.jpg)
NOCC បើកវគ្គបណ្តុះបណ្តាលកាលពីព្រឹកថ្ងៃពុធ។ ស្រេង ម៉េងស្រ៊ុន
ភ្នំពេញ: វគ្គបណ្តុះបណ្តាលជំនាញមន្ត្រីកីឡាកម្រិតខ្ពស់ស្តីពីផែនការយុទ្ធសាស្ត្រអភិវឌ្ឍន៍កីឡាកម្រិតខ្ពស់ ដែលរៀបចំឡើងដោយគណៈកម្មាធិការជាតិអូឡាំពិកកម្ពុជា (NOCC) ក្រោមការឧបត្ថម្ភគាំទ្រថវិកាពីរដ្ឋាភិបាលនៃប្រទេសអាល្លឺម៉ង់ បានបើកវគ្គរយៈពេលវែងមួយ នៅទីស្នាក់ការ NOCC កាលពីព្រឹកថ្ងៃម្សិលមិញ។
វគ្គបណ្តុះបណ្តាលនេះត្រូវបានផ្តល់ជូនថ្នាក់ដឹកនាំកីឡា និងគ្រូបង្វឹក មកសហព័ន្ធកីឡាជាតិចំនួន ៣៩ និងមកពីស្ថាប័នកីឡាជាតិជាច្រើនទៀត មានវិទ្យាស្ថានកីឡា មន្ត្រីត្រៀមព្រឹត្តិការណ៍ស៊ីហ្គេមឆ្នាំ ២០២៣ និងគរុសិស្សកីឡាផងដែរ។
លោកវេជ្ជបណ្ឌិត ស្តើង ជា មន្ត្រីអនុវត្តគម្រោងបណ្តុះបណ្តាលនៃ NOCC បានថ្លែងនៅក្នុងពិធីបើកសិក្សាថ្ងៃដំបូងម្សិលមិញថា៖ «នេះគឺជាគម្រោងវគ្គបណ្តុះបណា្តលកម្រិតធំមួយ មានសិក្ខាកាមច្រើនបំផុត ដែលទទួលបានការជួយពីរដ្ឋាភិបាលនៃប្រទេសអាល្លឺម៉ង់»។
លោកបានប្រាប់បន្តឲ្យដឹងថា៖ «គម្រោងបណ្តុះបណ្តាលនេះត្រូវបានស្នើឡើងតាំងពីខែកញ្ញា ប៉ុន្តែការអនុម័តរបស់ម្ចាស់ជំនួយបានផ្តល់នៅខែ ១២ នេះ ខណៈដែលសកម្មភាពកីឡារបស់ NOCC នៅចុងឆ្នាំកំពុងរវល់ និងមមាញឹក ប៉ុន្តែយ៉ាងណា យើងត្រូវតែទទួលយក ពីព្រោះវាជាឱកាសមាសរបស់មន្ត្រីកីឡាកម្ពុជា ដែលមានអ្នកជំនាញមកផ្តល់ចំណេះដឹងជូនក្នុងការពង្រីកសមត្ថភាពធនធានមនុស្សផ្នែកជំនាញ គ្រប់គ្រង និងដឹកនាំកីឡាដែលមានបទពិសោធខ្ពស់»។
លោក ឯម ហៀង ប្រធាននាយកដ្ឋានរដ្ឋបាល និងជាប្រធានគ្រប់គ្រងវគ្គ បានឲ្យដឹងថា៖ «វគ្គបណ្តុះបណ្តាលនេះមានលក្ខណពិសេស ដោយមានអ្នកជំនាញផ្នែកកីឡាមកពីប្រទេសអាល្លឺម៉ង់»។
លោកបានបន្ថែមទៀតថា៖ «វគ្គសិក្សានេះមានរយៈពេលវែង ពោលគឺចាប់ពីថ្ងៃទី ១២ រហូតដល់ថ្ងៃទី ៣១ ខែធ្នូ ឆ្នាំ ២០១៨ និងមានសិក្ខាកាមជាថ្នាក់ដឹកនាំ និងគ្រូបង្វឹកមកពីសហព័ន្ធជាតិសរុប ៣៩ នាក់»។
លោកបានបន្ថែមទៀតថា៖ «សហព័ន្ធនីមួយៗបានបញ្ជូនមន្ត្រីរបស់ខ្លួនពី ៤ ទៅ ៦ នាក់មកសិក្សា។ ក្រៅពីនេះមានគរុសិស្សមកពីសាលាកីឡាចំនួន ៤០ នាក់ មន្ត្រីមកពីវិទ្យាស្ថានកីឡាជាតិចំនួន ១៥ នាក់ និងមន្ត្រីត្រៀមស៊ីហ្គេមដែលសរុបទៅជាង ១០០ នាក់»។
លោកវ៉ាត់ ចំរើន រដ្ឋលេខា-ធិការក្រសួងទេសចរណ៍ និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានប្រាប់ភ្នំពេញ ប៉ុស្តិ៍ ថា៖ «វគ្គបណ្តុះបណ្តាលមន្ត្រីកីឡាកម្រិតខ្ពស់ក្រោមការឧបត្ថម្ភពីប្រទេសអាល្លឺម៉ង់ មានសារៈសំខាន់ខ្លាំងណាស់ ពីព្រោះជាការទទួលបាននូវចំណេះដឹងសម្រាប់ការអភិវឌ្ឍវិស័យកីឡាគ្រប់ផ្នែក»។
លោក វ៉ាត់ ចំរើន បានប្រាប់បន្តទៀតថា៖ «មន្ត្រីដែលបានឆ្លងវគ្គកីឡាកម្រិតខ្ពស់នេះ នឹងទទួលបាននូវលិខិតបញ្ជាក់ទទួលស្គាល់សមត្ថភាពជាលក្ខណៈអន្តរជាតិ ដែលយកទៅបង្ហាញសម្រាប់ការងារកីឡាលំដាប់អន្តរជាតិបាន»។
អគ្គលេខាធិការរូបនេះបានប្រាប់បន្ថែមថា៖ «រឿងដែលសំខាន់មួយទៀតគឺថា មន្ត្រីដែលទទួលបាននូវលិខិតបញ្ជាក់ទទួលស្គាល់សមត្ថភាពក្នុងវគ្គនេះ គឺជាមន្ត្រីដែលមានលទ្ធភាពចូលបម្រើការក្នុងព្រឹត្តិការណ៍កីឡាស៊ីហ្គេមលើកទី ៣២ ដែលព្រះរាជាណាចក្រកម្ពុជានឹងធ្វើជាម្ចាស់ផ្ទះ»៕
