.jpg)
ខ្សែប្រយុទ្ធអន្តរជាតិព័រទុយហ្គាល់ Cristiano Ronaldo របស់ក្លិប Juventus បញ្ចេញប្រតិកម្មក្នុងការប្រកួតកន្លងមក។ AFP
ក្រុងឡាស់វ៉េហ្គាស: ស្ត្រីម្នាក់ក្នុងទីក្រុង Las Vegas បាននិយាយជាសាធារណៈជុំវិញការចោទប្រកាន់លើករណីរំលោភ ប្រឆាំងនឹងតារាកីឡាបាល់ទាត់ដ៏ឆ្នើម Cristiano Ronaldo។ នេះបើយោងទៅតាមការចេញផ្សាយរបស់បណ្តាញសារព័ត៌មាន CNN នៅថ្ងៃចន្ទនេះ។
នាង Kathryn Mayorga បានបញ្ជាក់ថា ខ្សែប្រយុទ្ធអន្តរជាតិព័រទុយហ្គាល់រូបនេះ បានរំលោភនាងនៅឯសណ្ឋាគារមួយក្នុងទីក្រុង Las Vegas កាលពីឆ្នាំ២០០៩ បើទោះបីនាងបានស្រែកថា ទេក៏ដោយ។ នេះបើយោងទៅតាមពាក្យបណ្តឹងមួយដែលត្រូវបានដាក់កាលពីថ្ងៃសុក្រ ក្នុងទីក្រុង Clark County កាលពីថ្ងៃសុក្រ កន្លងទៅ។
បើតាមពាក្យបណ្តឹងដដែល ក្រោយពីការបំពាននេះ Ronaldo បានសុំអភ័យទោស «តាមរយៈការបញ្ជាក់ថា រូបគេពិតជាសោកស្តាយ ព្រោះជាធម្មតា គេជាសុភាពបុរស»។
ពាក្យបណ្តឹងនេះ ចោទថា Ronaldo ផ្ទាល់បានប្រាប់ក្រុមសម្របសម្រួលរបស់គេថា «នាងបាននិយាយថា ទេ និងឈប់ ជាច្រើនលើក»។
ពាក្យបណ្តឹងរបស់នាង Mayorga ចោទប្រកាន់ Ronaldo និងក្រុមរបស់គេពីបទយកប្រៀបទៅលើភាពរំជួលចិត្តដ៏ទន់ខ្សោយរបស់នាង ដើម្បីបញ្ចុះបញ្ចូលនាងឲ្យចុះហត្ថលេខាលើប្រាក់សំណង និងការយល់ព្រមតែម្ខាង កាលពីឆ្នាំ២០០៩។
តារាបង្ហាញម៉ូដនាង នាង Kathryn Mayorga ប្តឹង Ronaldo ពីបទរំលោភលើរូបនាង កាលពីឆ្នាំ២០០៩។ រូបថតពី Twitter
នាងអះអាងថា នាងបានទទួលប្រាក់៣៧៥០០០ដុល្លារអាមេរិក ជាថ្នូរនឹងការបំបិទមាត់របស់នាង ខណៈពាក្យបណ្តឹងរបស់នាងគឺមានបំណងក្នុងការមិនយកសំណង និងការព្រមព្រៀងជាផ្លូវការ។
ប៉ុន្តែ មេធាវីរបស់នាង Mayorga បានបដិសេធក្នុងការផ្តល់មតិ ឲ្យលើសពីអ្វីដែលត្រូវបានរៀបរាប់ក្នុងពាក្យបណ្តឹងនេះឡើយ។
ក្រុមអ្នកតំណាងឲ្យ Ronaldo បានច្រានចោលការចោទប្រកាន់ផ្សេងៗ នៅពេលដែលទស្សនាវដ្តីអាល្លឺម៉ង់ Der Spiegel បានចេញផ្សាយករណីនេះជាលើកទី១ កាលពីឆ្នាំ២០១៧។
ក្រោយពីព័ត៌មាននៃពាក្យបណ្តឹងនេះបានផ្ទុះឡើងកាលពីថ្ងៃសុក្រ ក្នុងកិច្ចសម្ភាសមួយជាមួយនឹងនាង Mayorga មេធាវីរបស់ Ronaldo ចាត់ទុកការចេញផ្សាយនេះ «ជារឿងមិនស្របច្បាប់យ៉ាងអាម៉ាស់»។
ជាមួយគ្នានេះ Ronaldo បានចេញមុខបកស្រាយនៅលើបណ្តាញសង្គម Instagram ថា៖ «អ្វីដែលពួកគេនិយាយជារឿងមិនពិត ជាព័ត៌មានក្លែងក្លាយ។ ពួកគេចង់ធ្វើឲ្យខ្លួនឯងល្បី។ វាជារឿងសាមញ្ញា។ ពួកគេចង់ល្បី តាមរយៈការនិយាយពីឈ្មោះរបស់ខ្ញុំ»៕ IS
