ភ្នំពេញ៖ កីឡាប្រភេទប្រយុទ្ធមួយដែលមានលក្ខណៈស្រួចស្រាល់ ទាមទារនូវអត្តពលិកកម្លាំងមហាសាលដែលមានឈ្មោះថា «MAS Fighter» ត្រូវបានស្ថានីយទូរទស្សន៍ Town សហការជាមួយប្រដាល់សេរីអន្តរជាតិ MAS Fighter Kunkhmer នាំយកមកប្រកួតនៅកម្ពុជា ដែលនឹងធ្វើនៅស្ថានីយទូរទស្សន៍ថោន នាខណ្ឌឫស្សីកែវ រាជធានីភ្នំពេញ ថ្ងៃទី ២៧ ខែ តុលា ឆ្នាំ ២០១៩ ខាងមុខនេះ។
កីឡាករលំដាប់កំពូលពិភពលោកមួយចំនួននឹងបង្ហាញវត្តមានប្រកួត នៅថ្ងៃនោះ ហើយលោកអាជ្ញាកណ្តាល Tony Weeks ដែលធ្លាប់ដឹកនាំការប្រកួតឲ្យ Manny Pacquiao និងដឹកនាំកីឡាប្រដាល់កម្រិតពិភពលោកជាច្រើននោះ ក៏នឹងចូលរួមដឹកនាំក្នុងព្រឹត្តិការណ៍ MAS Fihter ផងដែរ។ នេះតាមការបង្ហើបឲ្យដឹងពីលោក ស្រិន គឹមកុសល នាយកគ្រប់គ្រងកម្មវិធីទូរទស្សន៍ថោន។
ចំណែកលោក Tommy ប្រធានចាត់ការទូទៅរបស់ MAS Fighter ប្រចាំនៅកម្ពុជា បានប្រាប់ភ្នំពេញប៉ុស្តិ៍ថា ព្រឹត្តិការណ៍ប្រកួតដ៏ធំនៅថ្ងៃអាទិត្យ ទី ២៧ ខែ តុលា ឆ្នាំ ២០១៩ ខាងមុខនេះ នឹងចាប់ពីម៉ោង ៣ រសៀលទៅ ដោយមានការប្រកួតចំនួន ១០ គូ ក្នុងនោះមានកីឡាករគុនខ្មែរប្រកួតជាមួយគុនខ្មែរ, កីឡាមួយថៃ ប៉ះជាមួយគុនខ្មែរ និងសៅលិញមកពីប្រទេស ចិន ប៉ះកីឡាករមួយថៃ។
លោក Tommy បានបន្ថែមថា៖ «មានកីឡាករមកពីប្រទេសចំនួន ៩ មានខ្មែរ ថៃ ចិន និងអូស្ត្រាលី ប៉ុន្តែការផ្គូផ្គងមិនទាន់បញ្ចេញជាផ្លូវការនៅឡើយ ដោយរង់ចាំគណៈកម្មការផ្គូផ្គងរបស់ MAS Fighter នៅហុងកុងសិន ប៉ុន្តែសម្រាប់គូស្រួចស្រាល់លំដាប់ពិភពលោកចំនួន ២ គូ គឺកីឡាករ កែវ រំចង់ របស់កម្ពុជា ត្រូវវ៉ៃសងសឹកជាមួយជើងខ្លាំងមួយថៃ ឆាងភឿក ហើយកីឡាករមួយថៃ ប៊ូខាវ ត្រូវសងសឹកកីឡាករសៅលិញរបស់ចិន យ៉ុនប៊ិន ចំណែក ៨ គូទៀត នឹងប្រកាសជាផ្លូវការ នៅថ្ងៃទី ២២ ខែតុលា នៅសណ្ឋាគារ និងមណ្ឌលកម្សាន្តណាហ្គាវើល»។
ទាក់ទងទៅនឹងអាជ្ញាកណ្តាល និងចៅក្រម ព្រមទាំងបទបញ្ជាប្រកួត លោក Tommy បានប្រាប់ថា៖ «គ្មានចៅក្រមកាត់សេចក្តីទេ គឺការប្រកួត បើមិនចាញ់ឈ្នះ ដោយសន្លប់ទេ គឺត្រូវចាត់ទុកថាស្មើគ្នា ហើយការប្រកួតវ៉ៃគ្នា គ្មានសម្រាករយៈពេលចំនួន ៩ នាទី គឺមានតែអាជ្ញាកណ្តាលម្នាក់តែប៉ុណ្ណោះ»។
ចំណែកលោក តូនី ឆេង ជំនួយការរៀបចំនៃកម្មវិធី MAS Fighter បានប្រាប់បន្ថែមថា កីឡាករឆ្នើមរបស់ថៃ ប៊ូខាវ និងយ៉ុនប៊ិន របស់ចិនសៅលិញ ព្រមទាំងគុនខ្មែរ កែវ រំចង់ និងថៃឆាងភឿក នឹងបង្ហាញវត្តមានក្នុងថ្ងៃសន្និសីទសារព័ត៌មាន នៅរសៀលថ្ងៃទី ២២ ខែតុលា។ រីឯលោកអាជ្ញាកណ្តាលល្បីល្បាញកម្រិតពិភពលោក គឺលោក Tony Weeks ត្រូវបានអញ្ជើញឲ្យមកបង្ហាញវត្តមានកាត់ក្តីលើសង្វៀននៃព្រឹត្តិការណ៍ដ៏អស្ចារ្យនេះដែរ។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានថ្លែងថា៖ «នៅក្នុងព្រឹត្តិការណ៍នេះ អាជ្ញាកណ្តាល និងចៅក្រមរបស់ខ្មែរ ដែលចូលរួមធ្វើការនេះ គឺធ្វើការតែគូកីឡាករគុនខ្មែរ ជាមួយគុនខ្មែរ ឬគុនខ្មែរ ជាមួយមួយថៃទេ ចំណែកក្រៅពីនេះ គឺទៅតាមច្បាប់ និងលក្ខខណ្ឌរបស់ MAS Fighter ដែលគេកំពុងតែទំនាក់ទំនងជាមួយស្ថាប័នពាក់ព័ន្ធកីឡាមួយចំនួនទៀត»៕