ភ្នំពេញ: ក្រុមបាល់ទាត់ជម្រើសជាតិកម្ពុជា កំពុងតែរំពឹងទុកថា នឹងដណ្តើមបានជ័យជម្នះនៅពេលធ្វើជាម្ចាស់ផ្ទះទទួលក្រុមជម្រើសជាតិឡាវ ក្នុងការប្រកួតជុំទី ៣ នៃពូល A ក្នុងព្រឹត្តិការណ៍ AFF Suzuki Cup ឆ្នាំ ២០១៨ នាកីឡដ្ឋានជាតិអូឡាំពិក នៅល្ងាចថ្ងៃអង្គារនេះ។
ក្រុមជម្រើសជាតិកម្ពុជា នឹងឈានទៅកាន់ការប្រកួតនេះ ដោយការស្រេកឃ្លានជ័យជម្នះយ៉ាងខ្លាំង ដើម្បីរក្សាក្តីសង្ឃឹមនៃការឈានទៅវគ្គបន្ត ក្រោយពីបានរងបរាជ័យ ១-០ ក្រោមស្នាដៃក្រុមជម្រើសជាតិម៉ាឡេស៊ី កាលពីថ្ងៃបើកឆាក មុននឹងចាញ់ក្រុមមីយ៉ាន់ម៉ា ៤-១ ក្នុងការប្រកួតជុំទី ២ របស់ខ្លួន កាលពីថ្ងៃទី ១២ ខែវិច្ឆិកា កន្លងទៅ។ ក្រុមម្ចាស់ផ្ទះជឿជាក់ថា ការដណ្តើមបានជ័យជម្នះក៏នឹងផ្តល់នូវការជឿជាក់ដល់ក្រុម ក្រោមការដឹកនាំរបស់អ្នកចាត់ការទូទៅថ្មីលោក Keisuke Honda ផងដែរ ខណៈដែលនេះគឺជាឱកាសដ៏សំខាន់សម្រាប់កម្ពុជា ក្នុងការដណ្តើម ៣ ពិន្ទុជាលើកដំបូង។
លោក Felix Dalmas គ្រូបង្វឹកជំនួយនៃក្រុមជម្រើសជាតិកម្ពុជា បានបញ្ជាក់ថា ក្រុមរបស់លោកកំពុងតែត្រៀមលក្ខណៈយ៉ាងល្អ ស្របពេលពួកគេក៏មានពេលសម្រាកច្រើនជាងក្រុមជម្រើសជាតិឡាវ ដែលទើបតែបានលេងការប្រកួតចុងក្រោយរបស់ពួកគេកាលពីថ្ងៃទី ១៦ ខែវិច្ឆិកា ផងដែរ។
ក្នុងសន្និសីទសារព័ត៌មានមួយដែលត្រូវបានរៀបចំឡើងកាលពីព្រឹកថ្ងៃចន្ទ លោក Felix បានប្រាប់ថា៖ «កូនក្រុមរបស់ខ្ញុំមានការត្រៀមខ្លួនបានយ៉ាងល្អ ហើយយើងកំពុងតែផ្តោតលើការប្រកួតនៅថ្ងៃស្អែកមួយនេះ។ ជាមួយគ្នានេះ យើងក៏មានពេលវេលាសម្រាកច្រើនជាងក្រុមភ្ញៀវផងដែរ»។
ជាមួយគ្នានេះ ខ្សែការពារសឺយ វិសាល ប្រធានក្រុមនៃក្រុមជម្រើសជាតិកម្ពុជា បាននិយាយថា វាពិតជាសំខាន់ណាស់ក្នុងការដណ្តើមឲ្យបានពិន្ទុជាលើកទី ១ ហើយក្រុមរបស់គេទាំងមូលកំពុងតែផ្តោតលើការដណ្តើមបានជ័យជម្នះ។
កីឡាកររូបនេះបានប្រាប់អ្នកយកព័ត៌មានថា៖ «នេះគឺជាការប្រកួតដ៏សំខាន់មួយ ហើយយើងសង្ឃឹមថា យើងនឹងធ្វើឲ្យបានល្អ ក៏ដូចជាដណ្តើមឲ្យបាន ៣ ពិន្ទុពីការប្រកួតនេះ»។
ប៉ុន្តែ សឺយ វិសាល បានទទួលស្គាល់ថា ក្រុមម្ចាស់ផ្ទះ នឹងមិនមើលស្រាលទៅលើគូប្រកួតរបស់ខ្លួនឡើយ បើទោះបីក្រុមជម្រើសជាតិឡាវ នឹងឈានទៅកាន់ការប្រកួតនេះ ដោយការធ្លាក់ចេញរួចជាស្រេចក៏ដោយ។
ខ្សែការពារវ័យ ២៣ ឆ្នាំរូបនេះបានបន្ថែមទៀតថា៖ «យើងត្រូវការឈ្នះនៅថ្ងៃស្អែកនេះ ប៉ុន្តែ យើងមិនអាចមើលស្រាលលើក្រុមឡាវបានឡើយ ព្រោះពួកគេគឺជាក្រុមដ៏ខ្លាំងមួយ ហេតុនេះ យើងនឹងប្រឹងឲ្យអស់ពីសមត្ថភាពរបស់យើង»។
ក្រុមជម្រើសជាតិឡាវ បានធ្លាក់ចេញពីយុទ្ធនាការនេះរួចជាស្រេច ក្រោយពី ៣ លើកពីការប្រកួតទាំង ៣ លើករបស់ពួកគេ បន្ទាប់ពីចាញ់ក្រុមជម្រើសជាតិវៀតណាម ៣-០ លើទឹកដីខ្លួនឯង ចាញ់ក្រុមម៉ាឡេស៊ី ៣-១ មុននឹងចាញ់ក្រុមមីយ៉ាន់ម៉ា ៣-១ ក្នុងការប្រកួតចុងក្រោយរបស់ខ្លួន។ ទោះបីជាយ៉ាងណា លោក V. Sundram Moorthy គ្រូបង្វឹកជម្រើសជាតិឡាវ បានបញ្ជាក់ថា ក្រុមរបស់លោកនឹងព្យាយាមលេងឲ្យអស់ពីសមត្ថភាពរបស់ខ្លួន បើទោះបីពួកគេបានធ្លាក់ចេញពីពូល A រួចទៅហើយក៏ដោយ។
នៅល្ងាចថ្ងៃដដែលនេះ ក្រុមជម្រើសជាតិមីយ៉ាន់ម៉ា នឹងបើកទ្វារទទួលក្រុមខ្លាំងវៀតណាម ក្នុងការប្រកួតមួយគូផ្សេងទៀតក្នុងពូល A តែមួយនេះ។
បច្ចុប្បន្ន ក្រុមមីយ៉ាន់ម៉ា កំពុងតែនាំមុខលើកំពូលតារាងដោយ មាន ៦ ពិន្ទុ ពីការប្រកួត ២ លើក ដោយសារតែមានគ្រាប់បាល់ច្រើនជាងក្រុមឈរលេខ ២ វៀតណាម និងក្រុមឈរលេខ ៣ ម៉ាឡេស៊ី ខណៈដែលក្រុមកម្ពុជា និងឡាវ មិនទាន់ដណ្តើមបានពិន្ទុដូចគ្នា។
ការប្រកួតនៅល្ងាចនេះ នឹងចាប់ផ្តើមនៅម៉ោង ៦:៣០ ល្ងាច៕