ភ្នំពេញ: ម្ចាស់ខ្សែក្រវាត់ពិភពលោកក្នុងប្រភេទទម្ងន់ផ្សេងៗគ្នា Martin “The Situ-Asian” Nguyen កំពុងតែស្រេកឃ្លានក្នុងការឈ្នះខ្សែក្រវាត់ពិភពលោករបស់ ONE ក្នុងទម្ងន់ ១ ផ្សេងទៀត នៅពេលដែលរូបគេត្រូវធ្វើដំណើរទៅកាន់ការប្រកួតក្នុងសង្វៀនដាក់ទ្រុងនៅថ្ងៃសៅរ៍ ចុងសប្តាហ៍នេះ។
កីឡាករកូនកាត់វៀតណាម-អូស្ត្រាលីរូបនេះ ដែលជាម្ចាស់ខ្សែក្រវាត់ក្នុងទម្ងន់ ៧០,៣ និង ៧៧,១ គីឡូក្រាម នឹងត្រូវធ្វើដំណើរទៅជួបម្ចាស់ខ្សែក្រវាត់នៅក្នុងទម្ងន់ ៦៥,៨ គីឡូក្រាម Bibiano “The Flash” Fernandes របស់ប្រេស៊ីល ក្នុងព្រឹត្តិការណ៍ប្រកួតក្បាច់គុនចម្រុះ (MMA) ONE: Iron Will នៅលើសង្វៀន Impact Arena ក្នុងទីក្រុងបាងកក នៅចុងសប្តាហ៍នេះ។
តារាឆ្នើមទាំង ២ កំពុងតែត្រៀមលក្ខណៈរួចរាល់ក្នុងការផ្តល់ការប្រកួតដ៏រំភើបមួយជាគូឯកក្នុងសង្វៀនដាក់ទ្រុងនៅរាត្រីនោះ ខណៈដែល Nguyen មានកំណត់ត្រាឈ្នះជាអាជីពរបស់គេចំនួន ១០ លើក និងចាញ់ ១ លើក។ ប៉ុន្តែ Fernandes គឺជាកីឡាករពោរពេញដោយបទពិសោធច្រើនជាង ក្រោយពីរូបគេមានកំណត់ត្រាឈ្នះដល់ទៅ ២១ លើក និងចាញ់ ៣ លើក ក្នុងអាជីពដ៏ជោគជ័យរបស់គេ ប៉ុន្តែ ការប្រកួតជាលើកចុងក្រោយរបស់គេបានកើតឡើងចាប់តាំងពីខែដើមខែសីហា ឆ្នាំ ២០១៧ មកម្ល៉េះ។
ដោយឡែក Nguyen វ័យ ២៩ ឆ្នាំ ទើបតែបានផ្តួលកីឡាករហ្វីលីពីន Eduard Folayang ក្នុងព្រឹត្តិការណ៍ ONE: Legends of the World កាលពីវិច្ឆិកា ឆ្នាំមុន ដើម្បីឈ្នះខ្សែក្រវាត់ទី ២ របស់គេក្នុងទម្ងន់ ៧៧,១ គីឡូក្រាម។
សម្រាប់ការប្រកួតនៅថ្ងៃសៅរ៍នេះ កីឡាករ Nguyen បានឲ្យដឹងថា៖ «ខ្ញុំមានអារម្មណ៍ថា ពិតជាមានកិត្តិយសណាស់ក្នុងការទទួលបានឱកាសដើម្បីធ្វើអ្វីដែលខ្ញុំអាចធ្វើបានក្នុងសង្វៀនដាក់ទ្រុង ពីមុខអ្នកគាំទ្ររាប់លាននាក់ ដែលជឿជាក់ និងគាំទ្រខ្ញុំ»។
កីឡាកររូបនេះបានសន្យាថា៖ «Bibiano Fernandes ជាកីឡាករដ៏អស្ចារ្យម្នាក់ក្នុងក្បាច់គុនចម្រុះ និងជាកីឡាករដ៏ឆ្នើមបំផុតម្នាក់ក្នុងទម្ងន់របស់គេ។ ប៉ុន្តែ រាល់ការប្រកួតរបស់ខ្ញុំទាំងអស់បានបញ្ចប់ដោយមិនឈានដល់ការផ្តល់ពិន្ទុកាត់សេចក្តី ហើយខ្ញុំមានគម្រោងក្នុងការបញ្ចប់ការប្រកួតនេះឲ្យបានឆាប់ដែរ។ ខ្ញុំពិតជាចង់បញ្ចប់ឲ្យបានរហ័ស»។
ស្របពេលជាមួយគ្នានេះ កីឡាករចាស់វស្សា Fernandes វ័យ ៣៧ ឆ្នាំ បានឲ្យដឹងថា៖ «ខ្ញុំមិនត្រឹមតែប្រកួតសម្រាប់តែខ្សែក្រវាត់ឡើយ ប៉ុន្តែ ចំពោះខ្ញុំ វាជាការប្រជែងនៅពេលនេះ។ ខ្ញុំចង់ប្រជែងជាមួយខ្ញុំផ្ទាល់ និងរង់ចាំមើលថា ទេពកោសល្យរបស់ខ្ញុំឈានដល់កម្រិតណា។ Martin Nguyen ជាកីឡាករដ៏អស្ចារ្យម្នាក់ និងពោរពេញដោយថាមពល»។
កីឡាករប្រេស៊ីលរូបនេះបានបន្ថែមទៀតថា៖ «នៅពេលដែលរូបគេបានឈ្នះខ្សែក្រវាត់ក្នុងទម្ងន់ ៧០,៣ គីឡូក្រាម និង ៧៧,១ គីឡូក្រាម វាពិតជារឿងដ៏គួរឲ្យចាប់អារម្មណ៍។ ប៉ុន្តែ នេះជាទម្ងន់របស់ខ្ញុំ។ រូបគេកំពុងតែឆ្លងដែនមកកាន់ដែនដីរបស់ខ្ញុំ ហើយខ្ញុំនឹងការពារវាឲ្យបាន។ ការប្រកួតនេះពិតជាលើកទឹកចិត្តឲ្យខ្ញុំក្លាយជាកីឡាករដ៏ឆ្នើមបំផុតម្នាក់»។
ក្រៅពីនេះ នៅមានការប្រកួតដ៏គួរឲ្យទាក់ទាញចំនួន ១០ គូផ្សេងទៀត ដែលនឹងត្រូវរៀបចំឡើងនៅរាត្រីដដែលនោះ ស្របពេលដែលតារាឆ្នើមម្ចាស់ស្រុក Shannon Wiratchai និងកីឡាការិនី Rika Ishige ក៏ដូចជា Dejdamrong Sor Amnuaysirichoke សុទ្ធសឹងនឹងត្រូវធ្វើការបង្ហាញខ្លួន៕