.jpg)
Ruiz និង Joshua នឹងប្រកួតសងសឹកគ្នានៅថ្ងៃសៅរ៍នេះ។ រូប AFP
ក្រុងរីយ៉ាដ៖ ម្ចាស់ជើងឯកទម្ងន់ធ្ងន់ Andy Ruiz Jr បាននិយាយកាលពីថ្ងៃចន្ទថា រូបគេនឹងដាក់សម្ពាធឲ្យបានខ្លាំងទៅលើម្ចាស់ជើងឯក Anthony Joshua នៅក្នុងជំនួបជាថ្មីនៅប្រទេស អារ៉ាប៊ី សាអ៊ូឌីត។
កីឡាករប្រដាល់សកល Ruiz បានកើតនៅលើទឹកដីសហរដ្ឋអាមេរិក ប៉ុន្តែរូបគេតែងប្រកួតក្នុងនាមជាពលរដ្ឋម៉ិកស៊ិក ហើយរូបគេបានផ្ដល់មេរៀនដ៏អាម៉ាស់លើកដំបូងដល់កីឡាករ Joshua ក្នុងការប្រកួតនៅទឹកដីអាមេរិកកាលពីខែមិថុនា ដើម្បីដណ្ដើមខ្សែក្រវាត់ WBA, IBF និង WBO នៅទីក្រុងញូវយ៉ក។
កីឡាករទាំង ២ រូបនេះ នឹងត្រូវប្រកួតគ្នាម្ដងទៀតនៅទីក្រុងឌីរីយ៉ា ជិតទីក្រុងរីយ៉ាដនៃប្រទេស អារ៉ាប៊ី សាអ៊ូឌីត នៅថ្ងៃសៅរ៍ចុងសប្ដាហ៍នេះ ដែលត្រូវបានចាត់ទុកថាជា «ការប្រកួងសងសឹក ក្នុងកម្រិតទម្ងន់ធ្ងន់ដ៏អស្ចារ្យ»។
កីឡាករ Ruiz បាននិយាយក្នុងទីក្រុងរីយ៉ាដថា៖ «យើងនឹងឃើញថា គាត់នឹងទៅជាយ៉ាងណាក្រោមកណ្ដាប់ដៃរបស់ខ្ញុំទៅលើរូបគេ ហើយវានឹងគ្មានទេសម្រាប់ការដាក់សម្ពាធមកលើខ្ញុំព្រោះខ្ញុំធ្វើតាមក្ដីសុបិនរបស់ខ្ញុំ ដើម្បីឲ្យក្លាយជាការពិត»។
កីឡាករកូនកាត់អាមេរិកម៉ិកស៊ិករូបនេះបានបន្ថែមថា៖ «ជាការពិត ខ្ញុំចង់បង្កើនសម្ពាធថែមទៀត ព្រោះខ្ញុំចង់ក្លាយជា Andy Ruiz Jr ដ៏ល្បីល្បាញ»។
ចំណែកកីឡាករ Joshua បាននិយាយថា រូបគាត់ «មានទំនុកចិត្ត» និងគ្មានការព្រួយបារម្ភអ្វីឡើយ នៅមុនពេលការប្រកួតជាមួយគ្នាម្ដងទៀតនេះ។
កីឡាកររូបនេះបានបន្ថែមថា៖ «ខ្ញុំពិតជាឈ្នះក្នុងការប្រកួតនេះ ហើយខ្ញុំដឹងថា ខ្ញុំអាចធ្វើវាបានព្រោះកាលពីមុនខ្ញុំជិតនឹងបានសម្រេចទៅហើយដូច្នេះពេលនេះខ្ញុំនឹងមិនធ្វើឲ្យបាត់បង់ទេ»។
ការប្រកួតនៅថ្ងៃសៅរ៍នេះមានភាពចម្រូងចម្រាសជាច្រើន ខណៈប្រទេស អារ៉ាប៊ី សាអ៊ូឌីត បានប្រឈមនឹងវិបត្តិកាទូតដ៏តឹងតែងពាក់ព័ន្ធនឹងឃាតកម្មទៅលើអ្នកកាសែត Jamal Khashoggi នៅស្ថានកុងស៊ុលរបស់ប្រទេសនេះនៅក្នុងទីក្រុង Istanbul ប្រទេស តួកគី កាលពីឆ្នាំមុន។
ទោះបីជាយ៉ាងណា កីឡាករ Ruiz បាននិយាយថា រូបគេ «ពេញចិត្តនឹងប្រកួតនៅប្រទេស អារ៉ាប៊ី សាអ៊ូឌីត»។
កីឡាកររូបនេះបានបន្ថែមថា៖ «ខ្ញុំពិតជាមានអារម្មណ៍ល្អដូចស្ថិតនៅផ្ទះរបស់ខ្ញុំអ៊ីចឹង។ គ្រប់គ្នាកំពុងរាប់អានខ្ញុំដោយក្ដីស្រឡាញ់ និងជាពិសេសខ្ញុំពិតចូលចិត្តរសជាតិអាហារនៅប្រទេសនេះ»។
ក្រុមសកម្មជនបានចោទថ្នាក់ដឹកនាំរបស់ប្រទេសនេះថា បានប្រើវិស័យកីឡាធ្វើជាឧបករណ៍មួយក្នុងការព្យាយាមលុបលាងមុខមាត់របស់ខ្លួននៅលើឆាកអន្តរជាតិ។
កាលពីខែកុម្ភៈ ថ្នាក់ដឹកនាំប្រទេសនេះបានរៀបចំព្រឹត្តិការណ៍វាយកូនហ្គោល European Tour ជាលើកដំបូង ខណៈព្រឹត្តិការណ៍ប្រណាំងរថយន្តដ៏អស្ចារ្យបំផុតក្នុងពិភពលោកគឺ Dakar Rally ក៏នឹងត្រូវរៀបចំធ្វើនៅប្រទេសនេះនៅឆ្នាំ ២០២០ ខាងមុខនេះផងដែរ៕ AFP/SN
