.jpg)
Mkhitaryan (ឆ្វេង) បណ្ដើរបាល់ក្នុងការប្រកួត Europa League កន្លងមក។ រូបថត AFP
ក្រុងឡុងដ៍ៈ ខ្សែបម្រើសញ្ជាតិអាមេនី Henrikh Mkhitaryan (Micki) របស់ក្លិបកាំភ្លើងធំ Arsenal នឹងមិនបានលេងក្នុងវគ្គផ្ដាច់ព្រ័ត្រក្របខ័ណ្ឌ Europa League ក្នុងការប្រកួតជាមួយក្រុមតោខៀវ Chelsea នៅទីក្រុងបាគូ ប្រទេសអាស៊ែបៃហ្សង់ទេដោយសារការព្រួយបារម្ភពីសុវត្ថិភាពរបស់គាត់។
សុខុមាលភាពរបស់ខ្សែបម្រើរូបនេះគឺសំខាន់ណាស់សម្រាប់ក្រុមកាំភ្លើងធំដោយសារជម្លោះនយោបាយតឹងតែងរវាងប្រទេសអាមេនី និងប្រទេសអាស៊ែបៃហ្សង់ដែលទទួលរៀបចំការប្រកួតវគ្គផ្ដាច់ព្រ័ត្រនេះ។
ក្លិបដែលលេងនៅក្របខ័ណ្ឌ Premier League នេះបានសម្រេចចិត្តមិនឲ្យកីឡាករ Micki ធ្វើដំណើរជាមួយមិត្តរួមក្រុមរបស់លោក Unai Emery ជាគ្រូបង្វឹកក្លិប Arsenal ទៅចូលរួមការប្រកួតចុងក្រោយដែលនឹងប្រព្រឹត្តទៅនៅថ្ងៃពុធសប្ដាហ៍ក្រោយនេះទេ។
សេចក្ដីថ្លែងការណ៍របស់ក្លិបនេះបានប្រកាសពីថ្ងៃអង្គារថា៖ «យើងមានការខកចិត្តយ៉ាងខ្លាំងដែលត្រូវប្រកាសថា កីឡាករ Henrikh Mkhitaryan នឹងមិនបានធ្វើដំណើរជាមួយមិត្តរួមក្រុមសម្រាប់វគ្គផ្ដាច់ព្រ័ត្រក្នុងក្របខ័ណ្ឌ UEFA Europa League ដែលនឹងត្រូវប៉ះជាមួយក្រុម Chelsea ខាងមុខនេះ»។
សេចក្ដីថ្លែងការណ៍នេះបានបន្ថែមថា៖ «យើងបានរិះរកគ្រប់ជម្រើសទាំងអស់ដើម្បីឲ្យ Micki អាចរួមដំណើរជាមួយក្រុមយើងដែរ ប៉ុន្តែក្រោយពីពិភាក្សាជាមួយគ្រួសារគាត់ហើយ យើងបានសម្រេចរួមគ្នាថា គាត់នឹងមិនបានធ្វើដំណើរជាមួយក្រុមយើងនោះទេ»។
ឯកអគ្គរដ្ឋទូតអាស៊ែបៃហ្សង់ប្រចាំចក្រភពអង់គ្លេសលោក Tahir Taghizadeh បានបញ្ជាក់ជារឿយៗថា កីឡាកររូបនេះនឹងមិនរងការគំរាមហិង្សាណាមួយទេ ប៉ុន្តែគេបានរាយការណ៍ថា Micki មិនជឿថា គាត់នឹងមានសុវត្ថិភាពនៅលើទីលានប្រកួតនោះទេ។
Micki បាននិយាយតាមប្រព័ន្ធ Tweeter ថា៖ «ដោយពិចារណាគ្រប់ជម្រើស យើងត្រូវចាត់វិធានការហ្មត់ចត់ដោយមិនអនុញ្ញាតឲ្យខ្ញុំធ្វើដំណើរជាមួយមិត្តរួមក្រុមទៅលេងនៅវគ្គផ្ដាច់ព្រ័ត្រក្របខ័ណ្ឌ UEL ដែលត្រូវប្រកួតជាមួយក្រុម Chelsea លើកនេះទេ»។
ខ្សែបម្រើរូបនេះបានបន្ថែមថា៖ «វាជាការប្រកួតដ៏កម្រមួយសម្រាប់យើងក្នុងនាមជាកីឡាករនោះ ហើយខ្ញុំទទួលស្គាល់ថា វាធ្វើឲ្យខ្ញុំសោកស្ដាយណាស់ដែលមិនបានចូលរួមការប្រកួតនេះ ប៉ុន្តែខ្ញុំនឹងរង់ចាំអបអរលទ្ធផលជោគជ័យដែលក្រុមខ្ញុំនឹងនាំមកកាន់ទឹកដីរបស់យើង»។
គណៈគ្រប់គ្រងបាល់ទាត់អឺរ៉ុប EUFA បាននិយាយដដែលៗថា ពួកគេបានរៀបចំវិធានការគ្រប់បែបយ៉ាងហើយដើម្បីធានាសុវត្ថិភាពរបស់ Mkhitaryan នៅក្នុងទីក្រុងបាគូ។
សេចក្ដីថ្លែងការណ៍របស់ UEFA បាននិយាយថា៖ «ដោយសហការជាមួយក្រុម Arsenal សមាគម UEFA បានខិតខំ និងទទួលបានការធានាសុវត្ថិភាពដល់កីឡាកររូបនេះពីក្រុមមន្ត្រីអាជ្ញាធរសំខាន់ៗបំផុតនៅក្នុងប្រទេសអាស៊ែបៃហ្សង់»។
ទោះជាសមាគម UEFA និងមន្ត្រីអាជ្ញាធរប្រទេសអាស៊ែបៃហ្សង់បានបង្កើតផែនការសុវត្ថិភាពហ្មត់ចត់សម្រាប់ក្លិប Arsenal ក៏ដោយ ប៉ុន្តែសមាគម UEFA នៅតែគោរពការសម្រេចចិត្តផ្ទាល់ខ្លួនដែលមិនអនុញ្ញាតឲ្យកីឡាកររូបនេះធ្វើដំណើរទៅប្រកួតនៅប្រទេសនេះ។
Mkhitaryan បានចូលរួមការប្រកួត ១១ លើកសម្រាប់រដូវកាល Europa League ឆ្នាំនេះ ហើយការអវត្តមានរបស់គាត់លើកនេះគឺជាឧបសគ្គធំមួយសម្រាប់ក្រុមកាំភ្លើងធំដែលកំពុងស្វែងរកជ័យជម្នះដើម្បីមានឱកាសបានលេងក្របខ័ណ្ឌ Champions League នៅរដូវកាលក្រោយ៕ SN
