ក្រុង Incheon៖ ជម្រើសជាតិកូរ៉េខាងត្បូងមិនបានដឹងថា ការប្រកួតជម្រុះ World Cup ដ៏អស្ចារ្យរបស់ពួកគេនៅទីក្រុងព្យុងយ៉ាង ប្រទេស កូរ៉េខាងជើង នឹងត្រូវលេងនៅកីឡដ្ឋានគ្មានអ្នកទស្សនានោះទេ ដែលតារាបាល់ទាត់ Son Heung-min ប្រចាំក្លិប Tottenham បានពិពណ៌នាថា «មានលក្ខណៈកាចសាហាវបំផុត» ហើយមន្ត្រីម្នាក់បានប្រដូចការប្រកួតនេះទៅនឹងការធ្វើសង្គ្រាម។
ការប្រកួតជាមួយក្រុមកូរ៉េខាងជើងនេះ បានបញ្ចប់ក្នុងលទ្ធផល ០-០ ពីថ្ងៃអង្គារដោយប្រធានសហព័ន្ធបាល់ទាត់ពិភពលោក FIFA លោក Gianni Infantino សឹងតែត្រូវបានហាមមិនឲ្យចូលមើលការប្រកួតនេះ។
នេះជាការប្រកួតជាលើកដំបូងមិនធ្លាប់មានរវាងក្រុមបាល់ទាត់បុរសដែលរៀបចំឡើងដោយកូរ៉េខាងជើង និងជាប្រវត្តិសាស្ត្ររវាងប្រទេសទាំង ២ នេះ ប៉ុន្តែការប្រកួតនេះត្រូវបានធ្វើដោយគ្មានការផ្សាយផ្ទាល់ និងគ្មានអ្នកសារព័ត៌មានបរទេសចូលរួមនោះទេ។
រហូតមកដល់នាទីចុងក្រោយនេះ ក្រុមកូរ៉េខាងត្បូងនៅតែមិនដឹងពីមូលហេតុពីការគ្មានពលរដ្ឋកូរ៉េខាងជើងចូលទស្សនាការប្រកួតនេះ។
លោក Choi Young-il អនុប្រធានសមាគមបាល់ទាត់កូរ៉េបាននិយាយនៅពេលក្រុមកូរ៉េខាងត្បូងបានត្រឡប់ទៅដល់ព្រលានយន្តហោះក្រុង Incheon ពីព្រឹកថ្ងៃព្រហស្បតិ៍ថា៖ «យើងរំពឹងថា នឹងមានមនុស្សចំនួន ៥០ ០០០ នាក់ចូលទស្សនានៅពេលទ្វារបានបើកចំហ ប៉ុន្តែពួកគេមិនបានមកទេ»។
អនុប្រធានរូបនេះបានបន្ថែមថា៖ «ច្រកទ្វារមិនដែលបើកចំហទេដែលធ្វើឲ្យខ្ញុំពិតជាភ្ញាក់ផ្អើលមែនទែន ក៏ដូចជាកីឡាករ និងគ្រូបង្វឹកដទៃទៀតដែរ»។
លោក Choi បាននិយាយថា គាត់បានសួរមន្ត្រីកូរ៉េខាងជើង ពីការអវត្តមានរបស់អ្នកគាំទ្រក្នុងស្រុកនេះ ហើយពួកគេបានឆ្លើយថា៖ «ប្រហែលជាពួកគេមិនចង់មើលការប្រកួតនេះទេ»។
កីឡាករ Son បាននិយាយថា៖ «ការប្រកួតនេះ គឺមានលក្ខណៈសាហាវបំផុតក្នុងកម្រិតដែលខ្ញុំគិតថា ពួកគេគ្រាន់តែប្រើបច្ចេកទេសដោយសុវត្ថិភាព គឺមិនចាំបាច់បង្ករបួសដល់កីឡាករជាគូប្រជែងនោះឡើយ»។
ចំណែកលោក Choi បាននិយាយថា គាត់មិនដែលឃើញការប្រកួតដ៏សាហាវបែបនេះនៅលើទីលានប្រកួតពីមុនមកទេ គឺថា «វាមានលក្ខណៈដូចការធ្វើសង្គ្រាមអ៊ីចឹង»។
ចំណែកទីភ្នាក់ងារព័ត៌មានមជ្ឈិមកូរ៉េខាងជើងបានចេញរបាយការណ៍តែ ២ ឃ្លា ពាក់ព័ន្ធនឹងការប្រកួតនេះថា៖ «ការប្រកួតដ៏ស្វិតស្វាញនេះបានបញ្ចប់ក្នុងលទ្ធផលស្មើគ្នា»។
កាសែត Joongang Daily របស់កូរ៉េខាងត្បូងបានចេញផ្សាយកាលពីថ្ងៃព្រហស្បតិ៍ថា៖ «យើងគ្រាន់តែសូមអរគុណកូរ៉េខាងជើង ដែលបានជួយបញ្ជូនក្រុមកីឡាកររបស់យើងត្រឡប់មកផ្ទះវិញ ដោយសុវត្ថិភាព»៕ AFP/SN