ក្រុងឡុងដ៍: Manchester City នឹងធ្វើដំណើរទៅកាន់ទឹកដីក្រុម Hoffenheim នៅរាត្រីនេះ ដោយត្រូវការជ័យជម្នះ ១ ដើម្បីសង្គ្រោះយុទ្ធនាការនៃក្របខ័ណ្ឌ Champions League ដែលបានចាប់ផ្តើមជាមួយនឹងការបរាជ័យដ៏មិននឹកស្មានដល់ក្នុងលទ្ធផល ២-១ ក្រោមស្នាដៃក្រុម Lyon សម្រាប់ក្រុមជើងខ្លាំងប្រចាំយុទ្ធនាការមួយនេះ។
ពិតណាស់ វាគួរតែមាននូវការលើកទឹកចិត្តដ៏ធំមួយសម្រាប់ក្រុមរបស់លោក Pep Guardiola ប៉ុន្តែ កីឡាករម្នាក់របស់ក្រុម Man City នឹងស្រេកឃ្លានយ៉ាងពិសេសក្នុងការបង្កើតឲ្យមានការចាប់អារម្មណ៍ដ៏ធំមួយនៅលើទឹកដីអាល្លឺម៉ង់។
Leroy Sane គឺជាតារាម្នាក់ក្នុងចំណោមក្រុមតារាឆ្នើមៗរបស់ Man City ក្នុងការរកបាន ១០០ ពិន្ទុក្នុងក្របខ័ណ្ឌ Premier League និងឈ្នះពាន League Cup កាលពីរដូវកាលមុន។ ខ្សែបម្រើស្លាបវ័យ ២២ ឆ្នាំរូបនេះ បានជាប់ជាកីឡាករឆ្នើមវ័យក្មេងបំផុតប្រចាំឆ្នាំនៅអង់គ្លេស ក្រោយពីបានស៊ុតបាល់បញ្ចូលទី ១៤ គ្រាប់ និងជួយឲ្យមិត្តរួមក្រុមរកបាន ១៩ គ្រាប់ផ្សេងទៀតក្នុងរាល់យុទ្ធនាការទាំងអស់។
ទោះបីជាយ៉ាងណា វានៅតែមិនគ្រប់គ្រាន់ក្នុងការជួយឲ្យរូបគេទទួលបានកៅអី ១ ក្នុងក្រុម World Cup របស់អាល្លឺម៉ង់ ខណៈ Sane ត្រូវបានកាត់ចេញដ៏មិននឹកស្មានដល់ពីសមាជិកទាំង ២៣ នាក់របស់លោក Joachim Loew។
Sane អាចនឹងមានការរិះគន់ ខណៈដែលក្រុមម្ចាស់ការពារជើងឯកពិភពលោករបស់ខ្លួន បានធ្លាក់ចេញត្រឹមវគ្គចែកពូល ខណៈនេះគឺជាលើកទី ១ ក្នុងរយៈពេល ៨០ ឆ្នាំ ដែលអាល្លឺម៉ង់ មិនអាចឆ្លងផុតជុំទី ១។
ល្បឿនមានសមត្ថភាពគ្រប់-គ្រងបាល់យ៉ាងល្អ និងមានភាពឆ្លាតវៃនៅក្នុងការស៊ុតបាល់យ៉ាងរហ័សសំដៅទីពីសំណាក់អតីតខ្សែបម្រើស្លាបរបស់ក្លិប Schalke រូបនេះ សុទ្ធសឹងជាចំណុចដែលក្រុមអាល្លឺម៉ង់ បានបាត់បង់នៅក្នុងប្រទេសរុស្ស៊ី។
ប៉ុន្តែ Sane មិនមានពេលវេលាក្នុងការសង្ស័យឡើយក្នុងពេលវិលទៅកាន់ការបំពេញកាតព្វកិច្ចក្នុងក្លិបវិញ ខណៈរូបគេបានជួបការខកចិត្តដូចគ្នាដោយសារតែលោក Guardiola ដែលនាំឲ្យមានការសង្ស័យទៅលើឥរិយាបថរបស់គេនៅក្រៅទីលាន។
ស្របពេលដែល Sane ត្រូវបានកោះហៅជាថ្មីទៅកាន់ក្រុមរបស់លោក Loew ក្នុងការប្រកួតបើកឆាកនៃយុទ្ធនាការ Nations League ជាមួយនឹងក្រុមជម្រើសជាតិបារាំង កាលពីខែមុន ខ្សែបម្រើអន្តរជាតិអាល្លឺម៉ង់ Toni Kroos បានឲ្យដឹងថា៖ «ពេលខ្លះ អ្នកទទួលអារម្មណ៍ជាមួយនឹងភាសាកាយវិការរបស់ Leroy ថា វាមានលក្ខណៈដូចគ្នា មិនថា យើងឈ្នះ ឬចាញ់។ រូបគេត្រូវតែកែសម្រួលលើភាសាកាយវិការរបស់គេ»។
អនុប្រធានក្រុមរូបនេះបានបន្ថែមទៀតថា៖ «រូបគេលេងបានយ៉ាងអស្ចារ្យសម្រាប់ Man City ប៉ុន្តែ លោក Pep មានបញ្ហាដូចគ្នានៅពេលនេះ ខណៈលោកកំពុងព្យាយាមទាញយកសមិទ្ធផលដ៏ល្អបំផុតពីរូបគេ ហេតុនេះ គេអាចលេងបានកាន់តែល្អ»។
ប្រសិនបើលោក Guardiola កំពុងតែសម្លឹងរកការបញ្ចេញប្រតិកម្មមួយពីរូបគេ លោកប្រាកដជាទទួលអ្វីដែលលោកចង់បាន។ ក្រោយពីត្រូវបានលុបឈ្មោះចេញពីការប្រកួតបើកឆាក ៤ លើករបស់ Man City ក្នុងក្របខ័ណ្ឌ Premier League នៅរដូវកាលនេះ Sane បានស៊ុតបាល់បញ្ចូលទីក្រោយពីលេងបានត្រឹមតែ ២ នាទីក្នុងពេលវិលចូលលេងវិញពេលប្រកួតជាមួយនឹងក្រុម Fulham និងបានជួយបង្កើតឲ្យមានគ្រាប់បាល់ ១ គ្រាប់ក្នុងរាល់ការបង្ហាញខ្លួនទាំង ៣ លើករបស់គេចាប់តាំងពីពេលនោះមក៕