ក្រុងប៉ារីសៈ ប្រធានសហព័ន្ធបាល់ទាត់អឺរ៉ុប EUFA លោក Aleksander Ceferin បានរិះគន់យ៉ាងខ្លាំងចំពោះប្រធានាធិបតីបារាំងលោក Emmanuel Macron ក្រោយពីប្រធានាធិបតីរូបនេះបានរិះគន់ចំពោះសំណើសុំផ្លាស់ប្ដូរក្របខ័ណ្ឌ Champions League។
លោក Ceferin បាននិយាយថា៖ «វាជាការជ្រៀតជ្រែកនយោបាយនៅក្នុងវិស័យកីឡា» នៅក្នុងសមាជសហព័ន្ធបាល់ទាត់ពិភពលោក FIFA កាលពីថ្ងៃពុធនៅទីក្រុងប៉ារីសប្រទេសបារាំងជាទីដែលលោក Gianni Infantino បានជាប់ឆ្នោតជាថ្មីទៀតសម្រាប់អាណត្តិទី ២ ជាប្រធានគណៈគ្រប់គ្រងបាល់ទាត់ពិភពលោកមួយនេះ។
លោក Macron បាននិយាយដូច្នេះនៅពេលលោកបានជួបជាមួយក្រុមបាល់ទាត់នារីប្រទេសបារាំងកាលពីថ្ងៃអង្គារនៅមូលដ្ឋានពួកគេជិតទីក្រុងប៉ារីសនៅមុនពេលចាប់ផ្ដើមប្រកួត World Cup សម្រាប់នារីនៅប្រទេសបារាំងនៅថ្ងៃសុក្រនេះ។
លោកបានវាយប្រហារចំពោះផែនការកែប្រែក្របខ័ណ្ឌ Champions League ដែលត្រូវបានគេមើលឃើញថា ជាប្រយោជន៍ច្រើនដល់ក្លិបធំៗបំផុតនៅតំបន់នេះ ខណៈក្លិបតូចៗផ្សេងទៀតបានបាត់បង់ឱកាសទៅវិញ។
លោក Ceferin បាននិយាយថា៖ «វាដូចជាមិនទំនងទាល់តែសោះដែលមកចូលរួមពិធីសម្ពោធនៅមុនពេលប្រកួត World Cup របស់នារី ដោយនិយាយពីប្រធានបទផ្សេងបែបនេះទៅវិញ»។
លោក Ceferin បានបន្តថា៖ «ប៉ុន្តែនេះមិនមែនជាបញ្ហារបស់យើងទេ ហើយជាការពិតការជ្រៀតជ្រែកនយោបាយពីភាគីណាមួយនឹងគ្មានប្រយោជន៍នោះទេ»។
ការកែប្រែក្របខ័ណ្ឌ Champions League ដែលនឹងប្រែក្លាយការប្រកួតរបស់ក្លិបឈានមុខគេនៅតំបន់អឺរ៉ុបឲ្យទៅជាអ្វីមួយដែលខិតទៅលីកកំពូលប្រចាំទ្វីបសម្រាប់ក្រុមឆ្នើមៗនោះនឹងចូលជាធរមានចាប់ពីឆ្នាំ ២០២៤ តទៅ ប៉ុន្តែរហូតមកដល់ពេលនេះក៏មានការជំទាស់ជាច្រើនផងដែរ។
លោក Macron បាននិយាយថា៖ «យើងត្រូវការពារម៉ូដែល និងក្លិបរបស់យើង ហើយខ្ញុំគិតថា វាមិនមែនជាគំនិតល្អទេដែលត្រូវលះបង់ម៉ូដែលរបស់យើងដើម្បីទទួលបានផលប្រយោជន៍បន្តិចបន្តួចនោះ»។
ថ្មីៗនេះប្រធានសហព័ន្ធបាល់ទាត់បារាំងទំនងជាមិនចង់និយាយអ្វីឲ្យពាក់ព័ន្ធនឹងសុន្ទរកថារបស់លោក Macron នោះទេ។
លោក Noel Le Graet បាននិយាយថា៖ «ខ្ញុំគិតថា FIFA និង UEFA កំពុងចុះសម្រុងគ្នា ហើយថាសហព័ន្ធនេះកំពុងចុះសម្រុងនឹង UEFA ហើយអន្តរាគមន៍ពីមជ្ឈដ្ឋានខាងក្រៅណាមួយគឺគ្មានអ្វីពាក់ព័ន្ធនោះទេ»៕ SN