.jpg)
Mohamed Salah (ឆ្វេង) របស់ Liverpool និង Neymar។ AFP
ក្រុងប៉ារីស: វាមានរយៈពេល ១ ខែមកហើយដែលក្រុម Paris Saint-Germain បានជួបភាពចម្រូងចម្រាសនៅខាងក្រៅទីលានប្រកួត ប៉ុន្តែការវិលទៅរកភាពរឹងមាំវិញរបស់តារាឆ្នើម Kylian Mbappe និង Neymar នឹងលុបចោលពពកខ្មៅផ្សេងៗពីលើក្លិបរបស់បារាំងមួយនេះ នៅមុនពេលការប្រកួតក្របខ័ណ្ឌ Champions League ដ៏សំខាន់ជាមួយនឹងក្រុម Liverpool នៅរាត្រីនេះ។
ក្រុម PSG នឹងឈានទៅកាន់ការប្រកួតនេះ នាកីឡដ្ឋាន Parc des Princes ដោយស្ថិតក្នុងចំណាត់ថ្នាក់លេខ ៣ ក្នុងពូល C ហើយការបរាជ័យនៅពេលប្រកួតជាមួយនឹងក្រុមម្ចាស់ជើងឯករងកាលពីរដូវកាលមុន Liverpool បូករួមទាំងក្រុម Napoli យកឈ្នះលើក្រុម Red Star Belgrade លើទឹកដីខ្លួនឯងផងនឹងធ្វើឲ្យក្រុមមានម្ចាស់កម្មសិទ្ធិជាជនជាតិកាតាមួយនេះ ធ្លាក់ចេញយ៉ាងឆាប់រហ័ស។
លទ្ធផលនេះនឹងក្លាយជារឿងដ៏អាម៉ាស់សម្រាប់ក្រុមមានមហិច្ឆតាដ៏ធំដូចជា PSG ដែលសង្ឃឹមថា នឹងធ្វើឲ្យបានល្អប្រសើរជាងការធ្លាក់ចេញជាប់ៗគ្នាក្របខ័ណ្ឌ Champions League ត្រឹមវគ្គ ១៦ ក្រុមចុងក្រោយ។
លោក Thomas Tuchel បានឈ្នះរាល់ការប្រកួតក្នុងស្រុកទាំងអស់ ចាប់តាំងពីការតែងតាំងរបស់លោកក្នុងនាមជាគ្រូបង្វឹកកាលពីរដូវក្តៅ ប៉ុន្តែ លទ្ធផលរបស់ PSG ក្នុងក្របខ័ណ្ឌអឺរ៉ុប មិនបានទទួលជោគជ័យឡើយ ខណៈដែលពួកគេបានរងបរាជ័យ ៣-២ នៅលើទឹកដីក្រុម Liverpool កាលពីខែកញ្ញា មុននឹងបានបញ្ចប់ក្នុងលទ្ធផលស្មើ ២ លើកជាមួយនឹងក្រុម Napoli។
ការដណ្តើមបានជ័យជម្នះ ៦-១ លើក្រុម Red Star កាលពីខែមុន គឺជាជ័យជម្នះតែមួយរបស់ក្រុមបារាំងមួយនេះ ក្នុងការប្រកួត ៧ លើកចុងក្រោយនៃក្របខ័ណ្ឌ Champions League ដែលមិនមែនជាទម្រង់លេងដ៏រឹងមាំរបស់ក្រុមឈ្នះពាន ១ ឡើយ។
ខ្សែការពារ Thiago Silva បានប្រាប់គេហទំព័ររបស់ក្លិប PSG ថា៖ «យើងត្រូវតែលេងឲ្យបានល្អដើម្បីផ្តួលក្រុម Liverpool។ ការបង្ហាញពីទម្រង់លេងជាទូទៅ នឹងមិនគ្រប់គ្រាន់ឡើយក្នុងការលេងជាមួយនឹងក្រុមខ្លាំងបែបនេះ។ យើងកំពុងតែនិយាយពីកម្រិតកំពូល ហើយយើងត្រូវតែត្រៀមឲ្យបានល្អឥតខ្ចោះ។ វាជាការប្រកួតកាត់សេចក្តី»។
ប៉ុន្តែ តើពួកគេពិតជាត្រៀមខ្លួនបានល្អ ឬយ៉ាងណា ប្រសិនបើកីឡាករដែលមានតម្លៃខ្លួនខ្ពស់ជាងគេបំផុតក្នុងពិភពលោក ២ នាក់ សុទ្ធសឹងអវត្តមាននៅពេលប្រកួតជាមួយនឹងក្រុមរបស់លោក Jurgen Klopp? Mbappe និង Neymar បានរងរបួសដូចគ្នានៅពេលលេងក្នុងការប្រកួតមិត្តភាព អន្តរជាតិ កាលពីសប្តាហ៍មុន និងបានអវត្តមានក្នុងពេលក្រុមខ្លួនយកឈ្នះលើក្រុម Toulouse ១-០ កាលពីថ្ងៃព្រហស្បតិ៍។
កីឡាករទាំង ២ បានស៊ុតបាល់បញ្ចូលទី ១៣ គ្រាប់ដូចគ្នានៅរដូវកាលនេះ ស្របពេលដែល Edinson Cavani រកបាន ១០ គ្រាប់ក្នុងរាល់យុទ្ធនាការទាំងអស់។ ឥទ្ធិពលរបស់ពួកគេក្នុងក្រុមពិតជាធំណាស់។
លោក Tuchel បាននិយាយទាំងមានសុទិដ្ឋិនិយមកាលពីចុងសប្តាហ៍មុននេះថា៖ «ពួកគេវិលទៅរកភាពល្អប្រសើរជា រៀងរាល់ថ្ងៃ។ យើងមានពេលច្រើននៅពេលនេះ និងមុនឈានដល់ថ្ងៃពុធ។ វាល្អសម្រាប់យើង។ ខ្ញុំគិតថា ពួកគេអាចចូលលេងបាន៕
