ញូវយ៉កៈ ទស្សនាវដ្ដី Forbes បានធ្វើការរាយការណ៍កាលពីថ្ងៃអង្គារអំពីបញ្ជីអ្នករកចំណូលច្រើនជាងគេបំផុតក្នុងវិស័យកីឡាប្រចាំឆ្នាំរបស់ខ្លួនថា តារាបាល់ទាត់ដ៏ឆ្នើម Lionel Messi បានក្លាយជាជាកីឡាករដែលរកបានប្រាក់ចំណូលច្រើនជាងគេបំផុតក្នុងពិភពលោកក្នុងរយៈពេល ១ ឆ្នាំមកនេះ។
តារាបាល់ទាត់សញ្ជាតិអាហ្សង់ទីន Messi លេងនៅក្លិប Barcelona រូបនេះបានវ៉ាដាច់កីឡាករប្រដាល់សកលដែលចូលនិវត្តន៍ Floyd Mayweather ដើម្បីជាប់ជាអ្នករកចំណូលបានច្រើនជាងគេបំផុតក្នុងពិភពកីឡាដោយរកបានតាមរយៈប្រាក់បៀវត្សរ៍ចំនួន ១២៧ លានដុលា្លរអាមេរិក និងកុងត្រាផ្សេងៗទៀត។
ការរកបានចំណូលយ៉ាងច្រើននេះបានជួយឲ្យ Messi នាំមុខគូប្រជែងខ្លួនជាយូរមកហើយគឺ Cristiano Ronaldo របស់ក្រុមព័រទុយហ្គាល់លេងនៅក្លិប Juventus ដែលជាកីឡាករជាប់លេខ ២ ជាមួយប្រាក់ចំណូលប្រចាំឆ្នាំ ១០៩ លានដុល្លារអាមេរិក ខណៈខ្សែប្រយុទ្ធសញ្ជាតិប្រេស៊ីល Neymar នៅក្លិប PSG បានជាប់ចំណាត់ថ្នាក់ទី ៣ ដែលរកប្រាក់ចំណូលប្រចាំឆ្នាំបាន ១០៥ លានដុល្លារអាមេរិក។
កីឡាករប្រដាល់សកលកម្រិតទម្ងន់មធ្យមសញ្ជាតិម៉ិកស៊ិកឈ្មោះ Saul Canelo Alvarez រកបានប្រាក់ចំណូលប្រចាំឆ្នាំ ៩៤ លានដុល្លារអាមេរិក ដើម្បីជាប់ក្នុងបញ្ជីជាអ្នករកបានប្រាក់ចំណូលច្រើនបំផុតទី ៤។ Alvarez ដែលបានផ្តួលកីឡាករ Gennady Golovkin កាលពីខែកញ្ញាឆ្នាំមុននោះបានក្លាយជាជើងឯកទម្ងន់មធ្យម ហើយរូបគេបានចុះកុងត្រាក្នុងតម្លៃខ្លួនថ្លៃបំផុតក្នុងប្រវត្តិសាស្ត្រប្រដាល់កាលពីខែតុលាឆ្នាំមុនដោយចុះកុងត្រារយៈពេល ៥ ឆ្នាំប្រកួត ១១ លើកជាមួយបណ្ដាញ DAZN ក្នុងតម្លៃខ្លួនរហូតដល់ ៣៦៥ លានដុល្លារ។
ជាមួយគ្នានេះតារាវាយកូនបាល់ Roger Federer នៅក្រុមហ៊ុនដឹកជញ្ជូន Evergreen គឺជាកីឡាករជាប់លេខ ៥ នៅលើបញ្ជីដោយរូបគេអាចរកចំណូលបានសរុបចំនួន ៩៣,៤ លានដុល្លារអាមេរិក ហើយប្រាក់ចំណូលភាគច្រើនរបស់ Federer បានមកពីការចុះកុងត្រាដែលទទួលបានប្រាក់ចំណេញយ៉ាងច្រើនជាមួយប្រាក់ឈ្នះពានរង្វាន់ជើងឯកវាយកូនបាល់ Grand Slam រយៈពេល ២០ លើកសរុបទឹកប្រាក់ចំនួន ៨៦ លានដុល្លារ។
ចំពោះចំណាត់ថា្នក់ទី ៦ បានទៅលើកីឡាករបាល់ឱបអាមេរិក Russell Wilson នៅក្លិប Seattle Seahawks ដែលរកចំណូលបាន ៨៩,៥ លានដុល្លារ ហើយចំណាត់ថ្នាក់ទី ៧ គឺកីឡាករបាល់ឱប Aaron Rodgers នៅក្លិប Green Bay Packers ដែលរកចំណូលបាន ៨៩,៣ លានដុល្លារ។
យ៉ាងណាមិញតារាបាល់បោះ LeBron James នៅក្លិប Los Angeles Lakers បានជាប់ឈ្មោះជាអ្នករកចំណូលច្រើនបំផុតទី ៧ ជាមួយប្រាក់ចំណូលចំនួន ៨៩ លានដុល្លារ ហើយកីឡាករ Stephen Curry នៅក្លិប Golden State ជាប់ចំណាត់ថ្នាក់ទី ៩ ជាមួយប្រាក់ចំនួន ៧៩.៨ លានដុល្លារ ហើយអ្នកជាប់ចំណាត់ថ្នាក់ទី ១០ បានទៅលើកីឡាករបាល់បោះ Kevin Durant ដែលរកចំណូលបាន ៦៥,៤ លានដុល្លារ។
ចំណែកអ្នកជាប់ចំណាត់ថ្នាក់ទី ១១ គឺកីឡាករវាយកូនគោលលេខ ១ Tiger Woods ដែលរកចំណូលបានចំនួន ៦៩,៣ លានដុល្លាររួមទាំងកុងត្រាមួយចំនួនដែលមានទឹកប្រាក់ប្រហែល ៥៤ លានដុល្លារអាមេរិកផងដែរ ខណៈចំណាត់ថ្នាក់ទី ១២ បានទៅលើកំពូលតារាវាយកូនបាល់ Serena Williams គឺជាស្ត្រីតែម្នាក់គត់ដែលជាប់ក្នុងបញ្ជីនេះជាមួយទឹកប្រាក់ដែលរកបានប្រចាំឆ្នាំចំនួន ២៩,២ លានដុល្លារ៕ SN