.jpg)
សកម្មភាពប្រកួតអុករបស់ ឈាវ បូរ៉ា កន្លងមកហើយការប្រកួតជ្រើសរើសជើងឯកជាតិលើកទី ១ នេះក៏មានវត្តមានរបស់គេដែរ។
ភ្នំពេញៈ សហព័ន្ធកីឡាអុកចត្រង្គកម្ពុជានឹងរៀបចំការប្រកួតជើងឯកថ្នាក់ជាតិ ប្រចាំឆ្នាំ ២០១៩ ក្រោមកញ្ចប់ថវិការបស់ក្រសួងអប់រំ យុវជន និងកីឡាជាលើកដំបូងដែលនឹងធ្វើនៅទីស្នាក់ការរបស់គណៈកម្មាធិការជាតិ អូឡាំពិកកម្ពុជា (NOCC) នៅថ្ងៃព្រហស្បតិ៍នេះរហូតដល់សុក្រ ប៉ុន្តែការប្រកួតនេះមានអ្នកចុះឈ្មោះចូលរួមត្រឹម ៤៨ នាក់ទេ ខណៈជើងខ្លាំងៗលំដាប់ជួរមុខមួយចំនួនដែលមានឈ្មោះល្បីល្បាញមិនបានមកចូលរួមច្រើនដូចការប្រកួតកាលពីឆ្នាំមុនៗទេ។
លោក គុជ គឹមឡុង ប្រធានសហព័ន្ធកីឡាអុកចត្រង្គកម្ពុជាបានថ្លែងថា៖ «នេះជាលើកទី១ ដែលសហព័ន្ធទទួលបានការអនុញ្ញាតពីក្រសួងអប់រំ យុវជន និងកីឡា ដើម្បីបានរៀបចំការប្រកួតកីឡាអុកចត្រង្គជ្រើសរើសជើងឯកជាតិ ប្រចាំឆ្នាំ ២០១៩ នេះ ចំណែកការប្រកួតនានាកន្លងមកដូចជាវគ្គជម្រុះអុកចត្រង្គមហាសង្ក្រាន្តពានរង្វាន់សម្តេចអគ្គមហាសេនាបតីតេជោ ហ៊ុន សែន គឺធ្វើឡើងក្នុងក្របខ័ណ្ឌផ្សេងមិនមែនជាការប្រកួតជ្រើសរើសជើងឯកជាតិនោះទេ»។
លោកបានបន្ថែមថាបន្ទាប់ពីសហព័ន្ធកីឡាអុកចត្រង្គកម្ពុជាបានប្រឹងប្រែងដោយខ្លួនឯងក្នុងការកសាងរចនាសម្ព័ន្ធបានល្អ រឹងមាំ និងបង្កើតឲ្យមានការប្រកួតនានាមួយរយៈដោយទទួលបានលទ្ធផលល្អនោះ ទើបធ្វើឲ្យក្រសួងអប់រំ យុវជន និងកីឡា ទទួលស្គាល់ និងអនុញ្ញាតឲ្យមានការប្រកួតជ្រើសរើសជើងឯកជាតិនៅឆ្នាំ ២០១៩ នេះ។
ចំណែកលោក គួច ចន្ថារិទ្ធ ហៅ ត្រេន មន្ត្រីបច្ចេកទេស និងជាគណៈកម្មការដឹកនាំការប្រកួតនៃសហព័ន្ធកីឡាអុកចត្រង្គកម្ពុជាបានប្រាប់ភ្នំពេញ ប៉ុស្តិ៍ ថា៖ «ការប្រកួតកីឡាអុកចត្រង្គជ្រើសរើសជើងឯកជាតិជាលើកទី ១ ប្រចាំឆ្នាំ ២០១៩ នេះមានកីឡាករមកដាក់ពាក្យសុំប្រកួតចំនួន ៤៨ នាក់ប៉ុណ្ណោះ គឺតិចជាងចំនួនអ្នកធ្លាប់បានចូលរួមក្នុងការប្រកួតក្រៅក្របខ័ណ្ឌ ក្រសួងអប់រំ យុវជន និងកីឡាដែលយើងបានរៀបចំកន្លងមក»។
លោកបន្ថែមថា៖ «មានកីឡាករមកពីគ្រប់ខេត្តរាជធានីទាំង ២៥ និងចំនួន ១៤ ក្លិប ប៉ុន្តែចំនួននេះ វាតិចជាងព្រឹត្តិការណ៍ប្រកួតមុនៗ ដោយសារជើងខ្លាំងៗមួយចំនួនមិនចូលរួម តែនេះជាសិទ្ធិបុគ្គលរបស់គេម្នាក់ៗ ព្រោះពួកគាត់អាចគិតថា ប្រាក់រង្វាន់របស់ក្រសួងក្នុងការប្រកួតនេះមានចំនួនតិច ឬក៏គេរវល់ខ្លាំង ទើបមិនបានមក ចំណែកសហព័ន្ធមិនមែនជាអ្នកកំណត់ចំនួនប្រាក់រង្វាន់ នោះឡើយ»។
ទោះជាយ៉ាងណាលោក គួច ចន្ថារិទ្ធ បានបង្ហើបថានៅក្នុងចំណោមអ្នកដាក់ពាក្យចូលរួមចំនួន ៤៨ នាក់នោះក៏មានជើងខ្លាំងមួយចំនួនផងដែរ មានដូចជា ឈាវ បូរ៉ា អតីតអគ្គលេខាធិការសហព័ន្ធ និងធ្លាប់ឈ្នះតំណែងស្តេចអុកមហាសង្ក្រាន្ត ២ ជំនាន់លោក ឆយ វីរ៉ា អតីតធ្លាប់ឈ្នះតំណែងពានរង្វាន់សម្តេចហ៊ុនសែន ឆ្នាំ ២០១០ លោក សេរី សម្បត្តិ លោក ប៊ិន គាសេង លោក ឃឹម ឌីណា លោក ប៊ូ វណ្ណម៉ូនីកា លោក រស់ រិទ្ធាយ៉ា និងលោក ទេស សុរាវី ជាដើម ដែលសុទ្ធតែធ្លាប់ល្បីល្បាញក្នុងពិភពកីឡាអុកចត្រង្គកម្ពុជា។
លោក ឃាង ទាវ អនុប្រធានសហព័ន្ធបានឲ្យដឹងថា៖ «យើងប្រកួតត្រឹម ២ ថ្ងៃទេ ចំណែកប្រាក់រង្វាន់អ្នកឈ្នះយើងនៅមិនទាន់ដឹងច្បាស់ទេ ប៉ុន្តែអាចមានចំនួនដូចទៅនឹងប្រភេទកីឡាក្នុងសហព័ន្ធផ្សេងៗដែរ»។ ចំណែកលោក ឡុង ឌី ដែលទទួលតំណែងថ្មីជាអគ្គលេខាធិការពីលោក ឈាវ បូរ៉ា ដែលលាឈប់នោះមិនអាចសុំអត្ថាធិប្បាយបានទេ ដោយលោកថាជាប់បេសកកម្មនៅខេត្ត។
ទោះបីជាយ៉ាងណាប្រភពមួយចំនួនសុំមិនបញ្ចេញឈ្មោះនិយាយថា មូលហេតុដែលកីឡាករដាក់ពាក្យប្រកួតមានចំនួនតិច អាចមកពីប្រាក់រង្វាន់របស់ក្រសួងអប់រំមានចំនួនតិចគឺអ្នកឈ្នះជយលាភីមិនអាចលើសពី ៤០ ម៉ឺននោះទេ ដែលប្រៀបធៀបទៅនឹងការលេងភ្នាល់នៅតាមរោងកាហ្វេជាលក្ខណៈឯកជនមានទំហំទឹកប្រាក់រាប់ពាន់ដុល្លារឯណោះ៕
