.jpg)
យុវជនស៊ីរីម្នាក់ដើរឆ្លងកាត់គំនរបាក់បែក នៅក្នុងអគាររងការខូចខាត ពីការវាយប្រហារផ្លូវអាកាសរបស់របបសុីរី។ AFP
ប្រទេសស៊ីរី៖ ក្រុមឃ្លាំមើលសិទ្ធិមនុស្សបានថ្លែងកាលពីថ្ងៃអាទិត្យថា ការប៉ះទង្គិចគ្នារយៈពេល ២ ថ្ងៃ រវាងកងកម្លាំងរបបស៊ីរី និងក្រុមកងកម្លាំងប្រដាប់អាវុធ នៅក្នុងទីតាំងឈរជើងសំខាន់ចុងក្រោយនៅប្រទេស ស៊ីរី បានបណ្តាលឲ្យមនុស្សរបស់ភាគីទាំង ២ ជិត ៧០ នាក់ស្លាប់ ដោយបានបំពានកិច្ចព្រមព្រៀងបទឈប់បាញ់រយៈពេល ១ ខែ។
ប្រមុខឃ្លាំមើលសិទ្ធិមនុស្សស៊ីរីលោក រ៉ាមី អាប់ឌុល រ៉ាហ៍ម៉ាន់ បានថ្លែងថា សមរភូមិប្រយុទ្ធនៅក្នុងខេត្តអ៊ីដលីបភាគពាយព្យ គឺជា «អំពើហិង្សាខ្លាំងក្លាបំផុត» នៅទីនោះចាប់តាំងពីកិច្ចព្រមព្រៀងបទឈប់បាញ់បានសម្របសម្រួលដោយប្រទេស រុស្ស៊ី ចូលជាធរមានកាលពីចុងខែសីហា។
ក្រុមពលរដ្ឋដែលរងផលប៉ះពាល់នៅក្នុងភូមិជាច្រើន បានរត់គេចខ្លួនទៅភាគខាងជើង ដើម្បីភៀសខ្លួនចេញពីការវាយប្រហារគ្នានៅទីនោះ ដោយបានបន្ថែមថា មនុស្សរាប់សែននាក់ ដែលបានរត់ភៀសខ្លួនចេញពីភាគខាងត្បូង ដែលញាំញីដោយអំពើហិង្សានៅក្នុងខេត្តមួយនេះ ចាប់តាំងពីមានការប្រយុទ្ធគ្នាកាន់តែខ្លាំងឡើងកាលពីដើមឆ្នាំ ២០១៩។
លោក ហាហ្វីស បាននិយាយថា៖ «ខ្ញុំមិនចង់ឃើញកូនៗរបស់ខ្ញុំ បានជាប់នៅខាងក្រោមកម្ទេចបាក់បែកនោះទេ» ម្នាក់នៅក្នុងចំណោមអ្នកដែលបានចាកចេញពីផ្ទះរបស់គាត់ ដែលបានភៀសខ្លួនចេញពីតំបន់ងាយផ្ទុះហិង្សា ជាមួយប្រពន្ធរបស់លោក និងកូន ៣ នាក់ទៀត កាលពី ២ ថ្ងៃមុន។
ក្រុមស្ត្រីស៊ីរី រត់ភៀសខ្លួនពីការប្រយុទ្ធគ្នារៀបចំធ្វើម្ហូបសម្រាប់ទទួលទាន។ AFP
អ្នកឆ្លើយឆ្លងព័ត៌មាន AFP ម្នាក់បាននិយាយថា កាលពីព្រឹកថ្ងៃអាទិត្យ ផ្សែងខ្មៅក្រាស់ឃ្មឹកបានហុយទ្រលោមនៅលើតំបន់ម៉ាអារីត អាល់-នូម៉ែន ខណៈយន្តហោះចម្បាំងជាច្រើនគ្រឿង បានវាយសន្ធាប់ទៅលើក្រុមជីហាដ និងក្រុមសម្ព័ន្ធមិត្តឧទ្ទាមនៅក្នុងទីតាំងឈរជើងមួយចំនួន ដែលពួកគេបានដណ្តើមកាន់កាប់មកវិញកាលពីពេលថ្មីៗនេះ ពីកងកម្លាំងរបបស៊ីរីនោះ។
ក្រុមឃ្លាំមើលសិទ្ធិមនុស្សមានមូលដ្ឋាននៅអង់គ្លេសកាលពីថ្ងៃអាទិត្យ បានដាក់ចំនួនអ្នកស្លាប់ពីការវាយប្រហារមានយុទ្ធជន ៦៩ នាក់ ចាប់តាំងពីសមរភូមិបានបើកការប្រយុទ្ធកាលពីប៉ុន្មានថ្ងៃកន្លងទៅ។
កងកម្លាំងរបបស៊ីរីយ៉ាងតិច ៣៦ នាក់បានស្លាប់ នៅក្នុងការប្រយុទ្ធគ្នាជាមួយក្រុមជីហាដ។
ក្រុមឃ្លាំមើលសិទ្ធិមនុស្សបានថ្លែងថា ការវាយប្រហារមួយដឹកនាំដោយអតីតក្រុមអាល់កៃដានៅស៊ីរី ទៅលើទីតាំងរបស់កងកម្លាំងរបបស៊ីរីមួយចំនួន បានបង្កឲ្យមានការប្រយុទ្ធគ្នាយ៉ាងខ្លាំងក្លាជាលើកដំបូងនៅទីនោះ។
ក្រុមឃ្លាំមើលសិទ្ធិមនុស្សស៊ីរីបានថ្លែងថា នៅពេលយប់យោធារបបស៊ីរីដែលគាំទ្រដោយយន្តហោះចម្បាំងរុស្ស៊ីជាច្រើនគ្រឿង បានបើកការវាយបកដណ្តើមយកទឹកដីមកវិញ ដែលខ្លួនបានបាត់បង់នៅក្នុងសមរភូមិប្រយុទ្ធជាមួយក្រុមជីហាដនោះ៕ AFP/SK
