ភ្នំពេញៈ អ្នកចាត់ការទូទៅក្រុម លោក Keisuke Honda និងគ្រូបង្វឹកជនជាតិអាហ្សង់ទីន លោក Filex Dalmas បានចាប់ផ្តើមបើកការបង្វឹកដល់ក្រុមជម្រើសជាតិកម្ពុជាកាលពីយប់ថ្ងៃចន្ទ ដើម្បីត្រៀមការប្រកួតជម្រុះជុំដំបូង FIFA World Cup Qatar 2022 & Asian Cup 2023 ជាមួយក្រុមជម្រើសជាតិប៉ាគីស្ថានដែលនឹងត្រូវធ្វើនៅពហុកីឡដ្ឋានជាតិថ្ងៃព្រហស្បតិ៍ខាងមុខនេះ។
ការចាប់ប្រមូលផ្តុំហ្វឹកហាត់ទាំងប្រថុចញ៉ុចនេះគឺបានធ្វើឡើង បន្ទាប់ពីសហព័ន្ធកីឡាបាល់ទាត់កម្ពុជា (FFC) បានបញ្ចេញបញ្ជីឈ្មោះក្រុមជម្រើសជាតិកម្ពុជាទាំង ២៥ នាក់បែបស្ងាត់ៗកាលពីយប់ថ្ងៃអាទិត្យ ប៉ុន្តែសម្រាប់ការហ្វឹកហាត់ថ្ងៃទី ១ នៅទីលាន AUPP កាលពីយប់ម៉ោង ៧ ថ្ងៃចន្ទម្សិលមិញនោះក្រុមជម្រើសជាតិឲ្យប្រព័ន្ធផ្សព្វផ្សាយចូលថតរូបភាព ឬសកម្មភាពហ្វឹកហាត់ត្រឹមរយៈពេល ១៥ នាទីប៉ុណ្ណោះ ប៉ុន្តែកំណត់មិនឲ្យសម្ភាស ឬសួរនាំទៅកាន់គ្រូបង្វឹក និងកីឡាករណាម្នាក់នោះឡើយ។
ការកំណត់មិនឲ្យប្រព័ន្ធផ្សព្វផ្សាយធ្វើការសម្ភាសនេះ វាធ្វើឲ្យអ្នកគាំទ្រមានភាពមន្ទិលកាន់តែខ្លាំង ចំពោះការប្រមូលផ្តុំក្រុមជម្រើសជាតិលើកនេះព្រោះការចេញបញ្ជីឈ្មោះយឺតខុសពីធម្មតា និងការប្រមូលផ្តុំត្រឹមរយៈពេល ៣ ថ្ងៃ លើកនេះវាបានបន្សល់ទុកនូវចម្ងល់ និងការរិះគន់មួយចំនួនពីអ្នកគាំទ្រខ្លះទៅហើយ ព្រោះអ្នកទាំងនោះមានការបារម្ភថា ការប្រមូលផ្តុំរយៈពេលខ្លីនេះ វាអាចនឹងធ្វើឲ្យការលេងរបស់ក្រុមកម្ពុជាមិនសូវបានល្អ ហើយអាចមានការលំបាកក្នុងការយកឈ្នះក្រុមប៉ាគីស្ថានដែលបានប្រមូលផ្តុំយូរជាងយើង និងថែមទាំងបានប្រកួតមិត្តភាពជាមួយក្រុម U23 បារ៉ែន ដើម្បីពង្រឹងគុណភាពលេងរបស់គេទៀតផង។
យ៉ាងណាក៏ដោយចំពោះបញ្ហាប្រមូលផ្តុំរយៈពេលខ្លីនេះលោក Filex Dalmas បាននិយាយនៅក្នុងពិធី «សំណោះសំណាលបាល់ទាត់» របស់ FFC កាលពីថ្ងៃពុធសប្តាហ៍មុនថា ដោយសារតែលោកមិនចង់ធ្វើឲ្យប៉ះពាល់ដល់កម្មវិធីប្រកួតលីកកំពូលកម្ពុជា និងគោរពថ្ងៃ FIFA-Day ដែលអាចកោះហៅកីឡាករមកប្រមូលផ្ដុំបាន ព្រោះ FIFA-Day គឺចំថ្ងៃទី ៣ ខែមិថុនា។
ទាក់ទងនឹងការប្រមូលផ្តុំរយៈពេលខ្លីនេះដែរលោក ឆាំង ពិសិដ្ឋ លេខាប្រតិបត្តិនៃគណៈកម្មាធិការប្រកួតបាល់ទាត់ជាតិកម្ពុជា (CNCC) បានលើកឡើងថាដោយសារគ្រូបង្វឹកនៅតាមក្លិបនៃលីកកំពូលកម្ពុជាមានសញ្ញាបត្រគ្រូបង្វឹកកម្រិត A-License ស្ទើរគ្រប់ក្លិប ដូច្នេះកីឡាករមិនចាំបាច់ត្រូវការពេលច្រើនក្នុងការប្រមូលផ្តុំឡើយ ព្រោះពួកគេត្រូវការបង្វឹកនូវបច្ចេកទេសតិចតួច និងបន្សុំាក្រុមពីគ្រូបង្វឹកក្រុមជម្រើសជាតិប៉ុណ្ណោះ។
ទោះបីជាយ៉ាងណាតាមបញ្ជីឈ្មោះក្រុមជម្រើសជាតិកម្ពុជាទាំង ២៥ នាក់លើកនេះគឺមានកីឡាករជើងចាស់សម្បូរបទពិសោធតែត្រឹម ១០ នាក់ប៉ុណ្ណោះរួមមាន គួច សុគម្ភៈ,សុះ ស៊ូហាណា របស់ក្លិបណាហ្គាវើល ធារី ចន្ថាប៊ីន របស់ក្លិប Terengganu ប្រាក់ មុន្នីឧត្តម, សឿយ វិសាល, សារ៉េត គ្រីយ៉ា ក្លិបព្រះខ័នរាជស្វាយរៀង កែវ សុខផេង, ឆេង ម៉េង ក្លិបវិសាខា អ្នកចាទី អ៊ុំ វិចិត្រ និង រ៉ឹង ប៊ុនហៀង របស់ក្លិបក្រសួងការពារជាតិ ប៉ុន្តែខ្សែប្រយុទ្ធឆ្នើម ចាន់ វឌ្ឍនាកា ដែលទើបចែកផ្លូវជាមួយក្លិប PKNS របស់ម៉ាឡេស៊ី និងកីឡាករជើងចាស់មួយចំនួនទៀតមិនមានឈ្មោះក្នុងបញ្ជីនេះទេ។
ចំណែកកីឡាករ ១៥ នាក់ផ្សេងទៀតសុទ្ធតែជាកីឡាករវ័យក្មេង រួមមាន កែន ច័ន្ទសុភ័ក្ត្រ, អ៊ុក សុវណ្ណ, ស៊ិន សុផាណាត, កែវ សុខសិលា របស់ក្លិបវិសាខា ឃៀង ម៉េងហួរ ក្លិបព្រះខ័នរាជស្វាយរៀង គួច ដានី ក្លិបណាហ្គាវើល អន ចាន់ប៉ូលីន, ម៉ៅ ពិសិដ្ឋ, យ៉ើ សាហ្វ៊ី, សឿត បារាំង និង សាវែង សំណាង ក្លិបភ្នំពេញក្រោន សាត រ៉ស៊ីប ក្លិបបឹងកេត សៀង ចន្ធា របស់សាលាកីឡាបាល់ទាត់ជាតិបាទី ឈង់ ប៊ុនណាត ក្លិបអង្គរថាយហ្គឺរ និងកីឡាករចំណូលថ្មី ដាយ នីម របស់ក្លិបគិរីវង់សុខសែនជ័យ៕