ក្រុងឡូសអេនជឺលេស: កីឡាករប្រដាល់ Deontay Wilder បានបញ្ជាក់ថា ជំរំហ្វឹកហាត់ដ៏ខ្លាំងក្លារបស់គេ បានសម្រួចទៅលើ «ក្បាច់សម្លាប់» របស់គេ ស្របពេលរូបគេត្រៀមខ្លួនក្នុងការដាក់ខ្សែក្រវាត់ទម្ងន់ធ្ងន់ពីស្ថាប័ន WBC របស់គេឲ្យដណ្តើមយកនៅពេលប្រកួតជាមួយនឹងកីឡាករ Tyson Fury នៅខែក្រោយនេះ។
Wilder ដែលមិនស្គាល់ចាញ់សោះពីការប្រកួត ៤០ លើក ក្នុងនោះផ្តួលដៃគូឲ្យសន្លប់ ៣៩ លើកនោះ នឹងត្រូវប៉ះជាមួយនឹងកីឡាករមិនស្គាល់ចាញ់ដូចគ្នា Fury នៅលើសង្វៀន Staples Center ក្នុងទីក្រុង Los Angeles នៅថ្ងៃទី ១ ខែធ្នូ ក្នុងការប្រកួតមួយដែលត្រូវបានរំពឹងទុកថា ជាជំនួបដ៏កក្រើកមួយ។
Wilder វ័យ ៣៣ ឆ្នាំ ដែលកំពុងតែសម្លឹងរកការទទួលបានឱកាសប្រកួតនៅថ្ងៃអនាគតជាមួយនឹងម្ចាស់ខ្សែក្រវាត់ទម្ងន់ពិភពលោកពីស្ថាប័ន IBF, WBA និង WBO គឺ Anthony Joshua នៅឆ្នាំក្រោយនោះ បានប្រាប់អ្នកយកព័ត៌មាននៅទីក្រុង Los Angeles កាលពីថ្ងៃចន្ទថា រូបគេបានស្ថិតក្នុងលក្ខខណ្ឌយ៉ាងល្អឥតខ្ចោះ ក្រោយពីការហ្វឹកហាត់ក្នុងជំរំរបស់គេ។
Wilder បានឲ្យដឹងថា៖ «ខ្ញុំកំពុងតែមានអារម្មណ៍ល្អ។ ស្មារតីរបស់ខ្ញុំបានផ្លាស់ប្តូរ រាងកាយរបស់ខ្ញុំបានផ្លាស់ប្តូរ ហើយខ្ញុំមានអារម្មណ៍ដូចជាអ្នកសម្លាប់ម្នាក់អ៊ីចឹង។ ខ្ញុំត្រូវបានផ្លាស់ប្តូរទៅជាអ្នកសម្លាប់ម្នាក់»។
កីឡាកររូបនេះបានប្រាប់បន្តថា៖ «ខ្ញុំមានអារម្មណ៍ថា ខ្ញុំកំពុងតែស្ថិតក្នុងកម្រិតដ៏ខ្លាំងបំផុតរបស់ខ្ញុំនៅពេលនេះ។ ខ្ញុំត្រៀមលក្ខណៈរួចរាល់ទាំងផ្នែកស្មារតី កម្លាំងកាយ និងការរំជួលចិត្ត។ រាល់អ្វីៗទាំងអស់ស្ថិតក្នុងកម្រិតដ៏ល្អឥតខ្ចោះ។ ខ្ញុំគ្រាន់តែចង់ឡើងទៅកាន់សង្វៀន និងបង្ហាញពីការប្រកួត។ Tyson Fury មិនដឹងពីអ្វីដែលរូបគេបានធ្វើឲ្យខ្លួនឯងទទួលបានឡើយ»។
ការប្រកួតជាលើកចុងក្រោយរបស់ Wilde គឺការប៉ះជាមួយនឹងកីឡាករគុយបា Luis Ortiz កាលពីខែមីនា។ Wilder បានឈ្នះការប្រកួតនោះតាមរយៈការផ្តួលឲ្យដៃគូសន្លប់ក្នុងទឹកទី ១០ ក្រោយពីត្រូវបានបង្ខំឲ្យជួបការលំបាកដោយគូប្រកួតសញ្ជាតិគុយបារូបនេះ។
Wilder បានបញ្ជាក់កាលពីថ្ងៃអង្គារថា រូបគេបានទទួលអត្ថប្រយោជន៍ផ្សេងៗពីការជួបការប្រកួតដ៏ស្វិតស្វាញជាមួយនឹង Ortiz។
កីឡាកររូបនេះបាននិយាយថា៖ «Luis Ortiz គឺជាអ្នកប្រយុទ្ធដែលគេមិនចង់ជួបបំផុតក្នុងទម្ងន់ធ្ងន់នេះ ហើយខ្ញុំយល់ពីមូលហេតុដែលរូបគេមិនធ្លាប់បានឡើងទៅប្រកួតដណ្តើមខ្សែក្រវាត់កាលពីមុន។ ខ្ញុំជាប្រភេទនៃអ្នកប្រយុទ្ធដែលផ្តល់ឱកាសឲ្យកីឡាករគ្រប់គ្នា ហើយរូបគេជាអ្នកប្រយុទ្ធដែលខ្ញុំត្រូវការជួបដើម្បីបង្ហាញឲ្យពិភពលោកឃើញនូវអ្វីដែលខ្ញុំមាន»។
ស្របពេលជាមួយគ្នានេះ Wilder បានប្រាប់ថា រូបគេមានការជឿជាក់ថា កម្លាំងកណ្តាប់ដៃដ៏ធ្ងន់របស់គេ នឹងយកឈ្នះលើកីឡាករ Fury។
Wilder បានឲ្យដឹងថា៖ «Fury មានកម្ពស់ដូចខ្ញុំដែរ ហើយរូបគេក៏មានស្នៀតប្រកួតដូចខ្ញុំដែរ។ រូបគេមានភាពរហ័ស និងកម្ពស់ខ្ពស់ ហើយរូបគេជឿជាក់ថា គេជាកីឡាករដ៏ឆ្នើមបំផុតក្នុងពិភពលោក»៕