.jpg)
Medvedev ទទួលរង្វាន់ Shanghai Masters ពីថ្ងៃអាទិត្យ។ រូប AFP
ក្រុងម៉ូស្គូ៖ កីឡាករវាយកូនបាល់រុស្ស៊ី Daniil Medvedev ដែលជាប់ចំណាត់ថ្នាក់លេខ ១ នៅប្រទេស រុស្ស៊ី កាលពីថ្ងៃចន្ទបានចុះកុងត្រាប្រកួតវាយកូនបាល់ដើម្បីក្រុមអ្នកគាំទ្ររបស់ខ្លួននៅក្នុងទីក្រុងម៉ូស្គូ ប្រទេស រុស្ស៊ី នៅរយៈពេលប៉ុន្មានម៉ោងបន្ទាប់ពីត្រឡប់មកពីប្រទេស ចិន ជាទីដែលរូបគេបានឈ្នះពានរង្វាន់ Shanghai Masters កាលពីថ្ងៃអាទិត្យ។
ក្រោយពីមានភាពអសកម្មមួយរយៈមកនេះ កីឡាវាយកូនបាល់នៅប្រទេស រុស្ស៊ី ឥឡូវនេះបានចាប់ផ្ដើមមានសកម្មភាពឡើងវិញ ជាមួយកីឡាករវ័យក្មេងជំនាន់ថ្មី ហើយកីឡាករ Medvedev អាយុ ២៣ ឆ្នាំ កំពុងឈានមុខគេជាមួយអាជីពល្អបំផុតជាប់ចំណាត់ថ្នាក់ទី ៤ ក្នុងពិភពលោក។
កីឡាករ Medvedev បានប្រាប់ទីភ្នាក់ងារ AFP ថា៖ «ខ្ញុំពិតជាមានអារម្មណ៍ថា មានការគាំទ្រជាច្រើនពីប្រទេស រុស្ស៊ី ហើយវាពិតជាធំធេង និងអស្ចារ្យមែនទែន ហើយថែមទាំងមានការគាំទ្រជាច្រើនពីប្រព័ន្ធផ្សព្វផ្សាយសង្គម និងមិត្តភក្តិរបស់ខ្ញុំ ព្រោះពួកគេភាគច្រើននៅតែជាពលរដ្ឋរុស្ស៊ីនៅឡើយ»។
អ្នកគាំទ្រឈ្មោះ Daniil Trefilov ជានិស្សិតអាយុ ១៩ ឆ្នាំ បានសរសើរភាពល្បីល្បាញរបស់កីឡាកររូបនេះថា៖ «រឿងសំខាន់គឺថា កីឡាវាយកូនបាល់កំពុងមានប្រជាប្រិយកាន់តែខ្លាំងឡើងនៅប្រទេស រុស្ស៊ី ដោយសាររូបគាត់»។
អ្នកគាំទ្រ Trefilov សង្ឃឹមថា នឹងបានឃើញការប្រកួតរបស់កីឡាករ Medvedev នៅក្នុងការប្រកួតពានរង្វាន់ Kremlin Cup ក្នុងទីក្រុងនេះ នៅសប្ដាហ៍នេះ។
អ្នកគាំទ្រម្នាក់ទៀតឈ្មោះ David Umarkhadzhiyev ដែលដឹកនាំក្រុមអ្នកគាំទ្រតាមអ៊ិនធឺណិត បាននិយាយថា គាត់ចាប់ផ្ដើម «ស្រឡាញ់កីឡានេះ» ក្រោយពីបានឃើញការប្រកួតរបស់ Medvedev ។
អ្នកគាំទ្រ Umarkhadzhiyev បាននិយាយដោយសំដៅទៅរកកីឡាករឆ្នើមៗប៉ុន្មានទសវត្សរ៍មកនេះថា៖ «ក្រោយពីបានឃើញកីឡាករ Safin និងកីឡាករ Kafelnikov ខ្ញុំបានដក់អារម្មណ៍ជាប់នឹងការប្រកួតនេះតែម្ដង»។
អ្នកគាំទ្ររូបនេះបានបន្ថែមថា៖ «គ្មានបុរសទេ ហើយភ្លាមៗនោះកាលពី ១ ឬ ២ ឆ្នាំមុន កីឡាករ Medvedev, (Karen) Khachanov និង (Andrei) Rublev ក៏បានបង្ហាញខ្លួនឡើងផងដែរ»។
កីឡាករទាំង ៣ រូបនេះ គឺជាកីឡាករលំដាប់កំពូលប្រចាំប្រទេស រុស្ស៊ី ហើយកីឡាករ Medvedev និយាយថា ពួកគេធ្លាប់ប្រកួតគ្នាយ៉ាងសកម្ម។
កីឡាកររូបនេះបាននិយាយថា៖ «យើងមានការប្រកួតប្រជែងដ៏អស្ចារ្យរវាងយើងទាំង ៣ នាក់ ហើយយើងពិតជាវាយបកគ្នាទៅវិញទៅមកយ៉ាងសកម្មផងដែរ»៕ AFP/SN
