.jpg)
Neymar ក្នុងពេលហ្វឹកហាត់នៅប្រទេសប្រេស៊ីលថ្មីៗនេះ។ រូប AFP
ក្រុងរីយោៈ ខ្សែប្រយុទ្ធក្រុមជម្រើសជាតិប្រេស៊ីល និងក្លិបបារាំង PSG បានបដិសេធកាលពីថ្ងៃអាទិត្យចំពោះការចោទប្រកាន់ថា គាត់បានចាប់រំលោភស្ត្រីម្នាក់នៅសណ្ឋាគារមួយកន្លែងនៅទីក្រុងប៉ារីស ខណៈឪពុករបស់គាត់អះអាងថា គាត់គឺជាជនរងគ្រោះដោយការគំរាមទារប្រាក់។
តាមពាក្យបណ្ដឹងដែលគេបានដាក់ទៅប៉ូលិសក្រុងសៅប៉ូឡូ និងរាយការណ៍ដោយគេហទំព័រ UOL និង GloboEsporte បានឲ្យដឹងថា កីឡាករបាល់ទាត់ដែលមានតម្លៃខ្លួនថ្លៃបំផុតក្នុងពិភពលោកនេះបានរងការចោទប្រកាន់ថា «បានប្រើអំពើហិង្សាដើម្បីរួមភេទជាមួយជនរងគ្រោះដោយគ្មានការយល់ព្រមពីភាគីនារី»។
កីឡាករ Neymar បាននិយាយក្នុងវីដេអូរយៈពេល ៧ នាទីដែលបង្ហោះនៅលើប្រព័ន្ធ Instagram ថា៖ «ខ្ញុំត្រូវបានគេចោទថា បានចាប់រំលោភដែលនេះជាពាក្យធ្ងន់ និងខ្លាំងបំផុត ប៉ុន្តែនោះគឺជាអ្វីដែលបានកើតឡើងរួចទៅហើយ»។
កីឡាករឆ្នើមរូបនេះបានបន្តថា៖ «វាធ្វើឲ្យខ្ញុំភ្ញាក់ផ្អើលខ្លាំងណាស់ ហើយវាពិតជារឿងអាក្រក់ និងសោកស្ដាយបំផុតមួយព្រោះអ្នកដែលស្គាល់ខ្ញុំគេដឹងថា ខ្ញុំជាមនុស្សប្រភេទណាហើយព្រមទាំងដឹងថា ខ្ញុំនឹងមិនប្រព្រឹត្តអំពើបែបនេះទេ»។
កីឡាករ Neymar អាយុ ២៧ ឆ្នាំបានបង្ហាញពីអ្វីដែលគាត់បាននិយាយថា គឺជាសារដ៏វែងអន្លាយនៅតាមប្រព័ន្ធ WhatsApp ជាមួយស្ត្រីនោះរួមទាំងរូបថតអាក្រាតល្វែងលើរបស់ស្ត្រីនោះនៅលើគ្រែផងដែរ។
គាត់បានបន្ថែមថា៖ «រូបទាំងអស់នេះគឺបង្ហាញពីពេលវេលាស្ថិតជាមួយគ្នា ប៉ុន្តែវាចាំបាច់ត្រូវបង្ហាញឲ្យគេឃើញជាសាធារណៈដើម្បីបញ្ជាក់ថា វាពិតជាគ្មានអ្វីគួរកើតឡើងនោះទេ»។
សូមរំឭកថា ស្ត្រីមិនស្គាល់អត្តសញ្ញាណម្នាក់រស់នៅប្រទេសប្រេស៊ីលត្រូវគេរាយការណ៍ថា បានជួបកីឡាករ Neymar តាមប្រព័ន្ធ Instagram ហើយបានសរសេរសារឆ្លើយឆ្លងគ្នា បន្ទាប់មកកីឡាករបាល់ទាត់រូបនេះបានណាត់ស្ត្រីនោះទៅជួបគាត់នៅទីក្រុងប៉ារីសកាលពីពាក់កណ្ដាលខែឧសភា។
តាមពាក្យបណ្ដឹងនោះបានសរសេរថាកីឡាករ Neymar បានទៅដល់សណ្ឋាគារទាំងស្ថានភាពស្រវឹងស្រា ហើយអ្នកទាំង ២ បានជជែកគ្នាលេងព្រមទាំងមានការឱបថើបគ្នាផងដែរ។
ខ្លឹមសារនៅក្នុងពាក្យបណ្ដឹងនេះបានបន្ថែមថា៖ «ប៉ុន្តែបន្ទាប់មកកីឡាកររូបនេះបានបញ្ចេញសកម្មភាពគឃ្លើន និងត្រេកត្រអាលដោយប្រើអំពើហិង្សាចាប់បង្ខំនារីរងគ្រោះរួមភេទដោយគ្មានការយល់ព្រមពីភាគីនារី»។
ប៉ុន្តែឪពុករបស់កីឡាករ Neymar គឺលោក Neymar Santos បានបដិសេធការចោទប្រកាន់នេះទាំងស្រុងដោយអះអាងថា៖ «នេះមិនមែនជាការពិតនោះទេ ព្រោះគាត់មិនដែលប្រព្រឹត្តអំពើឧក្រិដ្ឋណាមួយឡើយ ហើយក្នុងរឿងនេះកូនប្រុសរបស់ខ្ញុំគឺជាជនរងគ្រោះដោយការគំរាមទារប្រាក់»។
កីឡាករ Neymar ដែលត្រូវបានផ្ទេរមកពីក្លិប Barcelona ទៅឲ្យក្លិប PSG ក្នុងតម្លៃខ្លួនថ្លៃខ្ពស់បំផុតក្នុងពិភពលោករហូតដល់ចំនួន ២២២ លានអឺរ៉ូស្មើនឹង ២៤៨,៥ លានដុល្លារអាមេរិកនោះ បច្ចុប្បន្នកំពុងស្ថិតនៅប្រទេសប្រេស៊ីល ដើម្បីត្រៀមខ្លួនសម្រាប់ការប្រកួត Copa America ដែលនឹងរៀបចំធ្វើនៅប្រទេសនេះចាប់ពីថ្ងៃទី ១៤ ខែមិថុនាដល់ថ្ងៃទី ១៧ ខែកក្កដា៕ SN
