ភ្នំពេញ: ក្រុមបាល់ទាត់ជម្រើសជាតិកម្ពុជាត្រូវការពិន្ទុជាដាច់ខាត នៅពេលពួកគេប៉ះជាមួយនឹងក្រុមម្ចាស់ផ្ទះមីយ៉ាន់ម៉ា នៅល្ងាចនេះ ចាប់ពីម៉ោង ៦:៣០ ល្ងាច ដើម្បីរក្សាក្តីសង្ឃឹមនៃការឈានទៅវគ្គបន្តនៃព្រឹត្តិការណ៍ AFF Suzuki Cup ឆ្នាំ ២០១៨។
ក្រុមមានរហស្សនាមថា គោព្រៃមួយនេះនឹងឈានទៅកាន់ការប្រកួតនៅកីឡដ្ឋាន Mandalarthiri ដោយដឹងថា ការបរាជ័យ ១ ផ្សេងទៀត អាចនឹងធ្វើឲ្យពួកគេធ្លាក់ចេញ ក្រោយពីបានរងបរាជ័យទាំងប្រផិតប្រផើយក្នុងលទ្ធផល ១-០ ក្រោមស្នាដៃក្រុមជម្រើសជាតិម៉ាឡេស៊ី នាកីឡដ្ឋានជាតិអូឡាំពិក ក្នុងការប្រកួតបើកឆាកនៃពូល A របស់ពួកគេកាលពីថ្ងៃព្រហស្បតិ៍។
សម្រាប់ការប្រកួតនៅល្ងាចថ្ងៃនេះ ក្រុមជម្រើសជាតិកម្ពុជា រំពឹងទុកថា នឹងធ្វើឲ្យបានល្អប្រសើរជាងការប្រកួតបើកឆាករបស់ខ្លួន ខណៈដែលការបង្ហាញពីភាពទន់ខ្សោយក្នុងតំបន់ការពារបានធ្វើឲ្យពួកគេរងបរាជ័យដ៏គួរឲ្យសោកស្តាយ ពីមុខអ្នកគាំទ្ររបស់ខ្លួនប្រមាណជាជាង ៣ ម៉ឺននាក់។
ក្រោយពីបញ្ចប់ការប្រកួតកាលពីថ្ងៃព្រហស្បតិ៍ ខ្សែប្រយុទ្ធចាន់ វឌ្ឍនាកា បានប្រាប់អ្នកយកព័ត៌មានថា៖ «លទ្ធផលនេះ គឺជាលទ្ធផលដ៏គួរឲ្យសោកស្តាយ ប៉ុន្តែ យើងរំពឹងទុកថា យើងនឹងធ្វើឲ្យបានកាន់តែល្អប្រសើរពីមួយប្រកួតទៅមួយប្រកួត។ យើងនឹងព្យាយាមកែកំហុសរបស់យើង»។
កីឡាករមានវ័យ ២៤ ឆ្នាំរូបនេះ បានបន្ថែមទៀតថា៖ «សម្រាប់ការប្រកួតជាមួយមីយ៉ាន់ម៉ា យើងរំពឹងទុកថា នឹងធ្វើបានល្អប្រសើរជាងការប្រកួតរបស់យើងជាមួយនឹងក្រុមជម្រើសជាតិម៉ាឡេស៊ី និងទទួលបានលទ្ធផលល្អមួយ»។
នេះគឺជាការប្រកួតបើកឆាករបស់ក្រុមជម្រើសជាតិមីយ៉ាន់ម៉ា នៅលើទឹកដីខ្លួនឯងនៃយុទ្ធនាការ AFF Suzuki Cup ឆ្នាំ ២០១៨ មុននឹងដំណើរទៅជួបក្រុមជម្រើសជាតិឡាវ ក្នុងទីក្រុងវៀងចន្ទន៍ នាថ្ងៃទី ១៦ ខែវិច្ឆិកា។ នៅល្ងាចដដែលនេះ ក្រុមបាល់ជម្រើសជាតិម៉ាឡេស៊ី នឹងធ្វើជាម្ចាស់ផ្ទះទទួលក្រុមជម្រើសជាតិឡាវដែលបានរងបរាជ័យក្នុងលទ្ធផល ៣-០ លើទឹកដីខ្លួនឯងក្រោមស្នាដៃក្រុមជម្រើសជាតិវៀតណាម ក្នុងការប្រកួតបើកឆាករបស់ខ្លួន។
ក្រុមជម្រើសជាតិកម្ពុជា ស្ថិតក្នុងពូល A រួមជាមួយនឹងក្រុមជម្រើសជាតិម៉ាឡេស៊ី វៀតណាម មីយ៉ាន់ម៉ា និងឡាវ ហើយបន្ទាប់ពីជួបមីយ៉ាន់ម៉ា ពួកគេនឹងធ្វើជាម្ចាស់ផ្ទះទទួលក្រុមឡាវ នាថ្ងៃទី ២០ សប្តាហ៍ក្រោយ មុននឹងទៅជួបវៀតណាម នៅថ្ងៃទី ២៤ ខែវិច្ឆិកា ដើម្បីបញ្ចប់ការប្រកួតក្នុងពូលរបស់ខ្លួន។ ក្រុមបញ្ចប់ក្នុងចំណាត់ថ្នាក់លេខ ១ និងលេខ ២ នៃពូល នឹងឈានទៅវគ្គពាក់កណ្តាលផ្តាច់ព្រ័ត្រ ជាមួយនឹងក្រុមឈរលេខ ១ និងលេខ ២ ពីការប្រកួតក្នុងពូល B៕