ភ្នំពេញ៖ ក្រុមបាល់ទាត់ជម្រើសជាតិកម្ពុជាអាយុក្រោម ១៩ ឆ្នាំ (U19) បានបំបែកនូវកំណត់ត្រាជាប្រវត្តិសាស្រ្ត គឺការបានឡើងទៅវគ្គ ១៦ ក្រុមចុងក្រោយ នៃពាន AFC U19 Championship 2020 ជាថ្មី បន្ទាប់ពីក្រុមយុវជនមួយនេះបានទន្ទឹងរង់ចាំអស់រយៈពេល ៤៥ ឆ្នាំ។
ការទទួលបានឱកាសឡើងទៅវគ្គ ១៦ ក្រុមចុងក្រោយ នៃពានរង្វាន់ជើងឯកយុវជនអាស៊ីអាយុក្រោម ១៩ ឆ្នាំជាថ្មីរបស់ក្រុម U19 កម្ពុជានេះ គឺបានកើតមានឡើង បន្ទាប់ពីការប្រកួតជម្រុះប្រចាំពូល A បានបញ្ចប់កាលពីយប់ថ្ងៃសៅរ៍ ហើយវាក៏ជាពេលដ៏សប្បាយរីករាយមិនធ្លាប់មានរបស់កម្ពុជា ផងដែរ នៅពេលក្រុមអ៊ីរ៉ាក់ និងក្រុមកូវែត សុទ្ធតែបានបញ្ចប់ក្នុងលទ្ធផលស្មើគ្នា ៣-៣ ជាមួយក្រុមប៉ាឡេស្ទីន និងក្រុមអូម៉ង់នោះ។
ជាមួយលទ្ធផលស្មើគ្នារវាងក្រុមកូវែត និងក្រុមប៉ាឡេស្ទីនរួមទាំងការស្មើគ្នា ៣-៣ របស់ក្រុមអ៊ីរ៉ាក់ និងអូម៉ង់ នេះ បានជួយឲ្យក្រុម U19 កម្ពុជា ឡើងទៅកាន់វគ្គ ១៦ ក្រុម ក្នុងនាមជាក្រុមលេខ ២ ល្អ ឈរនៅលេខរៀងទី ៥ ចុងក្រោយគេ ដ៏គួរឲ្យរំភើបបំផុត ខណៈក្រុមឡាវ វៀតណាម និងក្រុមយេម៉ែន ក៏បានឡើងទៅវគ្គបន្ត ក្នុងនាមជាក្រុមលេខ ២ ល្អ ជាមួយក្រុមម្ចាស់ផ្ទះអ៊ូសបេគីស្ថាន ផងដែរ។
ផ្ទុយពីនេះក្រុមចិន កូរ៉េខាងជើង ហ្ស៊កដានី លីបង់ និងកៀហ្ស៊ីស៊ីស្ថាន មិនបានជាប់ជាក្រុមលេខ ២ ល្អនោះទេ។ ចំណែកក្រុមលេខ ១ តាមពូលទាំង១១ ដែលត្រូវឡើងទៅវគ្គ ១៦ ក្រុមនោះ រួមមានក្រុមកាតា (ពូល B) តាហ្ស៊ីគីស្ថាន (ពូល C) អ៊ីរ៉ង់ (ពូល D) បារ៉ែន (ពូល E) អារ៉ាប៊ី សាអ៊ូឌីត (ពូល F) ម៉ាឡេស៊ី (ពូល G) អូស្ត្រាលី (ពូល H) កូរ៉េខាងត្បូង (ពូល I) ជប៉ុន (ពូល J) ឥណ្ឌូនេស៊ី (K) និងអ៊ីរ៉ាក់ ដែលទើបបញ្ចប់ចំណាត់ថ្នាក់លេខ ១ ពូល A ទាំងប្រផិតប្រផើយ។
គួររំឭកថា សម្រាប់ការប្រកួតជម្រុះប្រចាំពូល G នៃពានរង្វាន់ AFC U19 Championship qualification 2020 នៅពហុកីឡដ្ឋានជាតិ ដែលបានចាប់ផ្តើមពីថ្ងៃទី ២ ដល់ថ្ងៃទី ១០ ខែវិច្ឆិកា កន្លងមកនេះ ក្រុមម្ចាស់ផ្ទះកម្ពុជាបានបើកឆាកដោយចាញ់ក្រុមម៉ាឡេស៊ី ៥-៤ មុនពេលយកឈ្នះក្រុមកោះម៉ារីណាខាងជើង ៩-០ ឈ្នះថៃ ២-១ និងឈ្នះក្រុមប្រ៊ុយណេ ៣-០ ដើម្បីទទួលបានលេខ ២ ប្រចាំពូលនេះ។
យ៉ាងណាមិញ សម្រាប់ការទទួលបានឱកាសឡើងទៅវគ្គ ១៦ ក្រុមនៃពានរង្វាន់ AFC U19 Championship 2020 នេះ វាបានក្លាយជាកំណត់ត្រាលើកទី ៤ សម្រាប់ក្រុម U19 កម្ពុជា ព្រោះកម្ពុជាបានឡើងដល់វគ្គនេះ ជាលើកដំបូងនៅឆ្នាំ ១៩៦៣ ដោយកាលនោះកម្ពុជា ដែលឈរនៅពូល A បានចាញ់ក្រុមថៃ ២-០ ឈ្នះក្រុមម្ចាស់ផ្ទះម៉ាឡេស៊ី ១-០ ឈ្នះហ្វីលីពីន ៦-២ និងចាញ់ក្រុមភូមា (មីយ៉ាន់ម៉ា) ៤-០។
ចំណែកលើកទី ២ នៅក្នុងឆ្នាំ ១៩៧២ ហើយការប្រកួត ដែលធ្វើនៅប្រទេស ថៃ នោះ កម្ពុជាដែលឈរនៅពូល C បានចាញ់ក្រុមភូមា ៥-០ ស្មើក្រុមតៃវ៉ាន់ ០-០ និងចាញ់ក្រុមឥណ្ឌូនេស៊ី ៣-០ ខណៈលើកទី ៣ ក្នុងឆ្នាំ ១៩៧៤ នៅប្រទេស ថៃ ដែរ ដោយកាលនោះ កម្ពុជា ដែលឈរក្នុងពូល C គឺបានចាញ់ម៉ាឡេស៊ី ២-១ ឈ្នះក្រុមនេប៉ាល់ ៦-២ និងចាញ់ក្រុមកូរ៉េខាងត្បូង ២-០។
ចំពោះការបានឡើងដល់វគ្គ ១៦ ក្រុម ជាលើកទី ៤ នេះ ក្រុម U19 កម្ពុជា ត្រូវបានចាត់ចូលនៅក្នុងផត ៣ (Pot) ជាមួយនឹងក្រុមម៉ាឡេស៊ី អ៊ិរ៉ាក់ វៀតណាម ខណៈក្រុមម្ចាស់ផ្ទះ អូបេគីស្ថាន ត្រូវចាត់ចូលនៅផត ១ ជាមួយក្រុមអារ៉ាប៊ី សាអ៊ូឌីត កូរ៉េខាងត្បូង និងក្រុមកាតា ហើយផត ២ មានជប៉ុន តាហ្ស៊ីគីស្ថាន អូស្រ្តាលី ឥណ្ឌូនេស៊ី និងផត៤ មានក្រុមអ៊ីរ៉ង់ យេម៉ែន បារ៉ែន ឡាវ ហើយតាមលក្ខខណ្ឌ ការចាប់ឆ្នោតក្នុងវគ្គ ១៦ ក្រុមនេះ គឺក្រុមឈរនៅផតជាមួយគ្នា មិនជួបគ្នានោះ មានន័យថា ក្រុមទាំង ៤ ឈរនៅផតតែមួយ នឹងត្រូវចាប់ឆ្នោតឲ្យឈរនៅពូលចំនួន ៤ ដាច់ពីគ្នា៕