តាមរយៈការយកឈ្នះក្រុម Watford នៅវគ្គផ្តាច់ព្រ័ត្រនេះបានជួយឲ្យ Man City លើកពានចំនួន ៣ ជាលើកដំបូង មិនធ្លាប់មានពីមុនមកគឺពាន Premier League ពាន FA និងពាន League Cups ព្រមទាំងពាន Community Shield មួយចំនួនទៀតក្នុងរយៈពេល ១ ទសវត្សរ៍នេះ។
ឥឡូវនេះលោក Guardiola ទទួលបានជ័យជម្នះសរុប ២៧ លើកក្នុងនាមជាគ្រូបង្វឹកក្នុងនោះជ័យជម្នះ ៦ លើកបានកើតឡើងនៅពេលលោកធ្វើដំណើរទៅប្រទេសអង់គ្លេសកាលពី ៣ ឆ្នាំមុន ចំណែក ១៤ លើកទៀតនៅក្លិប Barcelona ហើយ ៧ លើកក្នុង ៣ រដូវកាលចុងក្រោយនៅក្លិប Bayern Munich។
ទោះបីជាយ៉ាងណាលោក Pep Guardiola នៅមិនទាន់ជោគជ័យទាំងស្រុងសម្រាប់ក្លិប Man City នៅឡើយទេ ដោយសារគាត់មិនទាន់ជួយឲ្យក្រុមបានលើកពានក្របខ័ណ្ឌ Champions League ដូចកាលដែលគាត់មិនអាចជួយក្រុម Bayern Munich នៅប្រទេសអាល្លឺម៉ង់អ៊ីចឹងដែរ។
យ៉ាងណាក៏ដោយលោក Guardiola បានអះអាងថាជោគជ័យជាបន្តបន្ទាប់របស់ក្រុមគាត់នៅទូទាំងការប្រកួតនៅរដូវកាលនេះបានបង្កើតស្នាដៃដ៏អស្ចារ្យមួយដោយទទួលបានពានចំនួន ៣ គឺខ្លាំងជាងការឈ្នះពាន Champions League ទៅទៀត។
គ្រូបង្វឹកសញ្ជាតិអេស្ប៉ាញរូបនេះបានបង្កើតបទដ្ឋានថ្មីមួយចំនួនសម្រាប់ក្រុម Man City និងបាល់ទាត់នៅប្រទេសអង់គ្លេស ប៉ុន្តែលោកនៅតែស្រេកឃ្លានចង់បានស្នាដៃបន្ថែមទៀតនៅរដូវកាលក្រោយ។ លោកនិយាយថា៖ «យើងបានឈ្នះពាន Premier League ដោយសារលើសគេតែ ១ ពិន្ទុប៉ុណ្ណោះ ដូច្នេះយើងមិនទាន់អាចថាជាអ្នកខ្លាំងជាងគេនៅឡើយទេ»។
លោក Pep Guardiola បាននិយាយបន្តថា៖ «ក្រុម Liverpool បានបង្ហាញឲ្យយើងបានឃើញថា នៅពេលអនាគត យើងនឹងមានការប្រកួតតឹងតែងមួយ ហើយនេះគឺជាស្ដង់ដា និងកម្រិតមួយដែលយើងនឹងត្រូវប្រឈមមុខនៅពេលខាងមុខ»។
ការពិតដែលថា Man City ហាក់មិនពេញចិត្តនៅឡើយនេះ វាមិនត្រឹមតែបង្កគ្រោះថ្នាក់សម្រាប់ការប្រកួតប៉ុណ្ណោះទេ ប៉ុន្តែថែមទាំងអាចបង្កបញ្ហាសម្រាប់លក្ខខ័ណ្ឌនៃការប្រកួតក្នុងក្របខ័ណ្ឌអង់គ្លេសជាទូទៅផងដែរ៕ SN