ក្រុងប៉ារីស៖ កីឡាករបាល់ទាត់អាជីព និងក្លិបនៅលីកកំពូលទាំង ២ របស់ប្រទេស បារាំង បានឈានដល់កិច្ចព្រមព្រៀងមិនផ្លូវការមួយ ដើម្បីធ្វើការកាត់ប្រាក់ខែជាបណ្ដោះអាសន្នក្នុងអំឡុងវិបត្តិវីរុសកូរ៉ូណា។ នេះបើតាមការឲ្យដឹងពីសំណាក់សមាគមរបស់កីឡាករជាតិ (UNFP)។
ក្រោយពីមានការស្រុះស្រួលគ្នានេះ ប្រធាន UNFP លោក Philippe Piat បាននិយាយប្រាប់ទីភ្នាក់ងារព័ត៌មាន AFP កាលពីថ្ងៃអង្គារថា៖ «ពួកយើងបានចេញគោលការណ៍នេះ នៅព្រឹកនេះ។ គំនិតដែលបានផ្ដួចផ្ដើមឡើងនេះ គឺថាកីឡាករទាំងអស់ សុខចិត្តផ្ដល់ប្រាក់នឿយហត់របស់ពួកគេ ក្នុងខែមេសា ដើម្បីជួយក្លិបក្នុងពេលដែលគ្រប់គ្នាហៅថា ស្ថានភាពសុខភាព គឺសំខាន់ជាងអ្វីទាំងអស់»។
ក្រុមអ្នកតំណាងឲ្យក្លិប និងកីឡាករបានឈានដល់ការព្រមព្រៀងរួមមួយដែលនឹងធ្វើឲ្យប្រាកដថា កីឡាករទាំងអស់ទទួលយកការកាត់ប្រាក់ខែជាបណ្ដោះអាសន្ន ដែលពួកគេនឹងទទួលបានពីការថ្លៃផ្សាយផ្ទាល់របស់ទូរទស្សន៍។
ប្រព័ន្ធផ្សព្វផ្សាយផ្នែកកីឡា Canal+ និង beIN ត្រូវបានអនុញ្ញាតឲ្យពន្យារពេលសម្រាប់ការបង់ប្រាក់ ដែលជាប្រភពចំណូលដ៏ធំរបស់ក្លិបជាច្រើន ក្រោយរដូវកាលដែលនៅសល់ ត្រូវបានផ្អាក ដោយឥតមានពេលកំណត់កាលពីខែមុន។
ក្រោយលេចចេញនូវកិច្ចព្រមព្រៀងនៃការកាត់បន្ថយប្រាក់បៀវត្សរ៍នេះ ត្រូវបានគេប៉ាន់ប្រមាណពីចំនួនថា នឹងថយចុះច្រើន ចាប់ពី ២០ ភាគរយឡើងទៅ ដោយអ្នកដែលមានចំណូលខ្ពស់បំផុត ពោលគឺរកបាន ១០០ ០០០ អឺរ៉ូ (ជាង ១០០ ០០០ ដុល្លារ) ក្នុង ១ ខែ នឹងត្រូវប្រឈមជាមួយនឹងការកាត់ដល់ទៅ ៥០ ភាគរយ តែសម្រាប់កីឡាករដែលមានប្រាក់ចំណូលមិនដល់ ១០ ០០០ អឺរ៉ូ (ជាង ១០ ០០០ ដុល្លារ) នឹងមិនមានផលប៉ះពាល់ពីសេចក្ដីសម្រេចរួមនេះឡើយ។
យោងតាមច្បាប់ការងាររបស់ប្រទេស បារាំង កិច្ចសន្យានេះ មិនអាចមានប្រសិទ្ធភាពផ្នែកច្បាប់នោះឡើយ បើទោះបីជា លោកប្រធាន UNFP កំពុងរំពឹងថា មនុស្សភាគច្រើននឹងមិនធ្វើការជំទាស់ចំពោះការស្រុះស្រួលគ្នា ដែលកើតចេញពីឆន្ទៈរបស់កីឡាករ និងក្លិបនេះក៏ដោយ។
លោកប្រធាន Piat និយាយថា៖ «យើងបានផ្ដល់យោបល់ឲ្យពួកគេព្រមទទួលយកសំណើនេះ ព្រោះវាគឺជារឿងចាំបាច់ក្នុងការសង្គ្រោះការងាររបស់ខ្លួន។ បើគ្មានការកាត់ប្រាក់បណ្ដោះអាសន្ននេះទេ អាជីពរបស់ពួកគេនឹងមានបញ្ហា»។
ស្របពេលមានបញ្ហាលើការពន្យារពេលប្រកួតនេះ ក្លិបនៅក្របខ័ណ្ឌទី ១ របស់បារាំង មាន Lyon និង Marseille ជាដើម សុទ្ធតែបានអនុវត្តរួចរាល់នូវគោលការណ៍របស់រដ្ឋាភិបាល ដើម្បីអាចសន្សំប្រាក់ខ្លះ ដែលចំណាត់ការនោះ គឺក្លិបចំណាយតែ ៧០ ភាគរយ ខណៈរដ្ឋចេញ ៣០ ភាគរយ៕ AFP/VN