ទីក្រុងមីឡាន៖ លោក Carlo Ancelotti ត្រូវបានក្លិប Napoli បណ្ដេញចេញពីតំណែង ទោះជាគាត់បានដឹកនាំក្រុមដែលលេងនៅក្របខ័ណ្ឌ Serie A មួយនេះ ឡើងទៅវគ្គ ១៦ ក្រុមចុងក្រោយក្របខ័ណ្ឌ Champions League ពីរាត្រីថ្ងៃពុធក៏ដោយ។
ក្លិប Napoli បានឈ្នះក្រុម Genk ៤-០ កាលពីរាត្រីថ្ងៃពុធ ដើម្បីបញ្ចប់ការបរាជ័យក្នុងការប្រកួត ៩ លើក នៅក្នុងការប្រកួតទាំងអស់ដោយទទួលបានចំណាត់ថ្នាក់ទី ២ នៅក្នុងពូល E តាមពីក្រោយក្រុម Liverpool។
ពាក្យចចាមអារ៉ាមបាននិយាយថា លោក Ancelotti គ្រោងនឹងចាកចេញពីកីឡដ្ឋាន Stadio San Paolo ក្រោយពីបានជួយដឹកនាំក្លិបនេះរយៈពេល ១៨ ខែ ហើយលោក Gennaro Gattuso អតីតគ្រូបង្វឹកក្លិប Milan ត្រូវបានដាក់ក្នុងបញ្ជីដែលត្រូវជំនួសរូបគាត់។
ក្រោយពីឈ្នះក្រុម Genk រួចហើយ លោក Ancelotti បានបញ្ជាក់ថា គាត់នឹងមិនទាន់ចុះចេញពីតំណែងគាត់ទេ ដោយអះអាងថា គាត់នឹងជជែកគ្នាជាមួយប្រធានក្លិបនេះ គឺលោក Aurelio De Laurentiis ពីអនាគតរបស់គាត់ជាមុនសិន។
ប៉ុន្តែរយៈពេលប៉ុន្មានម៉ោងក្រោយមក ក្លិប Napoli បានប្រកាសពីការចាកចេញរបស់លោក Ancelotti នៅក្នុងរបាយការណ៍ខ្លីមួយដែលបង្ហោះនៅតាមប្រព័ន្ធផ្សព្វផ្សាយសង្គម។
របាយការណ៍នោះបាននិយាយថា៖ «ក្លិប Napoli បានសម្រេចចិត្តដកហូតតួនាទីជាអ្នកគ្រប់គ្រងបច្ចេកទេសនៃក្រុមជម្រើសដំបូងពីលោក Carlo Ancelotti»។
របាយការណ៍នេះបានបន្ថែមថា៖ «ទំនាក់ទំនងមិត្តភាព និងការគោរពគ្នារវាងក្រុមហ៊ុន ប្រធានក្លិប និងលោកAncelottiនៅតែមានជានិច្ច»។
និយាយនៅក្នុងសន្និសីទកាសែតក្រោយពីជ័យជម្នះទៅលើក្រុម Genk នោះ លោក Ancelotti បាននិយាយជុំវិញអនាគតរបស់គាត់ថា៖ «គិតត្រឹមថ្ងៃនេះ ខ្ញុំនៅតែជាគ្រូបង្វឹកនៅក្លិបនេះនៅឡើយ ហើយខ្ញុំសង្ឃឹមថា ខ្ញុំនឹងដឹកនាំបន្តទៀតសម្រាប់ការប្រកួតលើកក្រោយផងដែរ»។
គ្រូបង្វឹករូបនេះបាននិយាយបន្ថែមថា៖ «ខ្ញុំមិនមែនជាអ្នកសម្រេចចិត្ត និងវាយតម្លៃនោះទេ គឺមានតែប្រធានក្លិបនេះប៉ុណ្ណោះជាអ្នកសម្រេចថា តើយើងអាចបន្តទៅមុខទៀត ឬយ៉ាងណានោះ ហើយយើងមិនបានជជែកគ្នាច្រើននោះទេ»។
លោក Ancelotti បានបន្ថែមថា៖ «ការពិតគឺថា ខ្ញុំនៅតែមានគ្រោះថ្នាក់នៅឡើយ ហើយវាជាផ្នែកមួយនៃពិភពលោកនេះ។ ក្រុមនេះដូចអ្នកបានសរសេរជាច្រើន ហើយគឺថាមានទម្រង់លេងអវិជ្ជមាននៅក្នុងការប្រកួតលីកនេះ»។
លោក Ancelotti ដែលជាអ្នកដឹកនាំឲ្យឈ្នះពានរង្វាន់ Champions League ៣ លើកនោះ ឥឡូវនេះត្រូវបានបណ្ដេញចេញពីក្លិបចំនួន ៣ លើកហើយ ដោយ ២ លើកមុននោះត្រូវបានបណ្ដេញពីក្លិប Bayern Munich និងក្រុម Real Madrid។
បុរសវ័យ ៦០ ឆ្នាំរូបនេះ ចង់វិលត្រឡប់ទៅក្របខ័ណ្ឌ Premier League ជាទីដែលគាត់បានដឹកនាំឲ្យក្លិប Chelsea លើកពានរង្វាន់នេះនៅឆ្នាំ ២០០៩-១០។
ក្លិប Napoli បានបញ្ចប់ត្រឹមចំណាត់ថ្នាក់ទី ២ នៅក្របខ័ណ្ឌអ៊ីតាលី Serie A កាលពីរដូវកាលមុនដោយតាមពីក្រោយ ១១ ពិន្ទុ នៃក្រុមម្ចាស់ជើងឯក Jeventus ប៉ុន្តែនៅរដូវកាលនេះ ពួកគេមានចំណាត់ថ្នាក់ទី ៧ ក្រោយមានទម្រង់លេងមិនល្អជាបន្តបន្ទាប់៕ AFP/SN