.jpg)
Lionel Messi (ឆ្វេង) របស់ Barcelona និងខ្សែការពារ Toby Alderweireld របស់ Tottenham។ AFP
ក្រុងឡុងដ៍: Tottenham កំពុងតែស្ថិតក្នុងទីតាំងយ៉ាងល្អនៅលើតារាងនៃក្របខ័ណ្ឌ Premier League ប៉ុន្តែ ប្រឈមមុខនឹងការប្រកួតកាត់សេចក្តីជាសក្តានុពលមួយនៅរដូវកាលនេះ ក្នុងពេលជួបក្រុម Barcelona ក្នុងក្របខ័ណ្ឌ Champions League នៅរាត្រីនេះ។ ក្រុមរបស់លោក Mauricio Pochettino រកបានដល់ទៅ ៣៦ ពិន្ទុពីការប្រកួត ១៦ លើកនៃក្របខ័ណ្ឌ Premier League ដោយឈ្នះ ១២ លើក ដើម្បីធ្វើឲ្យពួកគេស្ថិតក្នុងចំណាត់ថ្នាក់លេខ ៣ ពីក្រោយក្រុម Liverpool និង Manchester City។
ពួកគេសម្រេចបាននូវលទ្ធផលដ៏ល្អទាំងនោះ បើទោះបីត្រូវលេងនៅកីឡដ្ឋានបណ្តោះអាសន្ននៃទឹកដីខ្លួនឯងនៅឯ Wembley ក៏ដោយ ហើយស្របពេលដែលកីឡាកររបស់ពួកគេជាច្រើនបានចូលរួមក្នុង World Cup រហូតដល់សប្តាហ៍ចុងក្រោយ លទ្ធផលនោះ មានន័យថា ជាសមិទ្ធផលដ៏គួរឲ្យចាប់អារម្មណ៍។
ប៉ុន្តែ ទោះបីជាយ៉ាងណា ស្របពេល Man City និង Liverpool កំពុងស្ថិតក្នុងទម្រង់លេងយ៉ាងល្អ មនុស្សតិចតួចណាស់ រំពឹងទុក Spurs នឹងឈ្នះពាន Premier League ដែលនាំឲ្យពួកគេផ្តោតអារម្មណ៍ដ៏ធំទៅលើការប្រកួតរបស់ពួកគេជាមួយនឹងក្រុមកំពុងនាំមុខលើតារាងក្របខ័ណ្ឌលីករបស់ អេស្ប៉ាញ ក្នុងពូល B។
ប៉ុន្តែ លោក Pochettino ត្រូវតែរកឲ្យឃើញនូវមធ្យោបាយក្នុងការយកឈ្នះលើក្រុម Barcelona របស់ Lionel Messi ដើម្បីឈានទៅវគ្គចាញ់ធ្លាក់ ប៉ុន្តែ លោកនៅតែមានភាពវិជ្ជមាននៅមុនពេលធ្វើដំណើរទៅកាន់ទឹកដី Camp Nou ដើម្បីជួបជាមួយនឹងក្រុមម្ចាស់ជើងឯកទ្វីបអឺរ៉ុប ៥ សម័យកាលមួយនេះ។
គ្រូបង្វឹកសញ្ជាតិអាហ្សង់ទីនរូបនេះ ដែលមិនបានប្រើប្រាស់ខ្សែប្រយុទ្ធ Harry Kane ក្នុងជម្រើសទាំង ១១ នាក់ដំបូងក្នុងពេលពួកគេយកឈ្នះលើក្រុម Leicester ២-០ កាលពីថ្ងៃសៅរ៍នោះ បានឲ្យដឹងថា៖ «វានឹងក្លាយជាការប្រកួតដ៏ធំមួយ។ ពួកគេបានឆ្លងទៅវគ្គបន្តហើយ ប៉ុន្តែ ក្នុងក្របខ័ណ្ឌ Champions League គ្មានក្រុមណាមួយ នឹងផ្តល់នូវភាពងាយស្រួលឡើយ»។
លោកបានបន្ថែមទៀតថា៖ «យើងត្រូវតែឈ្នះ និងឈ្នះដោយស័ក្តិសម។ ស្មារតីប្រកួត គឺត្រូវស្ថិតក្នុងកម្រិត ២០០ ភាគរយដើម្បីដណ្តើមយកឈ្នះ។ យើងនឹងទៅដល់ក្នុងលក្ខខណ្ឌដ៏ល្អបំផុត ព្រោះ Barcelona ជាក្រុមមួយដ៏ខ្លាំងបំផុតក្នុងអឺរ៉ុប»។
Spurs ដណ្តើមបានត្រឹមតែ ១ ពិន្ទុប៉ុណ្ណោះពីការប្រកួត ៣ លើកដំបូងរបស់ខ្លួនពីការប្រកួតពូល B៕
