.jpg)
Sterling ប៉ះទង្គិចជាមួយខ្សែបម្រើប៊ុលហ្គារី ពីថ្ងៃចន្ទ។ រូបថត AFP
ក្រុង Sofia៖ សហភាពបាល់ទាត់អឺរ៉ុបហៅកាត់ UEFA បានចោទប្រកាន់សហភាពបាល់ទាត់ប្រទេស ប៊ុលហ្គារី (BFU) ថា មានអាកប្បកិរិយារើសអើងជាតិសាសន៍ តាមរយៈក្រុមអ្នកគាំទ្រប៊ុលហ្គារីក្នុងការប្រកួតវគ្គជម្រុះ Euro 2020 ពីថ្ងៃចន្ទជាមួយក្រុមអង់គ្លេសនៅទីក្រុង Sofia ប្រទេស ប៊ុលហ្គារី។
ការប្រកួតក្នុងជ័យជម្នះ ៦-០ របស់ក្រុមអង់គ្លេសនោះ ត្រូវបានផ្អាក ២ ដង មុនពេលបញ្ចប់តង់ទី ១ ដោយសារមានការរើសអើងជាតិសាសន៍ ដែលសំដៅទៅរកកីឡាករស្បែកខ្មៅដែលលេងនៅក្នុងក្រុមអង់គ្លេស។
ក្រុមអ្នកគាំទ្រមួយផ្នែកមួយដែលត្រូវបានបណ្តេញចេញពីកីឡដ្ឋានជាតិ Vasil Levski បានប៉ុនបង «សើចចំអក» ចំពោះកីឡាករ Raheem Sterling, Tyrone Mings និង កីឡាករ Marcus Rashford ហើយក៏ត្រូវបានគេមើលឃើញធ្វើការគោរពបែបណាស៊ីផងដែរ។
ការចោទរបស់សហភាព UEFA នេះបានធ្វើឲ្យប្រធានសហភាពបាល់ទាត់ប្រទេស ប៊ុលហ្គារី លោក Borislav Mihaylov បានចុះចេញពីតំណែងក្រោយពីនាយករដ្ឋមន្ត្រី លោក Boyko Borissov បានគំរាមកាត់បន្ថយការផ្ដល់ហិរញ្ញវត្ថុ ប្រសិនបើគាត់មិនព្រមចេញពីតំណែង។
ប្រធានសហភាព UEFA លោក Aleksander Ceferin បានជំរុញឲ្យ «គ្រួសារបាល់ទាត់» និងមន្ត្រីអាជ្ញាធររួមទាំងរដ្ឋាភិបាល «ធ្វើសង្គ្រាមប្រឆាំងការរើសអើងជាតិសាសន៍» ហើយអង្គការរបស់គាត់ឥឡូវនេះបានចាត់វិធានការចំពោះបញ្ហានេះហើយ។
របាយការណ៍របស់សហភាព UEFA សរសេរថា៖ «វិធានការវិន័យបាល់ទាត់នេះ ត្រូវបានបើកដំណើរការក្រោយពីការប្រកួតវគ្គជម្រុះអឺរ៉ុបរវាងក្រុមប៊ុលហ្គារី និងក្រុមអង់គ្លេស (៦-០) បានលេងនៅថ្ងៃទី ១៤ ខែតុលា»។
របាយការណ៍នេះបានបន្ថែមថា៖ «ការចោទប្រកាន់ទៅលើសហភាពបាល់ទាត់ប៊ុលហ្គារីនោះ គឺមានអាកប្បកិរិយាជាតិសាសន៍និយម (ស្រែក និងការគោរពបែបណាស៊ី) ចោលវត្ថុរឹង រំខានភ្លេងជាតិ និងចាក់ឡើងវិញនៅលើអេក្រង់ទូរទស្សន៍ធំ»។
សមាគមបាល់ទាត់នេះត្រូវឆ្លើយនឹងការចោទប្រកាន់ពីបទរំខានភ្លេងជាតិក្រោយពីក្រុមអ្នកគាំទ្រអង់គ្លេសបានស្រែកច្រៀងនៅមុនពេលប្រកួត។
បន្ថែមពីនេះទៀត សមាគមនេះក៏ត្រូវបានចោទប្រកាន់ថា បានធ្វើឲ្យប៉ះពាល់ដល់បទប្បញ្ញត្តិសុវត្ថិភាព និងសន្តិសុខរបស់សហភាព UEFA ផងដែរ ខណៈគណៈកម្មាធិការទទួលបន្ទុកការគ្រប់គ្រង ក្រមសីលធម៌ និងវិន័យរបស់សហភាព UEFA នឹងដោះស្រាយករណីនេះ៕ AFP/SN
