.jpg)
សំបូរ សុភណ្ឌ បានបង្ហាញទង់ជាតិកម្ពុជា ពេលរូបគេឡើងទទួលមេដាយមាសពិភពលោក។ សហការី
ភ្នំពេញៈ កីឡាករ សំបូរ សុភណ្ឌ បានក្លាយជាអ្នកលេងសាច់ដុំ តំណាងឲ្យកម្ពុជាតែម្នាក់គាត់ ដែលបានឈ្នះមេដាយមាសពីការប្រកួតកីឡាកាយវប្បកម្មជ្រើសរើសជើងឯកពិភពលោក លើកទី ១០ ឆ្នាំ ២០១៨ (10th WBPF World Bodybuilding and Physique Sports Championships and Congress) នៅប្រទេសថៃ ខណៈអតីតម្ចាស់មេដាយមាស សំបូរ ណាន និង អតីតម្ចាស់មេដាយសំរឹទ្ធ ណុំ សុបិន្ត រួមទាំង សំបូរ នន់ និង ត្រឹង ចាន់ សុទ្ធតែបានចាញ់ នៅក្នុងវគ្គផ្តាច់ព្រ័ត្រ ៥ នាក់ចុងក្រោយដ៏គួរឲ្យសោកស្តាយ។
អគ្គលេខាធិការសហព័ន្ធកីឡាកាយវប្បកម្ម និលំហាត់ប្រាណ លោកតឹក ប៊ុនវី បានសម្តែងការសោកស្តាយចំពោះលទ្ធផល ដែលក្រុមកាយវប្បកម្មកម្ពុជាទទួលបានពីការប្រកួតជើងឯកពិភពលោក លោកនេះ។ លោកបានប្រាប់ភ្នំពេញ ប៉ុស្តិ៍ កាលពីថ្ងៃអាទិត្យថា៖ «ការឈ្នះបានត្រឹមមេដាយមាស ១ ពីការប្រកួតជើងឯក ពិភពលោក លើកនេះ ខ្ញុំគិតថា វាមិនមែនជារឿងល្អនោះទេ ព្រោះវាខុសទៅនឹងការរំពឹងទុករបស់យើង»។
អតីតម្ចាស់មេដាយប្រាក់ជើងឯកពិភពលោក ឆ្នាំ២០១៧ តឹក ប៊ុនវី បានបន្តថា៖ «យើងរំពឹងថា អ្នកទៅប្រកួតទាំង ៥ លើកនេះ ត្រូវតែបានមេដាយគ្រប់គ្នាគឺយ៉ាងហោចណាស់ក៏បានត្រឹមលេខ ៣ មេដាយសំរឹទ្ធដែរ ប៉ុន្តែលទ្ធផលប្រកួតនៅឆ្នាំនេះ បែរជាក្រឡាប់ចាក់បែបនេះទៅវិញ»។
សម្រាប់ការប្រកួតជើងឯកពិភពលោកលើកនេះ មានអត្តពលិកចូលរួមសរុប ៤៧៤ នាក់ (ស្រី ១៨៤ នាក់) មកពី ៥១ ប្រទេសហើយជាលទ្ធផលនៃការប្រកួតជម្រុះកាលពីថ្ងៃសៅរ៍នោះ កីឡាករទាំង ៥ នាក់របស់កម្ពុជា បានឡើងទៅកាន់វគ្គផ្តាច់ព្រ័ត្រ ៥ នាក់ចុងក្រោយដូចគ្នាទាំងអស់។
ប៉ុន្តែមានតែ សំបូរ សុភណ្ឌ ម្នាក់គត់ ដែលបានឈ្នះមេដាយមាសលើការប្រកួតរាងស្អាតលើវិញ្ញាសា Sports Physique up to 170 cm-120 ចំណែកបងប្រុសរបស់គេទាំង ២ នាក់ គឺ សំបូរ ណាន ដែលប្រកួតការពារមេដាយមាសលើវិញ្ញាសា Athletic Physique Up to 175 Cm (+6Kg) និង សំបូរ នន់ ដែលប្រកួតវិញ្ញាសា Bodybuilding ក្នុងទម្ងន់ ៨០ គីឡូក្រាម សុទ្ធតែបានត្រឹមចំណាត់ថ្នាក់លេខ ៤ ដូចគ្នា។
ចំណែកអតីតម្ចាស់មេដាយសំរឹទ្ធជើងឯកពិភពលោកកាលពីឆ្នាំ ២០១៧ ណុំ សុបិន្ត ដែលប្រកួតវិញ្ញាសា Athletic Physique កម្ពស់ក្រោម 167 cm (+4kg) បានត្រឹមលេខ ៤ ដែរ ហើយកីឡាករ ត្រឹង ចាន់ ដែលប្រកួតវិញ្ញាសា Sports Physique Up to 175cm-100 ទទួលបានលេខ ៥។
លោក តឹក ប៊ុនវី ដែលបានតាមដានការប្រកួតជើងឯកពិភពលោកនេះយ៉ាងដិតដល់បានទទួល ស្គាល់ពីការសម្រេចរបស់គណៈកម្មការដែលបានទម្លាក់ សំបូរ នន់, ណុំ សុបិន្ត និង ត្រឹង ចាន់ មិនស្ថិតនៅក្នុងចំណាត់ថ្នាក់ទទួលបានមេដាយ ប៉ុន្តែលោកបានចោទទៅលើការទម្លាក់ សំបូរ ណាន មកទទួលបានត្រឹមលេខ ៤ ជារឿងមិនសមហេតុផល។
អគ្គលេខាធិការរូបនេះបាននិយាយថា៖ «តាមការមើលរបស់ខ្ញុំ សំបូរ ណាន ដែលជាម្ចាស់មេដាយមាស កាលពីឆ្នាំ ២០១៧ គឺសាច់គាត់ល្អជាងមុន មិនចាញ់ គេនោះទេ ប៉ុន្តែគណៈកម្មការបែរជាទម្លាក់គាត់ចោលរហូតដល់លេខ ៤។ ខ្ញុំមើលឃើញថា នេះជារឿងមិនសមនោះទេ គឺបើមិនបានលេខ ១ យ៉ាងហោចណាស់ក៏ សំបូរ ណាន គួរជាប់លេខ ២ ឬលេខ ៣ ដែរ»។
លោក តឹក ប៊ុនវី បញ្ជាក់ថា៖ «យើងមានការសោកស្តាយ ចំពោះលទ្ធផលដែលទទួលបានពីការប្រកួតជើងឯកពិភពលោក នៅឆ្នាំនេះ តែយើងក៏មិនអាចប្រកែកចំពោះលទ្ធផល ដែលសម្រេចរួចហើយនោះទេ អ៊ីចឹងយើងមានតែព្យាយាមពង្រឹងគុណភាពកីឡាកររបស់យើង និងព្យាយាមធ្វើឲ្យបានល្អជាងនេះ សម្រាប់ការប្រកួតនៅឆ្នាំក្រោយៗទៀត»៕
