ភ្នំពេញៈ ក្រុមអ្នកលេងចំបាប់របស់សមាគមខេត្តកណ្តាល និងខេត្តព្រៃវែង បានទទួលការសរសើរពីក្រុមអ្នកជំនាញរបស់សហព័ន្ធកីឡាចំបាប់កម្ពុជាថា មានសមត្ថភាព និងបច្ចេកទេស កាន់តែរីកចម្រើន ហើយខេត្តទាំង ២ នេះ កឺជាប្រភពដ៏សំខាន់ ក្នុងការបណ្តុះបណ្តាលថ្នាក់ថ្នាលជំនាន់ក្រោយដែរ។
ការសរសើរ និងវាយតម្លៃពីការរីកចម្រើនរបស់ក្រុមចំបាប់នៅខេត្តព្រៃវែង និងខេត្តកណ្តាលនេះ ត្រូវបានធ្វើឡើង បន្ទាប់ពីក្រុមអ្នកជំនាញរបស់សហព័ន្ធកីឡាចំបាប់កម្ពុជា ដែលដឹកនាំដោយលោក ធិន វិចិត្រ បានចុះទៅបើកវគ្គបណ្តុះបណ្តាលបច្ចេកទេសពង្រឹងសមត្ថភាព ដល់សមាគមកីឡាចំបាប់របស់ខេត្តទាំង ២ កាលពីថ្ងៃសៅរ៍ និងថ្ងៃអាទិត្យ កន្លងមកនេះ។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា បានប្រាប់កាលពីថ្ងៃចន្ទថា វគ្គបណ្តុះបណ្តាលដល់សមាគមកីឡាចំបាប់របស់ខេត្តកណ្តាល និងខេត្តព្រៃវែងនេះ គឺត្រូវបានធ្វើរួមគ្នាតែម្តង នៅវិហារសួគ៌ ដោយមានអ្នកចូលរួម ៥០ នាក់ (ស្រី ១០ នាក់)។
លោកបានបញ្ជាក់ថា៖ «តាមរយៈការចុះទៅបើកវគ្គបណ្តុះបណ្តាលនេះ យើងមើលឃើញថា អ្នកលេងចំបាប់របស់ខេត្តទាំង ២ នេះ មានសមត្ថភាព និងបច្ចេកទេសរីកចម្រើនទាំងផ្នែកចំបាប់សម័យ និងបុរាណ ព្រោះសមាគមទាំង ២ នេះ មានកន្លែងហ្វឹកហាត់ និងមានគ្រូបង្វឹកជាប្រចាំ ហើយនៅថ្ងៃសៅរ៍ និងថ្ងៃអាទិត្យ សហព័ន្ធ តែងនាំយកក្រុមថ្នាល ទៅហ្វឹកហាត់ និងប្រកួតសមជាមួយពួកគាត់ ធ្វើឲ្យពួកគាត់ កាន់តែមានសមត្ថភាពរីកចម្រើន»។
លោកបានបន្ថែមថា៖ «តាមរយៈការសិក្សាទៅលើទ្រឹស្តី និងការធ្វើតេស្តផងនោះ យើងឃើញយុវជនវ័យក្មេងជាច្រើននាក់ មានទេពកោសល្យ អាចយកមកហ្វឹកហាត់ជាមួយក្រុមថ្នាលបាន ប៉ុន្តែសំខាន់យើងអត់មានលទ្ធភាពយកពួកគាត់មកបង្វឹក ក្រៅតែពីក្រុមថ្នាលទាំង ១៥ នាក់ ដែលក្រសួងអប់រំ យុវជន និងកីឡា អនុញ្ញាតឲ្យប្រមូលផ្តុំ នៅឆ្នាំនេះ រួមជាមួយកីឡាករ ១ នាក់ នៅខេត្តពោធិ៍សាត់ និងកីឡាការិនី ១ នាក់ នៅខេត្តកំពង់ចាម ដែលយើងនឹងយកមកបណ្តុះបណ្តាលជាមួយក្រុមថ្នាល ក្រោមការរ៉ាប់រងរបស់សហព័ន្ធផ្ទាល់»។
គួររំឭកថា វគ្គបណ្តុះបណ្តាលបច្ចេកទេសនេះ ត្រូវបានរៀបចំឡើង ដោយមានការគាំទ្រពី NOCC និងក្រសួងអប់រំ យុវជន និងកីឡា ក្រោមការឧបត្ថម្ភជាថវិកាទាំងស្រុងពីលោក Casey Barnett ជាអនុប្រធានសហព័ន្ធកីឡាចំបាប់កម្ពុជា ដើម្បីត្រៀមជ្រើសរើសអត្តពលិកមានសមត្ថភាពចូលរួមការប្រកួតកីឡាជាតិ លើកទី ២ ឆ្នាំ ២០១៨ នេះ៕