.jpg)
លោក Catry (ឆ្វេង) លោក វង្ស ខាន់ពៅ និងលោក អ៊ុំ វណ្ណៈ ក្នុងសន្និសីទ។ រូប ណន
ភ្នំពេញៈ សហព័ន្ធខ្មែរកីឡាទោចក្រយាននឹងក្រុមហ៊ុនទឹកបរិសុទ្ធវីតាល់ ដែលជាដៃគូឧបត្ថម្ភធំថ្មីបានប្រកាសជាផ្លូវការរួចហើយ ចំពោះការបន្តរៀបចំឲ្យមានការប្រកួតប្រណាំងកង់ភ្នំ រដូវកាលថ្មី ឆ្នាំ ២០១៩ ឬហៅថា Cambodia MTB Series 2019 ខណៈការប្រកួតរដូវកាលនេះ វាមានការបង្កប់អត្តន័យមួយថ្មី កាន់តែទាក់ទាញជាងការប្រកួតមុនៗ។
ក្នុងសន្និសីទកាសែតនៅទីស្នាក់ការ NOCC កាលពីថ្ងៃអង្គារលោកឧកញ៉ា វង្ស ខាន់ពៅ អគ្គលេខាធិការសហព័ន្ធខ្មែរកីឡាទោចក្រយានបានថ្លែងថាការប្រណាំងកង់ភ្នំ ឆ្នាំ ២០១៩ នេះមានការប្រកួត ៥ ជុំដូចឆ្នាំមុនដែរ គឺជុំទី ១ នឹងត្រូវធ្វើនៅទីលានព្រែកលៀបនាថ្ងៃទី ៥ ខែឧសភា ជុំទី ២ ធ្វើនៅកែប នាថ្ងៃទី ១៦ ខែមិថុនាជុំទី ៣ ធ្វើនៅខេត្តកំពង់ស្ពឺនាថ្ងៃទី ២១ ខែកក្កដា ជុំទី ៤ នឹងធ្វើនៅភ្នំប្រសិទិ៍្ធនាថ្ងៃទី ៣ ខែវិច្ឆិកាហើយជុំទី ៥ ផ្តាច់ព្រ័ត្រនឹងត្រូវធ្វើនៅលើគិរីវង់ដដែល។
យ៉ាងណាក៏ដោយក្រៅពីការប្រកួតប្រជែងរកជើងខ្លាំងប្រចាំឆ្នាំ ២០១៩ និងដើម្បីបំផុសដល់ក្រុមយុវជន និងមហាជនឲ្យចូលរួមការប្រណាំងកង់ភ្នំឲ្យបានកាន់តែច្រើននោះលោក វង្ស ខាន់ពៅ បានបន្ថែមថា៖ «ខ្ញុំមានការរំពឹងទុកថា ការប្រណាំងកង់ភ្នំនៅឆ្នាំនេះនឹងមានអ្នកចូលរួមកាន់តែច្រើន ពិសេសក្មេងៗជំនាន់ក្រោយដែលពួកគេមានការចាប់អារម្មណ៍ខ្លាំងជាមួយការប្រណាំងកង់ និងសុទ្ធតែមានកង់ផ្ទាល់ខ្លួន»។
លោកបានថ្លែងបន្ថែមពីអត្ថន័យសំខាន់នៃការប្រកួតនេះថា៖ «ជាមួយគ្នានេះការប្រណាំងកង់ភ្នំនៅឆ្នាំនេះវានឹងក្លាយជាវេទិកាប្រជែងគ្នាយ៉ាងសំខាន់របស់អត្តពលិកនៃក្រុមជម្រើសជាតិដើម្បីរកអ្នកមានសមត្ថភាពល្អ ២ នាក់សម្រាប់ដាក់ឲ្យចូលរួមលើការប្រកួតប្រភេទកង់ភ្នំនោះនៅស៊ីហ្គេម ប្រទេសហ្វីលីពីន ចុងឆ្នាំ ២០១៩ នេះ ប៉ុន្តែបន្ថែមទៅលើការប្រកួតនេះ យើងក៏នឹងត្រូវធ្វើតេស្តបន្ថែមទៅលើពួកគេផងដែរ ដើម្បីឲ្យប្រាកដថាយើងជ្រើសរើសបានអ្នកមានសមត្ថភាពពិតប្រាកដទៅប្រកួតតំណាងឲ្យប្រទេសជាតិ»។
នៅក្នុងការប្រកួតតាមជុំនីមួយៗដែលមានស្ថានភាពទីលាន និងផ្លូវប្រកួតខុសគ្នានោះគឺមានការកំណត់ការប្រកួតតាមកម្រិតដូចកាលពីឆ្នាំកន្លងមកដែរ រួមមានក្រុមជំនាញខ្លាំងបំផុត (A1) ក្រុមជំនាញខ្លាំងមានពីអាយុ ៣០ ឡើង(A2) ក្រុមជំនាញមធ្យមពីអាយុ ១៥ ដល់ ២៩ ឆ្នាំ (B1) ក្រុមជំនាញមធ្យមមានអាយុ ៣០ ឆ្នាំឡើង (B2) ព្រមទាំងការប្រកួតកម្រិតអ្នកគ្មានជំនាញផ្នែកយុវជនអាយុពី ១៤ ទៅ ១៧ ឆ្នាំ (C1) ក្រុមអាយុពី ១៨ ដល់ ២៩ ឆ្នាំ (C2) ក្រុមអាយុ ៣០ ដល់ ៣៩ ឆ្នាំ (C3) ក្រុម Masters អាយុ ៤០ ឡើងការប្រកួតផ្នែកនារីបើកទូលាយរួមទាំងការប្រកួតផ្នែកកុមារអាយុ ៩ ទៅ ១១ ឆ្នាំ (K1) និងអាយុ ១២ ដល់ ១៣ ឆ្នាំ (K2)។
ចំពោះលក្ខខណ្ឌអ្នកចង់ចូលរួមត្រូវបានលោក Pierre Yves Catry អគ្គលេខាធិការរងសហព័ន្ធខ្មែរកីឡាទោចក្រយានបញ្ជាក់ថាត្រូវតែមានកង់ផ្ទាល់ខ្លួនជាចាំបាច់ ព្រោះការចុះឈ្មោះចូលរួមមិនថ្លៃទេ គឺសម្រាប់ជុំទី ១ ដល់ជុំទី ៤ ការចុះឈ្មោះយក ៤ ដុល្លារសម្រាប់សិស្សសាលាមានអាយុក្រោម ១៩ ឆ្នាំ និង ៧ ដុល្លារសម្រាប់មនុស្សធំ ឯជនបរទេសយក ១០ ដុល្លារ។ រីឯជុំទី ៥ ផ្តាច់ព្រ័ត្រគឺសិស្សសាលាយក ៥ ដុល្លារមនុស្សធំយក ១០ ដុល្លារ និងជនបរទេសយក ១៥ ដុល្លារ។
ទោះយ៉ាងណានៅក្នុងការប្រកួតតាមជុំនីមួយៗសុទ្ធតែមានផ្តល់ប្រាក់រង្វាន់ជូនដល់ម្ចាស់ជយលាភីតាមវិញ្ញាសានីមួយៗចំណែកការប្រកួតជុំទី ១ នៅទីលានព្រែកលៀបនាថ្ងៃទី ៥ ខែឧសភាខាងមុខនេះលោក Pierre Yves Catry បានប្រកាសថានឹងមិនយកថ្លៃចុះឈ្មោះចូលរួមប្រកួតចំពោះក្រុមយុវជន និងសិស្សសាលាមកពីតាមខេត្តនោះទេ ប៉ុន្តែអ្នកចូលរួមទាំងអស់ត្រូវចុះឈ្មោះឲ្យបានមុខថ្ងៃពុធ ទី ១ ខែឧសភា។
ចំណែកលោក អ៊ុំ វណ្ណៈ តំណាងឲ្យក្រុមហ៊ុនទឹកបរិសុទ្ធវីតាល់ដែលជាអ្នកឧបត្ថម្ភធំក្នុងព្រឹត្តិការណ៍នេះបាននិយាយថា៖ «ការឧបត្ថម្ភធំក្នុងព្រឹត្តិការណ៍នេះគឺយើងចង់ចូលរួមលើកកម្ពស់វិស័យកីឡានៅកម្ពុជា ជាពិសេសកីឡាកង់ភ្នំនេះដោយជួយបំផុស និងផ្សព្វផ្សាយកីឡានេះឲ្យកាន់តែមានភាពទូលំទូលាយ និងចូលរួមលើកទឹកចិត្តដល់ក្រុមប្រណាំងអាជីពតាមរយៈការបង្កើតឲ្យមានព្រឹត្តិការណ៍នេះ ដើម្បីឲ្យពួកគេបានប្រកួតប្រជែងគ្នា ពង្រឹងបន្ថែមនូវជំនាញ និងសមត្ថភាពរបស់ពួកគេឲ្យកាន់តែប្រសើរថែមទៀត»៕
