ក្រុងឡូសអេនជឺលេស: អ្នកប្រយុទ្ធក្បាច់គុនចម្រុះ Khabib Nurmagomedov បានបើកចូលទំព័ររបស់កីឡាករ Conor McGregor និងបានបញ្ជាក់ពីបំណងក្នុងការប្រកួតជាមួយនឹងកីឡាករប្រដាល់មិនស្គាល់ចាញ់ Floyd Mayweather។
ការប្រជែងរបស់ Nurmagomedov បានកើតឡើងក្នុងវីដេអូមួយដែលត្រូវបានបង្ហោះនៅលើបណ្តាញសង្គម Instagram ដោយអ្នករៀបចំការប្រកួតរបស់ Mayweather គឺលោក Leonard Ellerbe ដែលបានបញ្ជាក់ថា លោកបានធ្វើដំណើរទៅជួបកីឡាកររបស់អង្គភាព UFC រូបនេះ ក្នុងកម្មវិធីប្រកួតមួយនៅប្រទេសរុស្ស៊ី។
ស្របពេលដែលលោក Ellerbe កំពុងតែឈរក្បែររូបគេក្នុងទឹកមុខញញឹម Nurmagomedov បានឲ្យដឹងថា៖ «តោះ Floyd យើងត្រូវតែប្រកួតគ្នាពេលនេះ។ អ្នកមានកំណត់ឈ្នះ ៥-០ ជាមួយនឹង ២៧-០។ យើងមានកីឡាករ ២ នាក់ដែលមិនធ្លាប់ចាញ់សោះ។ នៅលើភ្នំមួយ មិនអាចមានខ្លា ២ បានទេ។ ពិតណាស់ ខ្ញុំជាខ្លា ១ ក្បាលនោះ ពីព្រោះរូបគេមិនអាចផ្តួល McGregor បានឡើយ ប៉ុន្តែ ខ្ញុំផ្តួលរូបគេយ៉ាងងាយស្រួល។ តោះប្រកួតគ្នា»។
Nurmagomedov មិនបានបញ្ជាក់ថា រូបគេចង់ប្រកួតជាមួយនឹងកីឡាករ Mayweather ក្នុងកីឡាប្រដាល់ ឬក្នុងក្បាច់គុនចម្រុះរបស់ UFC ឡើយ។
McGregor រកបានចំណូលរាប់លានដុល្លារកាលពីឆ្នាំមុន តាមរយៈការឡើងប្រកួតជាមួយនឹង Mayweather ក្នុងកីឡាប្រដាល់។
Mayweather ហាក់ដូចជាមិនហ៊ានមើលស្រាលលើ McGregor ក្នុងការប្រកួតប៉ុន្មានទឹកដំបូងឡើយ នៅមុនពេលផ្តួលកីឡាករអៀរឡង់រូបនេះ ក្នុងទឹកទី ១០ ដើម្បីធ្វើឲ្យកំណត់ត្រាឈ្នះរបស់គេកើនដល់ ៥០ ទល់នឹងសូន្យ។
កាលពីចុងសប្តាហ៍មុន Nurmagomedov បានការពារខ្សែក្រវាត់ UFC ក្នុងទម្ងន់ ៧០ គីឡូក្រាមរបស់គេយ៉ាងជោគជ័យ តាមរយៈការក្លេឲ្យ McGregor ចុះចាញ់ក្នុងទឹកទី ៤។
បន្ទាប់មក រូបគេបានឈ្លោះជាមួយក្រុមរបស់ McGregor ដែលចំអកឲ្យគេ៕