ក្រុងឡុងដ៍៖ លោក Phillip Cocu បាននិយាយថា កីឡាករ Wayner Rooney នឹងត្រៀមខ្លួនសម្រាប់ការប៉ះជាមួយក្រុម Man Utd ដែលជាក្លិបចាស់របស់ខ្លួន ក្រោយពីក្រុម Derby County បានឈ្នះក្នុងការប្រកួត FA Cup ជាមួយក្រុមដ៏ធំមួយដែលលេងនៅក្របខ័ណ្ឌ Premier League។
ប្រធានក្រុម Derby និងកីឡាករ Rooney អាយុ ៣៤ ឆ្នាំ បានប្រែក្លាយការស៊ុតបាល់ពិន័យ ១១ ម៉ែត្រនៅនាទីទី ៧៧ យ៉ាងល្អ ខណៈក្លិបជាម្ចាស់ជើងឯក Championship មួយនេះ បានកាច់បំបាក់ទៅលើក្រុម Northampton Town ក្នុងលទ្ធផល ៤-២ នៅក្នុងការប្រកួតម្ដងទៀតនៅវគ្គទី ៤ កាលពីថ្ងៃអង្គារ។
កីឡាករ Rooney ដែលបានចេញពីក្រុម Man Utd នៅឆ្នាំ ២០១៧ ក្រោយពីបានចេញពីក្រុម Everton ទៅចូលរួមក្លិបនេះនៅឆ្នាំ ២០០៤ នោះ ឥឡូវនេះអាចសម្លឹងទៅរកការប្រកួតនៅកីឡដ្ឋាន Pride Park ជាមួយក្រុម Man Utd ជាទីដែលកំពូលតារារូបនេះបានក្លាយជាអ្នករកគ្រាប់បាល់ច្រើនជាងគេរហូតដល់ចំនួន ២៥៣ គ្រាប់ សម្រាប់ក្រុមបិសាចក្រហម។
កីឡាករ Rooney បានចាកចេញពីទឹកដីសហរដ្ឋអាមេរិក ហើយបានទៅចូលរួមនឹងក្រុម Derby នៅក្នុងប្រទេស អង់គ្លេស ជាស្រុកកំណើតរបស់ខ្លួនវិញតាមការទាមទារចង់បានរបស់ភរិយាខ្លួន។
លោក Cocu បានប្រាប់ក្រុមអ្នកកាសែតថា៖ «គាត់ត្រឡប់មកពីសហរដ្ឋអាមេរិក ដើម្បីចូលរួមនឹងយើងវិញ ហើយឥឡូវនេះគាត់នឹងត្រូវប្រកួតជាមួយក្លិបចាស់របស់គាត់ជាទីដែលគាត់មានអាជីពដ៏អស្ចារ្យ និងពិសេសបំផុតនៅទីនោះ ហើយខ្ញុំជឿថា គាត់នឹងត្រៀមខ្លួនសម្រាប់រឿងនេះ»។
គ្រូបង្វឹករូបនេះបានបន្ថែមថា៖ «វានឹងក្លាយជាការប្រកួតដ៏អស្ចារ្យមួយមិនត្រឹមតែសម្រាប់កីឡាករ Wayne ប៉ុណ្ណោះទេ ប៉ុន្តែថែមទាំងសម្រាប់មនុស្សគ្រប់គ្នានៅក្លិបនេះផងដែរ»៕ AFP/SN