ក្រុងញូវយ៉ក: តារាប្រដាល់ដ៏ឆ្នើមរបស់ហ្វីលីពីន Manny Pacquiao និងអតីតម្ចាស់ខ្សែក្រវាត់ពិភពលោកទម្ងន់ ៦៦,៧ គីឡូក្រាម Adrien Broner នឹងប្រកាសពីសេចក្តីលម្អិតនៅថ្ងៃចន្ទ សប្តាហ៍ក្រោយ នៅក្នុងទីក្រុងញូវយ៉ក អំពីការប្រកួតនាពេលខាងមុខរបស់ ពួកគេ ដែលត្រូវរំពឹងទុកថា នឹងកើតឡើងនៅខែមករា ឆ្នាំ ២០១៩ ក្នុងទីក្រុង Las Vegas។
Pacquiao កំពុងគ្រប់គ្រងខ្សែក្រវាត់ពិភពលោកក្នុងទម្ងន់ ៦៦,៧ គីឡូក្រាមពីស្ថាប័ន WBA ដែលទាបជាងម្ចាស់ខ្សែក្រវាត់ WBA មិនស្គាល់ចាញ់គឺ Keith Thurman ១ កម្រិត ក្រោយពីបានផ្តួលកីឡាករអាហ្សង់ទីន Lucas Matthysse កាលពីខែកក្កដា ក្នុងទីក្រុងគូឡាឡាំពួ តាមរយៈការយកឈ្នះដោយការផ្តួលដៃគូឲ្យសន្លប់ជាលើកទី ១ របស់គេ បើគិតចាប់តាំងពីឆ្នាំ ២០០៩ មក។
កីឡាករជំនាញដៃឆ្វេងរូបនេះ ដែលមានកំណត់ត្រាឈ្នះ ៦០ លើក ចាញ់ ៧ លើក និងស្មើ ២ លើក ក្នុងនោះផ្តួលដៃគូឲ្យសន្លប់ ៣៩ លើក ក្នុងអាជីពមួយដែលបានចាប់ផ្តើមក្នុងឆ្នាំ ១៩៩៥ នឹងឈានចូលវ័យ ៤០ ឆ្នាំនៅខែក្រោយ ស្របពេលកីឡាករអាមេរិក Broner មានកំណត់ត្រាឈ្នះ ៣៣ លើក ចាញ់ ៣ លើក និងស្មើ ១ លើក ក្នុងនោះផ្តួលដៃគូឲ្យសន្លប់ ២៤ លើក។
Broner និង Pacquiao នឹងត្រូវធ្វើការពិភាក្សាគ្នានៅមជ្ឈមណ្ឌល Gotham Hall ក្នុងទីក្រុងញូវយ៉ក នៅថ្ងៃចន្ទ និងថ្ងៃអង្គារ នៅ Waldorf Astoria ក្នុងទីក្រុង Beverly Hills ដើម្បីផ្សព្វផ្សាយការប្រកួតរបស់ពួកគេ ដែលត្រូវបានរំពឹងទុកថា នឹងរៀបចំឡើងនៅថ្ងៃទី ១៩ ខែមករា នៅសង្វៀន MGM Gra-nd ក្នុងទីក្រុង Las Vegas។
Pacquiao ដែលជាកីឡាករតែម្នាក់ក្នុងការឈ្នះខ្សែក្រវាត់ ៨ ប្រភេទទម្ងន់ផ្សេងគ្នានោះ បាននិយាយកាលពីខែមុនថា រូបគេមានការជឿជាក់ ៩០ ភាគរយថា រូបគេនឹងប្រកួតជាមួយនឹង Broner អតីតម្ចាស់ខ្សែក្រវាត់ពិភពលោក ៤ ប្រភេទទម្ងន់។
Pacquiao ដែលក៏ជាសមាជិកព្រឹទ្ធសភានៅហ្វីលីពីនដែរនោះ បានបាត់បង់ខ្សែក្រវាត់ពិភពលោកពីស្ថាប័ន WBO របស់គេ ក្រោមស្នាដៃកីឡាករអូស្ត្រាលី Jeff Horn កាលពីឆ្នាំមុន ក្នុងទីក្រុង Brisbane។
កាលពីខែមុន Pacquiao បានចុះហត្ថលេខាជាមួយក្រុមហ៊ុនផ្តល់ប្រឹក្សា Premier Boxing Champions របស់លោក Al Haymon ក្រោយពីត្រូវបានរៀបចំឲ្យប្រកួតដោយអង្គភាព Top Rank របស់លោក Bob Arum ដែលជាគូប្រជែងរបស់លោក Haymon អស់រយៈពេល ១៤ ឆ្នាំចុងក្រោយនេះ។
ការផ្លាស់ប្តូរនេះ នឹងជួយឲ្យ Pacquiao មានឱកាសច្រើនក្នុងការប្រកួតជាមួយនឹងកីឡាករខ្លាំងៗបំផុតក្នុងទម្ងន់ ៦៦,៧ គីឡូក្រាម ខណៈកីឡាកររបស់លោក Haymon ក៏មាន Thurman (ឈ្នះ ២៨-០) ម្ចាស់ខ្សែក្រវាត់ WBC គឺ Shawn Porter (២៩-២) និងម្ចាស់ខ្សែក្រវាត់ IBF គឺ Errol Spence Jr (២៤-០) ដែរ៕