ភ្នំពេញៈ ក្រុមបាល់ទាត់ជម្រើសជាតិកម្ពុជាអាយុក្រោម ១៨ ឆ្នាំដែលទើបបានបង្កើតប្រវត្តិសាស្ត្រថ្មី តាមរយៈការយកឈ្នះលើក្រុម U18 ថៃជាលើកដំបូងនោះគឺពួកគេមិនអាចប្រើកម្លាំងចិត្តដ៏ធំនេះ ដើម្បីយកឈ្នះលើក្រុមម្ចាស់ជើងឯក ម៉ាឡេស៊ីក្នុងការប្រកួតជម្រុះលើកទី ៣ ប្រចាំពូល B នៃពានរង្វាន់ AFF U18 Championship 2019 បាននោះទេ គឺក្រុមកម្ពុជាបានចាញ់ ៣-០។
សម្រាប់ការប្រកួតនៅលើទឹកដីវៀតណាមកាលពីថ្ងៃអាទិត្យម្សិលមិញនេះ ក្រុម U18 ម៉ាឡេស៊ីបានដាក់សម្ពាធទៅលើក្រុម U18 កម្ពុជាច្រើន និងរកបានគ្រាប់បាល់ជាបន្តបន្ទាប់ ដើម្បីយកឈ្នះលើក្រុមកម្ពុជា ៣-០ នៅត្រឹមតង់ទី ១ នេះតែម្តង ព្រោះការប្រកួតតង់ទី ២ ក្រុមកម្ពុជាបានពង្រឹងការលេងបានល្អវិញ ដើម្បីរក្សាស្ថានភាពលេងដល់ចប់ ៩០ នាទី។
ការចាញ់ក្រុមម៉ាឡេស៊ី ៣-០ លើកនេះបានក្លាយជាការបរាជ័យលើកទី ២ បន្ទាប់ពីពួកគេបានចាញ់ក្រុម U18 អូស្ត្រាលី ៥-១ កាលប្រកួតបើកឆាកប្រចាំពូល B នេះកាលពីថ្ងៃពុធ។
យ៉ាងណាក៏ដោយការយកឈ្នះក្រុម U18 ថៃ ៤-៣ ក្នុងការប្រកួតជម្រុះលើកទី ២ កាលពីថ្ងៃសុក្រ វាបានក្លាយជាជោគជ័យដ៏ធំបំផុតសម្រាប់កម្ពុជា ហើយជ័យជម្នះនោះបានធ្វើឲ្យមជ្ឈដ្ឋានទូទៅ ពិសេសអ្នកស្នេហាវិស័យបាល់ទាត់នៅកម្ពុជាបានចាត់ទុកការឈ្នះនេះថាជា «ប្រវត្តិសាស្ត្រថ្មី» សម្រាប់ក្រុមជម្រើសជាតិកម្ពុជា។
ការចាត់ទុកបែបនេះព្រោះសម្រាប់ការប្រកួតគ្រប់ប្រភេទអាយុទាំងអស់កម្ពុជាមិនធ្លាប់ឈ្នះក្រុមជម្រើសជាតិថៃម្តងណាឡើយ ខណៈការជួបគ្នា ៦ លើកក្នុងពាន AFF U18 Championship នេះ ក្រុមម្ចាស់ជើងឯក ៥ ជំនាន់របស់ថៃបានយកឈ្នះក្រុមកម្ពុជា ៧-០ កាលឆ្នាំ ២០០៧ រួចបន្តឈ្នះ ៣-០ នៅឆ្នាំ ២០០៩ ឈ្នះ ៥-០ នៅឆ្នាំ ២០១១ ឈ្នះ ៦-០ នៅឆ្នាំ ២០១៥ ឈ្នះ ២-១ នៅឆ្នាំ ២០១៦ និងបានឈ្នះ ១-០ កាលពីឆ្នាំ ២០១៧។
ដោយឡែកសម្រាប់ការប្រកួតជម្រុះលើកទី ៤ ដែលនឹងត្រូវធ្វើនៅថ្ងៃអង្គារនេះ ក្រុម U18 កម្ពុជាត្រូវជួបក្រុម U18 សិង្ហបុរីនៅរសៀលម៉ោង ៤:៣០ ហើយការជួបគ្នារវាងក្រុមទាំង ២ នេះវាអាចនឹងក្លាយជាការប្រកួតដ៏ស្វិតស្វាញ និងស័ក្តិសមមួយ ព្រោះសិង្ហបុរីក៏ទើបបានចាញ់ក្រុមម៉ាឡេស៊ី ៣-១ ផងដែរ៕