.jpg)
ក្រុមបាល់ទះអង្គុយជនពិការកម្ពុជាបានធ្វើការប្តេជ្ញាចិត្តជាមួយលោក យី វាសនា កាលពីថ្ងៃពុធ។ ឈន ណន
ភ្នំពេញៈ ថ្នាក់ដឹកនាំគណៈកម្មាធិការជាតិប៉ារ៉ាឡាំពិកកម្ពុជា ហៅកាត់ថា NPCC បានលើកទឹកចិត្ត និងជំរុញឲ្យក្រុមបាល់ទះជនពិការកម្ពុជា ខំប្រឹងប្រែងដណ្តើមយកឲ្យបាននូវកិត្តិយសជូនជាតិ ខណៈប្រតិភូបាល់ទះអង្គុយមួយក្រុមនេះត្រូវចាកចេញពីមាតុប្រទេសនៅថ្ងៃសុក្រនេះ ដើម្បីទៅចូលរួមការប្រកួតជើងឯកបាល់ទះអង្គុយតំបន់អាស៊ីអូសេអានីនៅទីក្រុងបាងកក ប្រទេសថៃរហូតដល់ថ្ងៃទី ១៦ ខែមិថុនា។
ការចេញទៅប្រកួតលើកនេះ NPCC ចង់រកឃើញនូវលទ្ធផលដ៏ប្រសើរមួយ ដើម្បីទទួលបាន Ranking នៅក្នុងតំបន់ពិសេសការឈ្នះបានកៅអី (Qualified) ទៅចូលរួមការប្រកួតជើងឯកពិភពលោក និងការប្រកួតប៉ារ៉ាឡាំពិកហ្គេម ឆ្នាំ២០២០ (Paralympic Game 2020) នៅទីក្រុងតូក្យូ ប្រទេសជប៉ុនដោយពេញសិទ្ធិ បន្ទាប់កម្ពុជាបានបរាជ័យក្នុងការស្វែងរកឱកាសនេះក្នុងការប្រកួតនៅកូរ៉េកាលពីឆ្នាំ ២០១៧។
លោក យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជាបានថ្លែងនៅក្នុងពិធីសំណេះសំណាលជាមួយប្រតិភូ គ្រូបង្វឹក គ្រូជំនួយ និងក្រុមបាល់ទះអង្គុយកម្ពុជាដែលត្រូវចេញប្រកួតនៅថៃកាលពីថ្ងៃពុធថា៖ «យើងធ្លាប់បានទៅចូលរួមការប្រកួតបែបនេះនៅកូរ៉េម្តងហើយ ប៉ុន្តែយើងទទួលបានលទ្ធផលអត់ល្អទេ ហើយឥឡូវនេះយើងត្រូវទៅប្រកួតម្តងទៀត ព្រោះយើងចង់ឈ្នះបានកៅអីទៅចូលរួមការប្រកួតប៉ារ៉ាឡាំពិកនៅតូក្យូ ដោយពេញសិទ្ធិ»។
ជាមួយគ្នានេះ NPCC ក៏មានការផ្លាស់ប្តូរកីឡាករវ័យក្មេងមានសក្តានុពលមួយចំនួននៅក្នុងចំណោមអត្តពលិកទាំង ១០ នាក់ដែលត្រូវចេញទៅប្រកួតលើកនេះផងដែរក្នុងនោះមានកីឡាករ អ៊ូ ផល្លា, កៅ ហឿន, អ៊ីង ភីរៀម, សាំង វាសនា, ម៉ន យ៉ារ៉ាញ់, តង់ រ៉ាវី, ញូញ សុខ, ពូន ឌីណា, យ៉ុម ក្រឹម និង អឿន ណុត ក្រោមការដឹកនាំរបស់លោក ប៉ឹង សារ៉េត ជាប្រធានប្រតិភូ លោក ស្រៀ ចន្ថា ជាអនុប្រធានប្រតិភូលោក យឹម វណ្ណា ជាគ្រូបង្វឹក និងលោក យ៉ុង សុខុម ជាគ្រូជំនួយ ហើយក្រសួងអប់រំ យុវជន និងកីឡាក៏បានចេញលិខិតឧទ្ទេសនាម និងប្រាក់ហោប៉ាវក្នុងម្នាក់ៗ ២០០ ដុល្លារដែរ។
លោក យី វាសនា បានបន្ថែមថា៖ «ខ្ញុំបានព្យាយាមជាមួយកីឡាជនពិការនេះ យូរណាស់មកហើយ ប៉ុន្តែយើងនៅមិនទាន់រកបានកៅអីសម្រាប់ទៅប្រកួតជើងឯកពិភពលោក ពិសេសប៉ារ៉ាឡាំពិកដោយពេញសិទិ្ធនោះទេ គឺយើងបានទៅចូលរួម តែតាមរយៈសិទ្ធិអនុគ្រោះប៉ុណ្ណោះ ហេតុនេះការចេញទៅប្រកួតលើកនេះសូមឲ្យក្រុមបាល់ទះអង្គុយរបស់យើង ខិតខំប្រឹងប្រែងលេងឲ្យអស់ពីសមត្ថភាព ពិសេសត្រូវស្តាប់តាមការប្រធានក្រុមដោយត្រូវយកចិត្តទុកដាក់ ប្តេជ្ញាចិត្ត និងមានសាមគ្គីក្នុងក្រុម ដើម្បីដណ្តើមយកកៅអីទៅប្រកួតជើងឯកពិភពលោក និងកៅអីទៅប៉ារ៉ាឡាំពិក»។
លោកបានបញ្ជាក់ថា៖ «យើងត្រូវតែក្លាហានឡើង ដើម្បីដណ្តើមយកកិត្តិយសមកស្រុកយើងវិញ ដោយខ្ញុំសង្ឃឹមថាបងប្អូននឹងដណ្តើមបានកៅអី និងមេដាយមកជូនប្រទេសជាតិនៅក្នុងការប្រកួតជើងឯកបាល់ទះអង្គុយតំបន់អាស៊ីអូសេអានីឲ្យបាន។ មាស ប្រាក់ សំរឹទ្ធ យើងមិនទាន់ដឹងទេ ប៉ុន្តែសំខាន់ត្រូវខំប្រឹងដោយត្រូវបញ្ចេញនូវអ្វីដែលយើងខំប្រឹងហ្វឹកហាត់ទាំងលំបាកអស់រយៈពេលចូល ៤ ខែមកនេះ ដើម្បីប្រជែងយកមេដាយមកជូនជាតិ»។
បើតាមលោក យី វាសនា បានឲ្យដឹងថាក្រុមបាល់ទះអង្គុយកម្ពុជានឹងប្រកួតបើកឆាកជាមួយក្រុមអ៊ីរ៉ង់នៅថ្ងៃទី ១០ រួចបន្តទៅជួបក្រុមកាហ្សាក់ស្ថាននៅថ្ងៃទី ១១ ហើយនៅថ្ងៃទី ១២ កម្ពុជា ត្រូវប៉ះក្រុមជប៉ុន និងចិនមុនទៅជួបក្រុមកូរ៉េនៅថ្ងៃទី ១៣ និងក្រុមម្ចាស់ផ្ទះ ថៃ នៅថ្ងៃទី ១៤ ខែមិថុនា។
ចំណែកលោក យឹម វណ្ណា ជាគ្រូបង្វឹកបាននិយាយថា៖ «យោងតាមបទពិសោធកាលចេញទៅប្រកួតនៅកូរ៉េគឺយើងបានផ្លាស់ប្តូរបច្ចេកទេសទាំងអស់ដោយយើងបានបង្កើនទៅលើកម្លាំង កាយ តាក់ទិក និងបច្ចេកទេសល្អប្រសើរជាងមុន ហេតុនេះយើងនឹងប្រឹងប្រែងដណ្តើមយកកិត្តិយសជូនជាតិឲ្យបាន»៕
