ភ្នំពេញៈ ក្រុមម្ចាស់ជើងឯករង ២ សម័យកាល Khmer United- A បានលត់ក្រុម ATK រហូតដល់ ២៤-០ ដើម្បីស្តារស្ថានភាពនៃការប្រកួតរបស់ខ្លួនឲ្យមានភាពប្រសើរឡើងវិញ បើទោះបីជាឱកាសប្រជែងយកពានពាក់កណ្តាលអាជីព Keller Williams Cambodia League 2019 ហាក់នៅមានភាគរយតិចចំពោះពួកគេក៏ដោយ។
ការទទួលបានលទ្ធផលចាញ់ ១ និងស្មើ ១ សម្រាប់ការប្រកួតកាលពីពេលថ្មីៗនេះ វាហាក់បានបញ្ចប់មហិច្ឆតារបស់ Khmer- United A ក្នុងការប្រមាញ់ពានមួយនេះឲ្យបានជាលើកដំបូងបាត់ទៅហើយ ព្រោះក្រុមកំពុងមានពិន្ទុនាំមុខ ពិសេស ISI Group- Unites និង Avatar FC នៅតែបង្ហាញពីភាពរឹងមាំក្នុងការពង្រឹងទីតាំងលេខ ១ និងលេខ ២ របស់ពួកគេ។
គិតត្រឹមការប្រកួតនៅសប្តាហ៍ទី ១០ នេះក្រុម ISI នៅតែអាចយកឈ្នះក្រុមបាសាក់ ២-០ ដើម្បីបន្តឈរនៅកំពូលតារាងដោយមាន ២៨ ពិន្ទុ ខណៈ Avatar ក៏បានឈ្នះក្រុម Sniper FC ៨-២ ដើម្បីបន្តឈរលេខ ២ ផងដែរ ដោយមាន ២៥ ពិន្ទុគឺលើស Khmer- United A ដែលទើបឡើងមកឈរនៅលេខ ៣ ជាថ្មីដោយមានត្រឹម ២៣ ពិន្ទុ ប៉ុន្តែការឡើងមកកាន់តំបន់កំពូលតារាងទាំង ៤ នេះ ក៏ដោយសារតែជំនួបរវាងក្រុមមាន ២២ ពិន្ទុ Reil Phnom Penh និងក្រុមមាន ២១ ពិន្ទុ Bayon- Wanderers ត្រូវបានលើកយកទៅធ្វើនៅថ្ងៃទី ៣០ ខែឧសភាផងដែរ។
យ៉ាងណាក៏ដោយគ្រូបង្វឹកកម្រិតលីកកំពូលលោក កែវ សារិន បានបង្ហាញពីភាពរីកចម្រើនរបស់ក្រុម Khmer United A ខណៈលោកបានសម្រេចដកកីឡាករបរទេស ២ នាក់ឲ្យឈរជើង ហើយដាក់កីឡាករខ្មែរឲ្យលេងភាគច្រើននោះ។ លោកប្រាប់ថា៖ «ការឈ្នះ ២៤-០ នេះអាចមកពីក្រុមគេខ្សោយដែរ ប៉ុន្តែអ្វីដែលគួរឲ្យចាប់អារម្មណ៍នោះគឺការប្រកួតនេះ ខ្ញុំបានរៀបចំទម្រង់លេងថ្មី»។
គ្រូបង្វឹករូបនេះបានបន្ថែមថា៖ «ការទទួលបានលទ្ធផលមិនសូវល្អកន្លងមក ដោយសារតែយើងមានភាពលម្អៀងខ្លាំងទៅលើការលេងរបស់កីឡាករបរទេសដោយពួកគេចូលចិត្តលេងជាលក្ខណៈបុគ្គល ធ្វើឲ្យការលេងរបស់យើងមិនបានល្អ ប៉ុន្តែលើកនេះខ្ញុំដាក់កីឡាករបរទេសឲ្យលេងតែ ២ នាក់ទេ ក្រៅពីនោះដាក់ខ្មែរទាំងអស់ ហើយតាមការប្រកួតនេះឃើញថាកីឡាករខ្មែរមានការយកចិត្តទុកដាក់ក្នុងការលេង និងលេងជាក្រុមបានល្អគឺមានការប្រសើរជាងមុខច្រើន»។
នៅពេលសួរពីឱកាសក្នុងការប្រជែងយកពានធំលោក កែវ សារិន បានឆ្លើយតបថា៖ «បាល់ទាត់ វាតែងតែមានការប្រែប្រួល ហើយក្រុមមានពិន្ទុលើសយើង ក៏អាចនឹងជួបការចាញ់ផងដែរ អ៊ីចឹងអ្វីដែលសំខាន់ យើងត្រូវពង្រឹងការលេងរបស់យើងឲ្យបានល្អ ព្រោះបើយើងអត់ឱកាសលើកពានធំក៏យើងត្រូវតែស្វែងរកការឈ្នះឲ្យបានជាបន្តបន្ទាប់ ដើម្បីបន្តឈរនៅ Top5 នឹងបានប្រកួតយកពានតូចផងដែរ»។
គួររំឭកថាក្រៅពីការប្រជែងយកពានធំ ដោយកំណត់យកក្រុមមានពិន្ទុខ្ពស់ ជាងគេក្រោយការប្រកួតវិលជុំ ១៦ លើកបានបញ្ចប់នោះគឺការប្រកួត Keller Williams Cambodia League 2019 ក៏មានការប្រកួតខ្វែងរវាងក្រុមបានលេខ ២ ដល់លេខ ៥ ដើម្បីប្រជែងពានតូច ឬ Cup ផងដែរ ហើយគិតត្រឹមការប្រកួត ១០ លើកនេះក្រុមបាសាក់ឈរនៅលេខ ៦ មាន ១៨ ពិន្ទុស្មើជាមួយក្រុម Mambo Phnom Penh ដែលបានយកឈ្នះក្រុម Khmer- United B ៣-១ ហើយក្រុម Khmer United U22 ក៏បានយកឈ្នះក្រុមទន្សោង ៥-១ មាន ១៦ ពិន្ទុដើម្បីបង្កើតឱកាសប្រជែងទៅឈរនៅ Top5 ផងដែរ៕