សិង្ហបុរីៈ គ្រូបង្វឹកក្លិប Juventus លោក Maurizio Sarri រំពឹងថា ក្លិបជាម្ចាស់ជើងឯកក្របខ័ណ្ឌអ៊ីតាលី Serie A នឹងធ្វើការចុះកុងត្រាទិញកីឡាករថែមទៀតមុនពេលបិទបញ្ចប់រដូវកាលដោះដូរកីឡាករ។
វាជារដូវកាលដ៏មមាញឹកមួយសម្រាប់ក្លិប Juventus ដែលបានចុះកុងត្រាទិញកីឡាករមួយចំនួនដូចជាកីឡាករ Matthijs De Ligt, Aaron Ramsey, Adrien Rabiot, Luca Pellegrini, Merih Demiral និងកីឡាករ Gianluigi Buffon។
ក្លិប Juventus ក៏បាននិងកំពុងទាក់ទងជាមួយកីឡាករ Paul Pogba អតីតខ្សែបម្រើ និងជាកីឡាករនៅក្លិប Man Utd ព្រមទាំងកីឡាករ Mauro Icardi នៅក្លិប Inter ផងដែរ។
មានភាពមិនទាន់ច្បាស់ពីការចង់បានកីឡាករដូចជា Gonzalo Higuain, Blaise Matuidi និង Mario Mandzukic ហើយលោក Sarri បានផ្ដល់ពត៌មានថ្មីពីការដោះដូរនេះក្រោយពីក្លិប Juventus ប្រកួតចាញ់កីឡាករក្លិប Tottenham ៣-២ ក្នុងការប្រកួតមិត្តភាពកាលពីថ្ងៃអាទិត្យ។
លោក Sarri បាននិយាយថា៖ «ខ្ញុំមិនចង់ធ្វើឲ្យខ្លួនឯងពាក់ព័ន្ធខ្លាំងពេកនៅលើទីផ្សារនេះទេព្រោះខ្ញុំគិតថា នោះជារឿងល្អដែលត្រូវធ្វើ ហើយម្យ៉ាងទៀតខ្ញុំចង់ឲ្យអ្នកផ្សេងទទួលបន្ទុកបញ្ហានេះជំនួសវិញ»។
គ្រូបង្វឹករូបនេះបានបន្តថា៖ «ប្រហែលជាមានលីក និងកីឡាករជាច្រើនទៀតដែលខ្ញុំមិនទាន់ស្គាល់ដូច្នេះហើយខ្ញុំគួរតែទុកឱកាសនេះដល់អ្នកដែលទទួលខុសត្រូវរឿងនេះជំនួសខ្ញុំវិញ»។
លោក Sarri បានបន្ថែមទៀតថា៖ «យើងមានកីឡាករជាច្រើនដែលមានតួនាទីរួចទៅហើយ ប៉ុន្តែយើងកំពុងជជែកពីស្ថានភាពមួយដែលខ្ញុំមានកីឡាករចំនួន ៧ នាក់នៅទីក្រុងទូរីនដែលកំពុងមានរបួស ហើយចំនួន ៥ នាក់ទៀតដែលមិនទាន់ត្រឡប់មកពីការប្រកួតអន្តរជាតិវិញ»។
គ្រូបង្វឹករូបនេះបានបន្តថា៖ «ខ្ញុំគិតថាចាប់ពីពេលនេះរហូតដល់ចុងបញ្ចប់នៃឱកាសដោះដូរកីឡាករក្លិបនេះនឹងធ្វើអ្វីម្យ៉ាងនៅពេលខាងមុខទៀតនេះ ប៉ុន្តែយើងក៏នឹងត្រូវធ្វើអ្វីមួយពាក់ព័ន្ធនឹងប្រាក់ចំណាយផងដែរ»។
គ្រូបង្វឹកសញ្ជាតិអ៊ីតាលីរូបនេះបានបន្តថា៖ «យើងមានកីឡាករជាច្រើនឥឡូវនេះដែលយើងនឹងត្រូវទុក ២ ឬ ៣ នាក់ក្នុងចំណោមកីឡាករនៃក្លិបលេងនៅក្របខ័ណ្ឌ Champions League របស់យើង ហើយយើងពិតជាត្រូវធ្វើអ្វីម្យ៉ាង»។
កីឡាករ Cristiano Ronaldo មានការចាប់អារម្មណ៍ខ្លាំងនៅកីឡដ្ឋានជាតិនៅប្រទេសសិង្ហបុរីជាទីដែលម្ចាស់ស្បែកមាស ៥ ជំនាន់រូបនេះរកបាន ១ គ្រាប់ឲ្យក្រុម Juventus ក្រោយរយៈពេល ៤ នាទីបន្ទាប់ពីកីឡាករ Higuain រកបាន ១ គ្រាប់ដើម្បីលុបចោលការនាំមុខរបស់ក្លិប Tottenham ដោយកីឡាករ Erik Lamela។
ទោះយ៉ាងណាក៏ដោយក្លិប Tottenham បានវាយបកវិញយ៉ាងខ្លាំងរហូតទាល់តែកីឡាករ Lucas Moura រកបាន ១ គ្រាប់នៅនាទីទី ៦០ និង ១ គ្រាប់ទៀតនៅនាទីទី ៩៣ ដោយកីឡាករ Harry Kane ធ្វើឲ្យក្លិប Tottenham ឈ្នះ ៣-២។
លោក Sarri បាននិយាយជុំវិញកីឡាករ Ronaldo ថា៖ «Ronaldo គឺជាកីឡាករល្អបំផុតនៅក្នុងក្រុមនេះដូច្នេះហើយយើងត្រូវតែបណ្ដុះកីឡាករ ១០ នាក់ទៀតឲ្យល្អដូចគាត់ដែរ ហើយគាត់អាចលេងនៅគ្រប់ទីកន្លែង ហើយវាសំខាន់ដែលគាត់អាចលេងបាននៅគ្រប់ទីលានទាំងអស់»៕ SN