ក្រុងម៉ា្រឌីដ៖ កីឡាករ Lionel Messi បានបំបែកកំណត់ត្រាមួយទៀត ជាមួយការរកបាន ៣ គ្រាប់ លើកទី ៣៥ របស់ខ្លួននៅក្នុងក្របខ័ណ្ឌអេស្ប៉ាញ La Liga ពីថ្ងៃសៅរ៍ ខណៈក្លិប Barcelona បានឈ្នះក្រុម Real Mallorca ៥-២ ដើម្បីបន្តនាំមុខក្លិប Real Madrid ដោយឈរនៅលើកំពូលតារាងនៅក្នុងក្របខ័ណ្ឌនេះ។
កីឡាករ Griezmann បានបើកឆាក ១ គ្រាប់ សម្រាប់ក្រុមម្ចាស់ផ្ទះ Barcelona មុនពេលកីឡាករ Messi បានបន្ថែមគ្រាប់បាល់ទី ២ ប៉ុន្តែក្នុងនាទី ៣៥ កីឡាករ Budimir រកបាន ១ គ្រាប់សម្រាប់ក្រុមភ្ញៀវ Mallorca បន្ទាប់មកទៀតកីឡាករ Messi បានដាក់ ១ គ្រាប់ទៀត នៅនាទី ៤១ មុនពេលកីឡាករ Suarez រកបាន ១ គ្រាប់ដែរ នៅនាទី ៤៣ ធ្វើឲ្យក្រុមម្ចាស់ផ្ទះនាំមុខ ៤-១ នៅតង់ទី ១។
លុះដល់តង់ទី ២ កីឡាករ Budimir រកបាន ១ គ្រាប់ទៀត សម្រាប់ក្រុមភ្ញៀវនៅនាទី ៦៤ មុនពេលកីឡាករ Messi បានបន្ថែម ១ គ្រាប់ទៀត ធ្វើឲ្យម្ចាស់ផ្ទះឈ្នះ ៥-២។
កីឡាករ Suarez បាននិយាយថា៖ «ខ្ញុំបានដឹងថា ខ្ញុំមានគម្លាតតិចតួចបំផុត ដូច្នេះហើយខ្ញុំត្រូវតែព្យាយាមសម្របតាមឱកាសរបស់ខ្ញុំ»។
គ្រូបង្វឹកក្លិប Barcelona លោក Ernesto Valverde បាននិយាយថា៖ «ខ្ញុំមានការភ្ញាក់ផ្អើលយ៉ាងខ្លាំង ព្រោះវាជាការរកបានគ្រាប់បាល់ដ៏អស្ចារ្យបំផុតមួយ»។
កាលពីសប្ដាហ៍មុន កីឡាករ Messi បានឈ្នះពានរង្វាន់កីឡាករឆ្នើម Ballon d''Or លើកទី ៦ របស់ខ្លួនធ្វើឲ្យរូបគេបានបំបែកកំណត់ត្រាពិភពលោក ក្រោយពីបានឈ្នះដាច់កីឡាករ Cristiano Ronaldo ដើម្បីឈរតែម្នាក់ឯង។
គ្រូបង្វឹកលោក Valverde បាននិយាយជុំវិញពានរង្វាន់នេះថា៖ «ពិតជាមិនគួរឲ្យជឿសោះ ហើយសូមអបអរចំពោះការទទួលបានពានរង្វាន់ Ballon d''Or នេះ»។
ការទទួលពានរង្វាន់ថ្មីៗនេះបានធ្វើឲ្យកីឡាករ Messi មានឋានៈជាកីឡាករឆ្នើមបំផុតក្នុងពិភពលោក ដែលអាចជាកម្លាំងចិត្តក្នុងការជួយឲ្យកីឡាកររូបនេះរកបាន ៣ គ្រាប់ នៅក្នុងការប្រកួតនេះផងដែរ។
ឥឡូវនេះកីឡាករ Messi រកបាន ១២ គ្រាប់ ក្នុងរដូវកាលនេះជាគ្រាប់បាល់ច្រើនបំផុតនៅក្នុងក្របខ័ណ្ឌនេះ និងលើស ១ គ្រាប់ នៃគ្រាប់បាល់របស់កីឡាករ Karim Benzema របស់ក្លិប Real Madrid ដែលរូបគេរកបាន ១ គ្រាប់ដែរក្នុងការប្រកួតដោយជ័យជម្នះ ២-០ ទៅលើក្រុម Espanyol នៅថ្ងៃសៅរ៍នោះផងដែរ។
លទ្ធផលនេះបានធ្វើឲ្យក្លិប Madrid ឈរនៅលេខ ២ តាមពីក្រោយក្រុម Barcelona ដែលមាន ៣៤ ពិន្ទុដូចគ្នា ប៉ុន្តែក្រុម Barcelona មានគ្រាប់បាល់ចំណេញច្រើនជាង បន្ទាប់មកគឺក្រុម Sevilla ដែលចាញ់ក្លិបទាំង ២ នេះ ៤ ពិន្ទុ។
លោក Zinedine Zidane គ្រូបង្វឹកក្លិប Real បាននិយាយថា៖ «យើងកំពុងជជែកពីកីឡាករ Karim ក្នុងន័យល្អច្រើនថ្មីៗនេះ ព្រោះគាត់កាន់តែចាស់ ហើយគាត់ក៏កាន់តែបង្ហាញភាពចាស់ទុំកាន់តែច្រើនផងដែរ»។
គ្រូបង្វឹករូបនេះបានបន្ថែមថា៖ «យើងទាំងអស់គ្នាមិនសុទ្ធតែល្អបំផុតនោះទេ ប៉ុន្តែគាត់ត្រូវបានសុំឲ្យដេញតាម ហើយគាត់ធ្វើបានសម្រេច។ គេសុំឲ្យគាត់រកគ្រាប់បាល់ឲ្យបាន ហើយគាត់ធ្វើបានសម្រេច។ ខ្ញុំមិនអាចសុំច្រើនពេកទេព្រោះរឿងប៉ុណ្ណោះគាត់អាចធ្វើបានហើយ»។
កីឡាករ Raphael Varane រកបានគ្រាប់បាល់បើកឆាកសម្រាប់ក្រុមម្ចាស់ផ្ទះ Real នៅនាទីទី ៣៧ មុនពេលកីឡាករ Benzema បានបន្ថែម ១ គ្រាប់ទៀត នៅនាទី ៧៩ ដែលជាគ្រាប់បាល់លើកទី ១៥ របស់ខ្លួននៅរដូវកាលនេះ៕ AFP/SN