.jpg)
លោក ណយ ផាណា ពេលថ្លែងទៅកាន់សិក្ខាកាមទាំង២០នាក់ នៅសាលដំបូលទូក កាលពីម្សិលមិញ។ រូបថត ឈន ណន
ភ្នំពេញ៖ មន្រ្តីបច្ចេកទេសដែលជាគណៈកម្មការ និងចៅក្រម លើប្រភេទកីឡាកាយសម្ព័ន្ធចំនួន ២០ នាក់ ត្រូវបានថ្នាក់ដឹកនាំសហព័ន្ធកីឡាកាយ សម្ព័ន្ធកម្ពុជា ដាក់ឲ្យចូលរួមសិក្សាបន្ថែមជាមួយអ្នកជំនាញនៅក្នុងសិក្ខាសាលាបំប៉នវគ្គបច្ចេកទេសចៅក្រម កាលពីថ្ងៃព្រហស្បតិ៍ មុនពេលអ្នកទាំងនេះ ចូលរួមកាត់សេចក្តីការប្រកួតកីឡាកាយសម្ព័ន្ធជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន លើកទី ៣ ឆ្នាំ ២០១៩ ដែលត្រូវធ្វើពីថ្ងៃទី ២១ ដល់ថ្ងៃទី ២៤ ខែធ្នូ។
ជុំវិញការបើកសិក្សាសាលានេះ លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាបានថ្លែងថា៖ «នៅរាល់ការប្រកួត យើងតែងតែរៀបចំឲ្យមានការបំប៉នវគ្គបច្ចេកទេសចៅក្រម ដើម្បីឲ្យមន្រ្តីបច្ចេកទេសរបស់យើងបានស្វែងយល់ពីច្បាប់ និងលក្ខន្តិកៈដែលទើបមានការកែប្រែ ក្នុងឆ្នាំ ២០១៩ ហើយបានយកប្រើប្រាស់ក្នុងការប្រកួតស៊ីហ្គេមកាលពីពេលថ្មីៗនេះ»។
លោកបានបន្ថែមថា៖ «សិក្ខាកាមទាំង ២០ នាក់ ដែលបានចូលរួមនៅក្នុងសិក្ខាសាលាបំប៉នវគ្គបច្ចេកទេសចៅក្រមនេះ គឺពួកគាត់នឹងត្រូវចូលរួមបំពេញការពារនៅក្នុងការប្រកួតជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន អ៊ីចឹងតាមរយៈការសិក្សាវគ្គបំប៉ននេះអាចនឹងជួយពង្រឹងនូវជំនាញរបស់ពួកគេ ទៅលើការដាក់ និងដកពិន្ទុនៅក្នុងពេលប្រកួតឲ្យមានភាពយុត្តិធម៌ និងតម្លាភាព»។
សម្រាប់ការប្រកួតកីឡាកាយសម្ព័ន្ធជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន លើកទី ៣ ឆ្នាំ ២០១៩ ដែលនឹងត្រូវធ្វើនៅសាលដំបូលទូកពីថ្ងៃទី ២១ ដល់ទី ២៤ ខែធ្នូនេះ មានអត្តពលិកប្រមាណ ៦៤ នាក់ មកពីខេត្តតាកែវ ក្រចេះ កំពង់ឆ្នាំង និងរាជធានីភ្នំពេញ បានចូលរួមប្រកួត ហើយពួកគេត្រូវប្រកួតប្រជែងគ្នាទាំងផ្នែកកាយសម្ព័ន្ធអេរ៉ូប៊ិក និងអាទិស្ទិក នៅលើវិញ្ញាសាសរុបចំនួន ១៣។
ជាមួយគ្នានេះ លោក ថោង ខុន ដែលជាប្រធានសហព័ន្ធបានចំណាយថវិកាផ្ទាល់ខ្លួនជាង ១ ម៉ឺនដុល្លារបន្ថែម ទៅលើកញ្ចប់ថវិការបស់ក្រសួងអប់រំ យុវជន និងកីឡា ចំនួន ៩ ពាន់ដុល្លារ ដើម្បីរៀបចំព្រឹត្តិការណ៍នេះ ព្រោះលោក ណយ ផាណា បានបង្ហើបថា បើប្រើតែកញ្ចប់ថវិការបស់រដ្ឋ មិនអាចស្របទៅទៅនឹងតម្រូវការនៃការចំណាយនោះទេ ខណៈការប្រកួតនេះ គឺផ្តោតខ្លាំងទៅលើការពង្រឹងគុណភាពថ្នាក់ថ្នាលសម្រាប់ត្រៀមឆ្ពោះទៅកាន់ការប្រកួតស៊ីហ្គេម ឆ្នាំ ២០២៣ ដែលប្រទេស កម្ពុជា ត្រូវធ្វើជាម្ចាស់ផ្ទះ។
លោក ណយ ផាណា បានបញ្ជាក់ថា៖ «យើងត្រូវដាក់ឲ្យក្រុមយុវជនរបស់យើង ប្រកួតប្រជែងគ្នាដោយភាពជាក់លាក់ និងស្របទៅតាមស្តង់ដាអន្តរជាតិ គឺយើងត្រូវតែពង្រឹងជំនាញឲ្យបានច្បាស់លាស់ ដើម្បីយើងឈានទៅទទួលបានពន្លឺនៃលទ្ធផលក្នុងការប្រកួតកីឡាស៊ីហ្គេមនៅឆ្នាំ ២០២៣ ហេតុនេះហើយទើបយើងធ្វើការបំប៉នវគ្គបច្ចេកទេសនេះ ដើម្បីឲ្យចៅក្រម និងគណៈកម្មការជំនាញរបស់យើង ធ្វើការងារដោយមានតម្លាភាព»៕
