ក្រុងលីសបោន: Cristiano Ronaldo បានបញ្ជាក់ថា គន្លឹះក្នុងការទទួលជោគជ័យឥតគណនារបស់គេ គឺការមិនជឿជាក់លើនរណាម្នាក់ក្រៅពីខ្លួនរបស់គេឡើយ ហើយរូបគេបានផ្តល់ដំបូន្មានដល់មិត្តរួមក្រុមព័រទុយហ្គាល់របស់គេ ឲ្យអនុវត្តនូវគំនិតដូចគ្នានេះ។
តារាឆ្នើមរបស់ក្លិប Real Madrid រូបនេះ បានលើកឡើងបែបនេះ ក្នុងពេលរូបគេបានទទួលពានរង្វាន់កីឡាករឆ្នើមប្រចាំឆ្នាំរបស់ព័រទុយហ្គាល់ ក្នុងទីក្រុង Lisbon។
Ronaldo ដែលបានជួយឲ្យក្រុមជម្រើសជាតិព័រទុយហ្គាល់ឈ្នះពាន Euro ឆ្នាំ ២០១៦ ហើយបច្ចុប្បន្នកំពុងតែសម្លឹងរកការឈ្នះពាន World Cup ឆ្នាំ ២០១៨ នោះ បានឲ្យដឹងថា៖ «យើងតែងតែជឿជាក់ថា យើងមានភាពខ្លាំងបំផុត»។
ខ្សែប្រយុទ្ធរូបនេះបានបន្ថែមទៀតថា៖ «អ្នកត្រូវតែគិតឲ្យបានខ្ពស់។ ខ្ញុំតែងតែជឿជាក់ថា គ្មាននរណាម្នាក់ខ្លាំងជាងខ្ញុំឡើយ នៅលើទីលានប្រកួត។ ក្នុងកម្រិតឯកជន និងជាក្រុម ខ្ញុំបានជួបឆ្នាំដ៏អស្ចារ្យមួយ។ ខ្ញុំបានឈ្នះពាន ៥ (រួមមាន Champions League, UEFA Supercup, World Club Cup, La Liga និង Spanish Supercup) ក៏ដូចជាពាន Ballon D''Or និងពានកីឡាករឆ្នើមបំផុតប្រចាំឆ្នាំរបស់ FIFA»។
Ronaldo ដែលត្រូវបានបោះឆ្នោតឲ្យឈ្នះពានបាល់មាស Ballon D''Or ៥ សម័យកាលនោះ បច្ចុប្បន្នកំពុងតែស្ថិតក្នុងទីក្រុង Lisbon ជាមួយនឹងក្រុមជម្រើសជាតិព័រទុយហ្គាល់ ដែលនឹងត្រូវធ្វើការប្រកួតមិត្តភាពកម្តៅសាច់ដុំជាមួយនឹងក្រុមជម្រើសជាតិអេហ្ស៊ីប នៅថ្ងៃសុក្រ ស្អែកនេះ និងហូឡង់ ក្នុងរយៈពេល ៣ ថ្ងៃក្រោយមក។
ខ្សែប្រយុទ្ធវ័យ ៣៣ ឆ្នាំរូបនេះ បានស៊ុតបាល់បញ្ចូលទី ៧៩ គ្រាប់ក្នុងការប្រកួត ១៤៧ លើកសម្រាប់ក្រុមព័រទុយហ្គាល់ និងជួយឲ្យក្រុមម្ចាស់ជើងឯកទ្វីបអឺរ៉ុបមួយនេះ ឲ្យឈ្នះកៅអីទៅកាន់ World Cup ឆ្នាំ ២០១៨ ខណៈពួកគេស្ថិតក្នុងពូលរួមជាមួយនឹងអេស្ប៉ាញ ម៉ារ៉ុក និងអ៊ីរ៉ង់៕