.jpg)
Pacquiao វាយទៅលើ Floyd ក្នុងការប្រកួតពីថ្ងៃទី ២ ខែ ឧសភា ២០១៥។ រូបថត AFP
សហរដ្ឋអាមេរិក៖ លោក Bob Arum ភ្នាក់ងារផ្សព្វផ្សាយប្រដាល់សកលជឿថា កីឡាករប្រដាល់ Manny Pacquiao នឹងចូលនិវត្តន៍ពីអាជីពប្រដាល់របស់គេឆាប់ៗនេះ ប្រសិនបើរូបគេមិនបានឡើងសង្វៀនប្រកួតជាមួយអ្នកប្រដាល់អាមេរិក Floy Mayweather ជាថ្មីម្ដងទៀតនោះទេ។
លោក Arum ជាភ្នាក់ងារផ្សព្វផ្សាយសម្រាប់កីឡាករ Pacquiao ក្នុងអំឡុងពេលប៉ុន្មានឆ្នាំដ៏អស្ចារ្យរបស់វីរបុរសហ្វីលីពីនរូបនេះបានប្រាប់គេហទំព័រព័ត៌មានប្រដាល់សកលពិភពលោកថា គាត់ចង់ឃើញកីឡាករវ័យ ៤០ ឆ្នាំរូបនេះ ចូលនិវត្តន៍ក្នុងពេលឆាប់ៗនេះ។
កីឡាករហ្វីលីពីន Pacquiao ដែលបានឈ្នះកីឡាករអាមេរិក Keit Thurman ពេញ ១២ ទឹក ដើម្បីគ្រងជាម្ចាស់ជើងឯកខ្សែក្រវាត់ទម្ងន់ក្រោមមធ្យម (welterweight) ប្រចាំស្ថាប័នសមាគមប្រដាល់ពិភពលោក (WBA) កាលពីខែកក្កដានោះ មិនទាន់កំណត់ការប្រកួតរបស់ខ្លួនជាបន្តទៀតនៅឡើយទេ។
ប៉ុន្តែលោក Arum និយាយថា គាត់ជឿថា អ្នកប្រដាល់ Pacquiao ដែលមានអាយុ ៤១ ឆ្នាំនៅខែធ្នូនោះ នឹងអាចប្រឈមនឹងផលប៉ះពាល់ច្រើននៅពេលខាងមុខទៀត ប្រសិនបើរូបគេនៅតែបន្តអាជីពរបស់ខ្លួនទៅមុខឆ្ងាយទៀតនោះ។
លោក Arum បានប្រាប់ព័ត៌មានប្រដាល់ពិភពលោកថា៖ «ខ្ញុំបានជួយផ្សព្វផ្សាយឲ្យកីឡាករ Pacquiao ជាច្រើនឆ្នាំមកហើយ»។
ភ្នាក់ងាររូបនេះបានបន្ថែមថា៖ «គាត់ជាមនុស្សល្អមែនទែន គឺពិតជាមនុស្សល្អម្នាក់ដែលចេះជួយសង្គម»។
លោក Arum បានបន្ថែមទៀតថា៖ «ប៉ុន្តែគាត់មានអាយុជិត ៤១ ឆ្នាំហើយ ហើយប្រសិនបើអ្នកមានអាយុ ៤១ ឆ្នាំ គឺអ្នកមិនអាចបន្តការប្រកួត និងវាយដំដូចអ្នកធ្លាប់ធ្វើនៅក្នុងការប្រកួតជាមួយកីឡាករ Thurman បានទៀតទេ»។
ភ្នាក់ងាររូបនេះបន្តទៀតថា៖ «ជាការពិត គាត់បានឈ្នះការប្រកួតនោះប៉ុន្តែគាត់បានរងកណ្ដាប់ដៃជាច្រើនដែលវានឹងធ្វើឲ្យគាត់មានផលមិនល្អនៅពេលគាត់បន្តជីវិតនៅពេលខាងមុខទៀត»។
លោក Arum ដែលបាននិយាយនៅដើមឆ្នាំនេះថា គាត់ខ្លាចកីឡាករ Pacquiao ប៉ះពាល់ខួរក្បាលនៅមុនពេលប្រកួតជាមួយកីឡាករ Thurman នោះបានឲ្យដឹងទៀតថា វីរបុរសហ្វីលីពីនរូបនេះគួរតែពិចារណាពីការចង់ប្រកួតជាថ្មីជាមួយកីឡាករ Floyd។
កីឡាករ Floyd ដែលឥឡូវបានចូលនិវត្តន៍ហើយនោះ បានប្រកួតឈ្នះកីឡាករ Pacquiao សម្រាប់ «ការប្រកួតប្រចាំឆ្នាំ ២០១៥» ប៉ុន្តែបានធ្វើឲ្យអ្នកគាំទ្រជាច្រើនមិនអស់ចិត្តចំពោះលទ្ធផលប្រកួតនោះ។
លោក Arum បានបញ្ជាក់ថា៖ «ប្រសិនបើគាត់បានប្រកួតជាមួយកីឡាករ Floyd ម្ដងទៀត ឬមិនបានក៏ដោយ គាត់គួរតែចូលនិវត្តន៍ព្រោះវាគ្មានប្រយោជន៍អី្វឡើយដែលគាត់ត្រូវតែបន្តការប្រដាល់ទៀតនោះទេ»៕ AFP/SN
