.jpg)
Neymar ហ្វឹកហាត់សម្រាប់ការប្រកួត Copa America។ រូបថត AFP
ទីក្រុងរីយ៉ូៈ ប្រព័ន្ធផ្សព្វផ្សាយប្រទេសប្រេស៊ីលបាននិយាយកាលពីចុងសប្ដាហ៍មកនេះថា តារាខ្សែប្រយុទ្ធ Neymar ត្រូវបានគេចោទថាបានចាប់រំលោភស្ត្រីម្នាក់នៅសណ្ឋាគារមួយកន្លែងនៅទីក្រុងប៉ារីសប្រទេសបារាំង ជាការចោទដែលឪពុករបស់ខ្សែប្រយុទ្ធរូបនេះបានចាត់ទុកថាមានបំណងបង្ខូចកេរ្តិ៍ឈ្មោះកូនរបស់គាត់។
យោងតាមពាក្យបណ្ដឹងរបស់ប៉ូលិសនៅទីក្រុងសៅប៉ូឡូ (Sao Paolo) ប្រទេសប្រេស៊ីលរាយការណ៍ដោយប្រព័ន្ធផ្សព្វផ្សាយប្រេស៊ីល UOL និងGloboEsports បានឲ្យដឹងថាតារាខ្សែប្រយុទ្ធក្លិប PSG រូបនេះត្រូវបានចោទពីបទ «ប្រើអំពើហិង្សារួមភេទជាមួយជនរងគ្រោះដោយគ្មានការយល់ព្រមពីភាគីស្ត្រី»។
ភ្នាក់ងារប៉ូលិសនៅទីក្រុងសៅប៉ូឡូមិនបានផ្ដល់ពាក្យបណ្ដឹងថតចម្លងដល់ភ្នាក់ងារ AFP ទេដោយគ្រាន់តែបញ្ជាក់ថា មានកីឡាករម្នាក់ត្រូវបានគេប្ដឹង ប៉ុន្តែមិនបានបញ្ជាក់លម្អិតពីខ្លឹមសារនៅក្នុងពាក្យបណ្ដឹងនោះទេ។
ស្ត្រីមិនស្គាល់អត្តសញ្ញាណម្នាក់រស់នៅប្រទេសប្រេស៊ីលត្រូវបានគេរាយការណ៍ថា បានជួបកីឡាករ Neymar តាមរយៈបណ្ដាញ Instagram ហើយក្រោយពីបានសរសេរសារឆ្លើយឆ្លងគ្នាបន្ទាប់មកកីឡាករបាល់ទាត់រូបនេះបានអញ្ជើញស្ត្រីនោះឲ្យទៅជួបគាត់នៅក្នុងទីក្រុងប៉ារីសនៅពាក់កណ្ដាលខែឧសភា។
តាមពាក្យបណ្ដឹងនោះបានសរសេរថា កីឡាករ Neymar បានទៅដល់សណ្ឋាគារទាំងស្ថានភាពស្រវឹងស្រា ហើយអ្នកទាំង ២ បានជជែកគ្នាលេងព្រមទាំងមានការឱបថើបគ្នាផងដែរ។
ពាក្យបណ្ដឹងនេះបានបន្ថែមថា៖ «ប៉ុន្តែបន្ទាប់មកកីឡាកររូបនេះបានបញ្ចេញសកម្មភាពត្រេកត្រអាល និងប្រើអំពើហិង្សាដើម្បីរួមភេទជាមួយជនរងគ្រោះដោយគ្មានការយល់ព្រមពីស្ត្រីរងគ្រោះ»។
ឪពុករបស់កីឡាករ Neymar គឺលោក Neymar Santos បានបដិសេធការចោទប្រកាន់នេះទាំងស្រុងនៅពេលផ្ដល់បទសម្ភាសជាមួយប្រព័ន្ធផ្សព្វផ្សាយប្រេស៊ីល Banderantes ដោយនិយាយថា៖ «នេះមិនមែនជាការពិតនោះទេព្រោះគាត់មិនដែលប្រព្រឹត្តអំពើឧក្រិដ្ឋណាមួយឡើយ។ យើងមានភ័ស្តុតាងទាំងអស់ ហើយយើងបានផ្ដល់វាទៅឲ្យក្រុមមេធាវីការពារក្ដីរួចហើយ»។
លោក Santos បានបញ្ជាក់ថាកូនប្រុសរបស់គាត់គឺជាអ្នករងគ្រោះដោយការបង្ខូចកេរ្តិ៍ឈ្មោះនេះ។
លោក Santos បានបន្ថែមថាកូនប្រុសរបស់គាត់ និងស្ត្រីម្នាក់នោះបានជួបគ្នាមែន ប៉ុន្តែក្រោយមកកីឡាករ Neymar មិនចង់ជួបនាងទៀតទេ ហើយតាំងពីនោះមកស្ត្រីម្នាក់នោះបានព្យាយាមគំរាមទារប្រាក់ពីកីឡាករ និងគ្រួសាររបស់គាត់។
ឪពុករបស់ Neymar បាននិយាយថា៖ «កូនប្រុសខ្ញុំអាចរងគ្រោះដោយការចោទប្រកាន់ជាច្រើន ប៉ុន្តែខ្ញុំស្គាល់គាត់ជាមនុស្សប្រភេទណា ហើយវាច្បាស់ណាស់ថា នេះគឺជាអន្ទាក់មួយ»។
ឪពុករបស់កីឡាកររូបនេះបានបន្ថែមថាគ្រួសាររបស់គាត់ត្រៀមនឹងចេញសារតាមប្រព័ន្ធ WhatsApp ដើម្បីបង្ហាញពីភាពស្អាតស្អំរបស់កីឡាករ Neymar។
កីឡាករ Neymar អាយុ ២៧ ឆ្នាំបច្ចុប្បន្នកំពុងស្ថិតនៅប្រទេសប្រេស៊ីលដើម្បីត្រៀមខ្លួនសម្រាប់ព្រឹត្តិការណ៍ Copa America ដែលនឹងធ្វើនៅប្រទេសនេះចាប់ពីថ្ងៃទី ១៤ ខែមិថុនាដល់ថ្ងៃទី ៧ ខែកក្កដា៕ SN
