ក្រុងឡុងដ៍: Alexis Sanchez បានស៊ូទ្រាំទៅនឹងការចាប់ផ្តើមយ៉ាងត្រដាបត្រដួសក្នុងអាជីពរបស់គេក្នុងក្រុម Manchester United ប៉ុន្តែ បានបង្ហើបប្រាប់ថា រឿងល្អៗនឹងកើតឡើងជាមួយនឹងការបង្ហាញពីទម្រង់លេងដ៏គួរឲ្យចាប់អារម្មណ៍មួយក្នុងតួនាទីនៅតំបន់កណ្តាល នៅមុនពេលការប្រកួតក្របខ័ណ្ឌ Champions League ជាមួយនឹង Juventus។
ខ្សែប្រយុទ្ធ Romelu Lukaku ដែលមានរបួសបានអវត្តមានក្នុងពេលក្រុមខ្លួនយកឈ្នះលើក្រុម Bournemouth ២-១ កាលពីថ្ងៃសៅរ៍ ហើយខ្សែប្រយុទ្ធ Marcus Rashford បានលេងក្នុងនាមជាកីឡាករបម្រុង ខណៈដែលលោក Jose Mourinho បានជ្រើសរើសយកការប្រើប្រាស់កីឡាករ ៣ នាក់ក្នុងតំបន់ប្រយុទ្ធ ដោយ Anthony Martial និង Juan Mata ត្រូវបានដាក់ឲ្យលេងនៅចន្លោះកន្លែងរបស់ Sanchez។
អតីតតារាឆ្នើមរបស់ក្រុម Arsenal រូបនេះ គឺជាអ្នកបានជួយឲ្យក្រុម Man United រកបានគ្រាប់បាល់តាមស្មើក្នុងតង់ទី ១ តាមរយៈការជួយឲ្យ Martial រកបានគ្រាប់បាល់ ហើយប្រាកដជាមានការខកចិត្តក្នុងពេលដែលរូបគេត្រូវបានប្តូរចេញនៅជិតបញ្ចប់ការប្រកួត។
ការប្រកួតនេះ ដែលត្រូវបានឈ្នះតាមរយៈគ្រាប់បាល់របស់ Rashford នៅនាទីបន្ថែម បានក្លាយជាចំណុចនៃការបង្ហាញពីទម្រង់លេងដ៏ល្អរបស់ខ្សែប្រយុទ្ធអន្តរជាតិស៊ីលី Sanchez ដែលបានជួបភាពត្រដាបត្រដួសក្នុងការរកឲ្យឃើញទម្រង់លេងដ៏ល្អរបស់គេត្រឡប់មកវិញ ចាប់តាំងពីផ្ទេរទៅកាន់កីឡដ្ឋាន Old Trafford កាលពីខែមករា។
វាជាការបង្ហាញខ្លួនក្នុងជម្រើសទាំង ១១ នាក់ដំបូងក្នុងការប្រកួតលីកជាលើកទី ១ របស់គេ ចាប់តាំងពីថ្ងៃទី ២២ ខែកញ្ញា។
ក្រោយពីដណ្តើមបានជ័យជម្នះដ៏សំខាន់នៅពេលជួបក្រុម Bournemouth លោក Mourinho បានកោតសរសើរដល់ Sanchez និងបានប្រើប្រាស់រូបមន្តដែលលោកចូលចិត្តជាងគេ តាមរយៈការបញ្ជាក់ថា លោកមិនត្រូវការខ្សែប្រយុទ្ធកណ្តាលជាអចិន្រ្ដៃយ៍ដើម្បីដឹកនាំការប្រយុទ្ធឡើយ។
បច្ចុប្បន្ន Man United នឹងធ្វើដំណើរទៅកាន់ទឹកដីក្រុម Juventus ដើម្បីទៅជួបអតីតតារាឆ្នើមរបស់ខ្លួន Cristiano Ronaldo ម្តងទៀត ពោលគឺរយៈពេល ២ សប្តាហ៍ ក្រោយពីពួកគេបានរងបរាជ័យក្នុងលទ្ធផល ១-០ នៅកីឡដ្ឋាន Old Trafford ដែលបានធ្វើឲ្យដេញតាមពីក្រោយក្រុមម្ចាស់ជើងឯកអ៊ីតាលីមួយនេះ ដល់ទៅ ៥ ពិន្ទុក្នុងពូល H។
Fernandinho ជួបអតីតក្រុមជាមួយ Man City រាត្រីនេះ
ក្នុងចំណោមខ្សែបម្រើឆ្នើមៗជាច្រើនក្នុងក្រុម ជារឿយៗ Fernandinho ក្លាយជាកីឡាករដ៏សំខាន់ដែលលោក Pep Guardiola អ្នកចាត់ការទូទៅនៃក្រុម Manchester City បានពឹងផ្អែកច្រើនជាងគេបំផុត ក្នុងការចាប់ផ្តើមយ៉ាងល្អឥតខ្ចោះនៅរដូវកាលនេះ សម្រាប់ក្រុមម្ចាស់ជើងឯកក្របខ័ណ្ឌ Premier League មួយនេះ។
ខ្សែបម្រើអន្តរជាតិប្រេស៊ីលរូបនេះ នឹងត្រូវជួបអតីតក្លិបរបស់ខ្លួន Shakhtar Donetsk នៅរាត្រីនេះ ខណៈ Man City សម្លឹងរកការជួសជុលការភ្លាត់ស្នៀតតែ ១ លើករបស់គេនៃយុទ្ធនាការរបស់ពួកគេមកទល់ពេលនេះ តាមរយៈការចាញ់ ២-១ ក្រោមស្នាដៃក្រុម Lyon ក្នុងការប្រកួត Champions League លើទឹកដីខ្លួនឯង ជាលើកចុងក្រោយរបស់ពួកគេ។
Man City បានយកឈ្នះ ៣-០ ពេលក្រុមទាំង ២ ជួបគ្នាកាលជើងទី ១៕