.jpg)
សកម្មភាពប្រកួតក្រុមហ្វុតសាលកម្ពុជា (ឆ្វេង) ពេលជួបក្រុមមីយ៉ាន់ម៉ា។ FFC
ភ្នំពេញៈ ក្រុមហ្វុតសាលជម្រើសជាតិកម្ពុជា បានបន្តចាញ់ក្រុមម្ចាស់ផ្ទះឥណ្ឌូនេស៊ី ជាមួយលទ្ធផលដ៏គួរឲ្យឈឺចាប់ ក្នុងការប្រកួតជម្រុះលើកចុងក្រោយ ពានរង្វាន់ AFF Futsal Championship 2018 កាលពីថ្ងៃពុធ ចំណែកក្រុមជម្រើសជាតិកម្ពុជាអាយុក្រោម ២៣ ឆ្នាំ (U23) បានចាប់ឆ្នោតប៉ះសុទ្ធតែក្រុមខ្លាំង ក្នុងការប្រកួតពានរង្វាន់ AFC U23 Championship។
សម្រាប់ការប្រកួតបង្គ្រប់កិច្ចចុងក្រោយ នៅលើទឹកដីប្រទេសឥណ្ឌូនេស៊ី កាលពីរសៀលថ្ងៃពុធ ម្សិលមិញ ក្រុមហ្វុតសាលកម្ពុជា បានបន្តចាញ់ក្រុមម្ចាស់ផ្ទះជាមួយលទ្ធផលកាន់តែជូរចត់ គឺរហូតដល់ ១៣-០ បន្ថែមទៅលើការចាញ់ក្រុមម៉ាឡេស៊ី ១០-០ និងចាញ់ក្រុមហ្វុតសាលមីយ៉ាន់ម៉ា ១១-២ កាលពីថ្ងៃអង្គារ។
ការចាញ់ទាំង ៣ ប្រកួត ជាមួយការរបូតគ្រាប់បាល់រហូតដល់ ៣៤ គ្រាប់ និងស៊ុតបញ្ចូលទីទៅលើគូប្រកួត បានត្រឹម ២ គ្រាប់នេះ វាបានក្លាយជាបទពិសោធដ៏ជូរចត់មួយ សម្រាប់ការវិលត្រឡប់មកចូលរួមការប្រកួតពាន AFF Futsal Championship ជាថ្មីរបស់ក្រុមហ្វុតសាលកម្ពុជា បន្ទាប់ពីក្រុមកម្ពុជា មិនបានចូលរួមក្នុងព្រឹត្តិការណ៍នេះជាច្រើនឆ្នាំមក។
ក្រុមកម្ពុជា បានធ្លាក់ចេញពីការប្រកួតនេះ ក្នុងនាមជាក្រុម ដែលឈរនៅបាតតារាងប្រចាំពូល A ហើយក្រុមមីយ៉ាន់ម៉ា ក៏បានធ្លាក់ចេញពីការប្រកួតនេះដែរ ព្រោះពួកគេបានចាញ់ក្រុមម៉ាឡេស៊ី ៣-២ កាលពីម្សិលមិញនោះដែរ។ លទ្ធផលនេះបានធ្វើឲ្យក្រុមម៉ាឡេស៊ី ឈរនៅលេខ ១ ប្រចាំពូល A នេះ ដោយឈ្នះទាំង ៣ ប្រកួត ហើយក្រុមម្ចាស់ផ្ទះឥណ្ឌូនេស៊ី បានលេខ ២ ដោយឈ្នះ ២ និងចាញ់ ១។
ក្រុមម៉ាឡេស៊ី និងក្រុមឥណ្ឌូនេស៊ី ត្រូវឡើងទៅប្រកួតវគ្គពាក់កណ្តាលផ្តាច់ព្រ័ត្រ ដោយក្នុងនោះ ម៉ាឡេស៊ី ត្រូវប៉ះក្រុមវៀតណាម ហើយឥណ្ឌូនេស៊ី ត្រូវប្រឈមជាមួយក្រុមថៃ ដែលទើបឈ្នះវៀតណាម ៤-១ ក្នុងការប្រជែងយកលេខ ១ ប្រចាំពូល B កាលពីយប់ថ្ងៃពុធ ម្សិលមិញ។ ចំណែកក្រុមទីម័រខាងកើត និងប្រ៊ុយណេ គឺជាក្រុមដែលបានធ្លាក់ចេញពីការប្រកួតប្រចាំពូល B។
ដោយឡែកក្រុម U23 ជម្រើសជាតិកម្ពុជា បានចាប់ឆ្នោតឈរនៅពូល H សុទ្ធតែជាមួយក្រុមខ្លាំងក្នុងនោះមានក្រុម U23 កូរ៉េខាងត្បូង ក្រុម U23 អូស្ត្រាលី និងក្រុម Chinese Taipei ហើយការប្រកួតជម្រុះប្រចាំពូល H នេះ កម្ពុជា ត្រូវធ្វើជាម្ចាស់ផ្ទះ។ ចំណែកពូលចំនួន ១០ ទៀត ក៏បានចាប់ឆ្នោតរួចរាល់ហើយដែរ ហើយការប្រកួតជម្រុះ នឹងធ្វើឡើងចាប់ពីថ្ងៃទី ២២ ខែមីនា រហូតដល់ថ្ងៃទី ២៦ ខែមីនាឆ្នាំ ២០១៩៕
