.jpg)
លទ្ធផងនៃការចាប់ឆ្នោតរបស់ពូលទាំង ៨ ដែលកម្ពុជាស្ថិតក្នុងពូលមរណៈ។ សហការី
ភ្នំពេញក្រុមបាល់ទាត់ជម្រើសជាតិកម្ពុជា ត្រូវបានគេមើលឃើញថា អាចនឹងមានការពិបាកខ្លាំង ក្នុងការស្វែងរកការឈ្នះ សម្រាប់ការប្រកួតជម្រុះជុំទី២ ពានរង្វាន់ FIFA World Cup Qatar 2022 & AFC Asian Cup 2023 នៅប្រទេស កាតា ខណៈក្រុមដ៏កម្សត់មួយនេះ បានចាប់ឆ្នោតឈរនៅក្នុងពូល C ដែលជាពូលមរណៈ ព្រោះត្រូវប៉ះសុទ្ធតែក្រុមខ្លាំង ដែលមានសមត្ថភាព និងឈរនៅចំណាត់ថ្នាក់ពិភពលោកខ្ពស់ជាងខ្លួន នោះ។
តាមរយៈការចាប់ឆ្នោតបែងចែកពូល ដែលត្រូវធ្វើឡើង នៅទីស្នាក់ការសហព័ន្ធកីឡាបាល់ទាត់អាស៊ី (AFC) ស្ថិតនៅក្រុងកូឡាឡាំពួរ ប្រទេសម៉ាឡេស៊ី កាលពីរសៀលម៉ោង ៤:៣០ ថ្ងៃពុធនេះ ក្រុមកម្ពុជា ដែលស្ថិតក្នុង Pot ទី៥ ត្រូវបានចាប់ឆ្នោតប៉ះក្រុមហុងកុង មកពី Pot ទី៤ ក្រុមបារ៉ែន មកពី Pot ទី៣ ក្រុមអ៊ីរ៉ាក់ មកពី Pot ទី២ និងក្រុមអ៊ីរ៉ង់ មកពី Pot ទី១។
តាមលទ្ធផលការចាប់ឆ្នោតនេះ ត្រូវបានគេមើលឃើញថា ក្រុមជម្រើសជាតិកម្ពុជា អាចនឹងក្លាយជាក្រុម ដែលមានការពិបាកខ្លាំងបំផុត នៅរាល់ការប្រកួតមួយលើកៗរបស់ខ្លួន ព្រោះក្រុមទាំង ៤ នេះ សុទ្ធតែមានសមត្ថភាពខ្ពស់ជាងខ្លួន ពិសេសក្រុមអ៊ីរ៉ង និងអ៊ីរ៉ាក់ ដែលកំពុងឈរនៅលេខ ២០ និងលេខ ៧៧ នៃចំណាត់ថ្នាក់ពិភពលោក ខណៈក្រុមប៉ារ៉ែន ឈរនៅលេខ ១១០ និងក្រុមហុងកុង ឈរនៅលេខ ១៤១ គឺល្អជាងក្រុមកម្ពុជា ដែលឈរនៅលេខ ១៦៩។
យ៉ាងណាក៏ដោយ ការលេងជាមួយក្រុមខ្លាំងៗ វានឹងផ្តល់ផលប្រយោជន៍ឲ្យក្រុមកម្ពុជា ផងដែរ គឺបទពិសោធ និងបច្ចេកទេសថ្មីៗ ក្នុងការយកមកអភិវឌ្ឍខ្លួនឲ្យកាន់តែប្រសើរ ឡើង សម្រាប់ត្រៀមឆ្ពោះទៅកាន់ការប្រកួតស៊ីហ្គេម ឆ្នាំ ២០២៣ នៅកម្ពុជា ខណៈការប្រកួតជម្រុះ ពានរង្វាន់ FIFA World Cup Qatar 2022 នេះត្រូវធ្វើ នៅចុងឆ្នាំ ២០១៩ និងដើមឆ្នាំ២០២០។
សម្រាប់ការប្រកួតជើងទី១ ក្រុមកម្ពុជា នឹងត្រូវស្វាគមន៍ក្រុមហុងកុង នៅថ្ងៃទី ៥ ខែ កញ្ញា មុនជួបក្រុមប៉ារ៉ែន នៅថ្ងៃទី ១០ ខែ កញ្ញា ហើយនៅថ្ងៃទី ១០ ខែ តុលា កម្ពុជា ត្រូវទៅជួបក្រុមអ៊ីរ៉ង់ រួចទើបវិលមកជួបក្រុមអ៊ីរ៉ាក់ នៅលើទឹកដីខ្លួនឯងវិញ នៅថ្ងៃទី ១៥ ខែ តុលា ដដែលនោះ។ ចំណែកការប្រកួតជើងទី២ កម្ពុជា ត្រូវទៅជួបក្រុមហុងកុង នៅថ្ងៃទី ១៩ ខែ វិច្ឆិកា ឆ្នាំ ២០១៩ រួចបន្តទៅជួបក្រុមបារ៉ែន នៅថ្ងៃទី ២៦ ខែ មីនា ឆ្នាំ ២០២០ និងស្វាគមន៍ក្រុមអ៊ីរ៉ង់ នៅថ្ងៃទី ៣១ ខែដដែលនេះ ហើយចុងក្រោយ ត្រូវប្រកួតជាមួយក្រុមអ៊ីរ៉ាក់ នៅថ្ងៃទី៤ ខែ មិថុនា ឆ្នាំ ២០២០។
គួរបញ្ជាក់ថា សម្រាប់ការប្រកួតជុំទី២ ពានរង្វាន់ FIFA World Cup Qatar 2022 & AFC Asian Cup 2023 គឺមានការបែងចែកការប្រកួតជា ៨ ពូល ហើយតាមការចាប់ឆ្នោតនោះ ក្រុមថៃ វៀតណាម ម៉ាឡេស៊ី ឥណ្ឌូនេស៊ី បានឈរនៅពូល G ជាមួយនឹងក្រុមអារ៉ាប់រួម ខណៈមីយ៉ាន់ម៉ា ឈរនៅពូល F ជាមួយជប៉ុន ខណៈការប្រកួតនេះគេយកក្រុមលេខ ១ តាមពូលនីមួយៗ និងក្រុមលេខ ២ ល្អ ចំនួន ៤ ក្រុម សរុប ១២ ក្រុម សម្រាប់ឡើងទៅលេងនៅវគ្គជម្រុះជុំទី៣៕
