.jpg)
Messi ទាត់បាល់ពិន័យ ១១ ម៉ែត្រចូលទីយ៉ាងល្អក្នុងការប្រកួតពីថ្ងៃពុធ។ រូបថត AFP
កីឡាករឆ្នើម Lionel Messi បានស៊ុតបាល់ពិន័យ ១១ ម៉ែត្រយ៉ាងល្អជួយឲ្យក្រុមជម្រើសជាតិអាហ្សង់ទីនស្មើនឹងក្រុមជម្រើសជាតិប៉ារ៉ាហ្គាយ ១-១ ក្នុងការប្រកួតនៅព្រឹត្តិការណ៍ Copa America កាលពីថ្ងៃពុធ។
ក្នុងការប្រកួតនេះប្រទេសប៉ារ៉ាហ្គាយបាននាំមុខ ១ គ្រាប់មុនទៅលើគូប្រជែងរបស់ខ្លួនដែលរកបានដោយកីឡាករ Richard Sanchez នៅនាទីទី ៣៧ ប៉ុន្តែនៅនាទីទី ៥៤ ប្រទេសអាហ្សង់ទីនរកបាន ១ គ្រាប់វិញដោយការស៊ុតបាល់ពិន័យ ១១ ម៉ែត្ររបស់កីឡាករ Messi ធ្វើឲ្យលទ្ធផលស្មើគ្នា ១-១ ។
ប្រទេសអាហ្សង់ទីនក៏ត្រូវអរគុណអ្នកចាំទី Franco Armani ដែលបានសង្គ្រោះបាល់ពិន័យ ១១ ម៉ែត្រយ៉ាងល្អផងដែរនៅចុងម៉ោងនៃការប្រកួតសម្រាប់ពូល B នេះដើម្បីកុំឲ្យប៉ារ៉ាហ្គាយនាំមុខ ២-១។
លទ្ធផលនេះបានធ្វើឲ្យអាហ្សង់ទីនមាន ១ ពិន្ទុ និង ២ ប្រកួតដែលឈរនៅក្រោមគេនៅក្នុងពូលនេះ ខណៈនៅសល់តែ ១ ប្រកួតទៀតប៉ុណ្ណោះ។
ទោះយ៉ាងណាដោយត្រូវដណ្ដើមគ្នាឈរនៅលេខ ៣ រវាងអាហ្សង់ទីន និងប្រទេសកាតាដើម្បីមានឱកាសឡើងទៅវគ្គ ៨ ក្រុមចុងក្រោយនោះ អាហ្សង់ទីននៅតែអាចឡើងដល់វគ្គ ៨ ក្រុមបានប្រសិនបើអាហ្សង់ទីនឈ្នះកាតានៅក្នុងការប្រកួតចុងក្រោយនៅពូល B នេះ ហើយប្រសិនប៉ារ៉ាហ្គាយចាញ់កូឡុំប៊ីនៅថ្ងៃទី ២៤ ខែមិថុនា នោះអាហ្សង់ទីនក៏នឹងអាចឈរនៅលេខ ២ បន្ទាប់ពីប្រទេសកូឡុំប៊ី ផងដែរ។
គ្រូបង្វឹកជម្រើសជាតិអាហ្សង់ទីនលោក Lionel Scaloni បាននិយាយពីការប្រកួតជាមួយក្រុមកាតាថា៖ «យើងត្រូវតែឈ្នះកាតា បើមិនដូច្នេះទេ យើងនឹងគ្មានឱកាសលេងនៅវគ្គ ៨ ក្រុមចុងក្រោយនោះទេ ខណៈយើងនៅមានសំណាងដែលយើងនៅមានជីវិតនៅក្នុងការប្រកួតនេះនៅឡើយ»។
លោក Scaloni បានសរសើរចំពោះអ្នកចាំអាហ្សង់ទីនដែលបានជួយសង្គ្រោះអាហ្សង់ទីនយ៉ាងល្អដោយនិយាយថា៖ «យើងទុកចិត្តលើកីឡាករ Franco។ គាត់ជាអ្នកចាំទីដ៏ឆ្នើមរបស់យើងព្រោះគាត់បានសង្គ្រោះបាល់ពិន័យ ១១ ម៉ែត្រ និងធ្វើឲ្យយើងនៅមានជីវិត ហើយខ្ញុំសប្បាយចិត្តដែលគាត់ធ្វើបានល្អបែបនេះ»។
ក្រុមជម្រើសជាតិដ៏ធំបំផុតមួយនៅទ្វីបអាមេរិកឡាទីននេះនឹងត្រូវបង្កើនសមត្ថភាពក្នុងការប្រកួតថែមទៀត ដើម្បីអាចបានឡើងចំណាត់ថ្នាក់មួយកម្រិតទៀតក្រោយពីទម្រង់លេងរបស់ពួកគេមិនបានល្អនៅពេលប្រកួតបើកឆាកដែលត្រូវបានកូឡុំប៊ីលត់យ៉ាងចាស់ដៃក្នុងលទ្ធផល ២-០ ធ្វើឲ្យខ្សែប្រយុទ្ធ Messi ចុកឈាមយ៉ាងខ្លាំងកាលពីថ្ងៃសៅរ៍សប្ដាហ៍មុន។
កីឡាករ Messi ដែលលេងនៅក្លិប Barcelona រូបនេះគឺជាអ្នកពូកែស៊ុតបាល់ free-kick ចូលទីយ៉ាងល្អក្នុងការប្រកួតមួយចំនួនកន្លងមកនេះ ប៉ុន្តែនៅក្នុងការប្រកួតលើកនេះខ្សែប្រយុទ្ធរូបនេះមិនអាចធ្វើបានដោយជោគជ័យទេនៅពេលស៊ុតបាល់ free-kick នៅចុងតង់ទី ១ នៃការប្រកួតនេះ។
នៅថ្ងៃទី ២៤ ខែមិថុនាសប្ដាហ៍ក្រោយនេះអាហ្សង់ទីនត្រូវប៉ះនឹងកាតា ខណៈកូឡុំប៊ី ត្រូវប៉ះប៉ារ៉ាហ្គាយសម្រាប់ពូល B៕ SN
