ប្រេស៊ីលៈ អ្នកនាំពាក្យឲ្យកីឡាករ Neymar និយាយពីថ្ងៃអាទិត្យថា Neymar ត្រូវត្រឡប់ទៅកាន់ក្លិប Paris Saint-Germain (PSG) វិញនៅថ្ងៃចន្ទ ក្រោយពីមានការសង្ស័យថា រូបគេទាក់ទងជាមួយអតីតក្លិប Barcelona របស់រូបខ្លួនដែលបង្កឲ្យមានភាពចម្រូងចម្រាសពាក្យសម្ដីជាច្រើនថ្មីៗនេះ។
អ្នកនាំពាក្យរបស់កីឡាករ Neymar ប្រាប់ AFP ថា៖ «គាត់ត្រូវបង្ហាញខ្លួននៅក្លិបនេះនៅថ្ងៃស្អែក (ថ្ងៃចន្ទ) ប៉ុន្តែមិនបានបញ្ជាក់ច្បាស់ពីពេលវេលាដែល Neymar ត្រូវទៅដល់ទីក្រុងប៉ារីសប្រទេសបារាំងនោះទេ។
កីឡាករ Neymar និងក្លិប PSG មានជម្លោះពាក្យសម្ដីគ្នាក្រោយពីតារាបាល់ទាត់ប្រេស៊ីលរូបនេះមិនបានបង្ហាញខ្លួននៅក្នុងការហ្វឹកហាត់ជាលើកដំបូងនៅក្លិបនេះនៅដើមខែនេះ ជាហេតុធ្វើឲ្យក្លិប PSG ប្ដេជ្ញាចិត្តថានឹងចាត់ «វិធានការសមរម្យ» ចំពោះរូបគេ។
កីឡាករ Neymar បានទទូចថារូបគេបានទទួលការអនុញ្ញាតជាមុនពីក្លិប PSG ហើយក្នុងការបន្តស្ថិតនៅក្នុងប្រទេសប្រេស៊ីលដើម្បីស្វែងរកមូលនិធិជួយវិទ្យាស្ថាន Neymar Institute ។
កាលពីថ្ងៃសៅរ៍កីឡាករ Neymar អាយុ ២៧ ឆ្នាំបាននិយាយជាបន្តបន្ទាប់តាមបណ្ដាញសង្គមដែលបានធ្វើឲ្យប៉ះពាល់ដល់ទំនាក់ទំនងរវាងរូបគេ និងក្លិប PSG និងបានបង្កជាកំហឹងនៅតាមបណ្ដាញសង្គមផងដែរ។
នៅមុននេះមួយថ្ងៃកីឡាករ Neymar បានបង្ហោះវីដេអូរយៈពេល ១០ វិនាទីនិយាយពីខ្លួនឯងដោយពាក់អាវក្លិប Barcelona ជាមួយឪពុករបស់គាត់ និងបាននិយាយតាមព្រះគម្ពីរថា៖ «ប្រសិនបើគ្មានអាវុធណាមួយប្រឆាំងនឹងអ្នកទេ អ្នកនឹងរីកចម្រើន»។
កីឡាករ Neymar ចង់ចាកចេញពីក្លិបបច្ចុប្បន្នរបស់គាត់ដោយចង់វិលទៅកាន់ទ្រនំចាស់នៅក្លិប Barcelona វិញ ប៉ុន្តែកុងត្រាកំពុងស្វែងរកក្លិបដែលសមរម្យបំផុតដោយសារតម្លៃខ្លួនរបស់រូបគេមានតម្លៃ ២២២ លានអឺរ៉ូស្មើ ២៥២ លានដុល្លារអាមេរិកដែលក្លិប PSG បានចំណាយដើម្បីទិញរូបគេពីក្លិប Barcelona កាលពី ២ ឆ្នាំមុន។
ឱកាសរបស់ Neymar ក្នុងការវិលទៅក្លិប Barcelona វិញគឺកាន់តែលំបាកហើយដោយសារក្លិបនេះទើបតែបានបញ្ចប់ជាមួយក្លិប Atletico Madrid ដើម្បីទិញកីឡាករវ័យក្មេងសញ្ជាតិបារាំង Antoine Griezmann ក្នុងតម្លៃខ្លួន ១២០ លានអឺរ៉ូ។
ទន្ទឹមនេះដែរលោក Leonardo អ្នកគ្រប់គ្រងកីឡានៅក្លិប PSG និយាយថា «កីឡាករ Neymar អាចចាកចេញពីក្លិបនេះគ្រប់ពេលឲ្យតែមានសំណើសមរម្យពីក្លិបណាមួយដើម្បីទិញយករូបគាត់»។
ហើយពីថ្ងៃអាទិត្យឪពុក និងជាតំណាងរបស់ Neymar គឺលោក Neymar Santos បាននិយាយតាម Instagram ថាការលើកឡើងរបស់កូនប្រុសគាត់គឺគ្មានពាក់ព័ន្ធនឹងបរិបទនេះទេ។
ឪពុករបស់ Neymar បានសរសេរថា៖ «គ្មានពេលណាដែលគាត់មិនគោរពក្លិប PSG ឬក្រុមកីឡាករដែលបានលេងក្នុងការប្រកួតនៅឆ្នាំ ២០១៧ នោះទេព្រោះពួកគេមួយចំនួនគឺជាមិត្តរួមក្រុមនៅក្នុងក្លិបដ៏ធំបំផុតនៅប្រទេសបារាំងមួយនេះ»៕ SN