.jpg)
Floyd Mayweather ប្រកាសឡើងប្រកួតជាមួយនឹងតារាឆ្នើមជប៉ុន Nasukawa មុនថ្ងៃចូលឆ្នាំថ្មី។ AFP
ក្រុងតូក្យូ: តារាប្រដាល់ជើងចាស់ Floyd Mayweather Jr បានបញ្ជាក់កាលពីថ្ងៃចន្ទថា រូបគេនឹងចាកចេញពីការចូលនិវត្តន៍ដើម្បីប្រកួតជាមួយនឹងកីឡាករប្រដាល់សេរីជប៉ុន Tenshin Nasukawa ដែលមានវ័យក្មេងជាងពាក់កណ្តាល នៅល្ងាចថ្ងៃមុនចូលឆ្នាំថ្មី ក្នុងទីក្រុង Saitama។
កីឡាករសញ្ជាតិអាមេរិកវ័យ ៤១ ឆ្នាំរូបនេះ ដែលបានឈ្នះខ្សែក្រវាត់ពិភពលោកក្នុងទម្ងន់ ៥ ប្រភេទខុសគ្នា និងត្រូវបានចាត់ទុកថា ជាកីឡាករប្រដាល់មិនរើសទម្ងន់ដ៏ឆ្នើមបំផុតក្នុងកីឡានេះ បានយកឈ្នះលើអ្នកប្រយុទ្ធគុនចម្រុះ Conor McGregor របស់អៀរឡង់ ក្នុងការប្រកួតចុងក្រោយរបស់គេកាលពីខែសីហា ឆ្នាំ ២០១៧។
ជ័យជម្នះនោះ បានធ្វើឲ្យកំណត់ត្រាឈ្នះក្នុងកីឡាប្រដាល់របស់គេកើនដល់ ៥០ លើក មិនដែលចាញ់ ប៉ុន្តែ រូបមន្ត ឬលក្ខខណ្ឌសម្រាប់ការប្រកួតរបស់គេជាមួយនឹង Nasukawa មិនទាន់ត្រូវបានកំណត់ជាក់លាក់ដោយអង្គភាពរៀបចំការប្រកួតក្បាច់ចម្រុះ RIZIN នៅឡើយទេ។
Mayweather បានបង្ហោះរូបថតមួយនៅលើបណ្តាញសង្គម Instagram របស់គេកាលពីចុងសប្តាហ៍មុន ដោយបង្ហាញពីរូបគេកំពុងតែពាក់ហ្គង់កីឡាប្រដាល់សេរី។ ក្រោយពីបានធ្វើដំណើរទៅកាន់ប្រទេសជប៉ុន ដោយយន្តហោះឯកជនរបស់គេ Mayweather បានប្រាប់សន្និសីទសារព័ត៌មានក្នុងទីក្រុងតូក្យូថា៖ «ខ្ញុំចង់ផ្តល់ឲ្យអ្នកគាំទ្រជាច្រើនចង់បាន ដូចជា ឈាម ញើស និងទឹកភ្នែក»។
ដើម្បីផ្សព្វផ្សាយពីការប្រកួតកីឡាប្រយុទ្ធខុសលក្ខខណ្ឌគ្នា ដែលជាផ្នែកនៃការពង្រីកអាជីវកម្មរបស់គេនៅជប៉ុន កីឡាកររូបនេះបានប្រាប់បន្តថា៖ «ខ្ញុំចង់បន្តកសាងទំនាក់ទំនងរបស់ខ្ញុំជាមួយនឹងក្រុម Money Team Tokyo។ ខ្ញុំចង់បន្តមកទីនេះ និងនាំយកកីឡាករផ្សេងទៀត ហេតុនេះ ក្រុមហ៊ុនរបស់ខ្ញុំអាចបន្តអភិវឌ្ឍ ហើយ RIZIN អាចបន្តអភិវឌ្ឍ»។
Mayweather បានបន្ថែមទៀតថា៖ «យើងកំពុងធ្វើឲ្យការប្រកួតធំៗជាច្រើនកើនឡើងនៅអាមេរិក ប៉ុន្តែ យើងសម្លឹងឆ្ពោះទៅកាន់ការធ្វើឲ្យអង្គភាព Mayweather Promotions និង TMT ល្បីល្បាញទូទាំងពិភពលោក»។
Nasukawa ដែលជាត្រូវបានចាត់ទុកក្នុងសន្និសីទសារព័ត៌មានជាកីឡាករដ៏ឆ្នើមបំផុតក្នុងកីឡាប្រយុទ្ធរបស់ជប៉ុននោះ មានកំណត់ត្រាឈ្នះ ២៧ លើក មិនដែលចាញ់ ប៉ុន្តែ មិនធ្លាប់បានប្រកួតក្នុងនាមជាកីឡាករប្រដាល់សកលអាជីពឡើយ។ កីឡាករវ័យ ២០ ឆ្នាំរូបនេះ បានចាត់ទុកថា «វាជាការសម្រេចចិត្តដ៏ងាយស្រួល» ក្នុងការទទួលយកសំណើដើម្បីប្រកួតជាមួយនឹង Mayweather នៅ Saitama ភាគខាងជើង ទីក្រុងតូក្យូ៕
