ភ្នំពេញៈ ប្រតិភូកីឡាជនពិការកម្ពុជា បានបញ្ចប់បេសកកម្មរបស់ខ្លួន ក្នុងការប្រកួតកីឡាអាស៊ី ប៉ារ៉ាហ្គេម ឆ្នាំ ២០១៨ (Asian Para Games) នៅឥណ្ឌូនេស៊ី ជាផ្លូវការហើយ ដោយមិនដណ្តើមបានមេដាយអ្វីទេ ហើយពួកគេបានមកដល់មាតុប្រទេសវិញ ក្រោមការស្វាគមន៍ពីសំណាក់លោក ស សុខា រដ្ឋលេខាធិការក្រសួងអប់រំ យុវជន និងកីឡា និងមន្ត្រីកីឡាមួយចំនួនទៀត នៅព្រលានយន្តហោះអន្តរជាតិ កាលពីល្ងាចថ្ងៃអាទិត្យ។
តាមរយៈការប្រកួតប្រជែង នៅលើប្រភេទកីឡាចំនួន ៦ របស់ខ្លួន រួមមានអត្តពលកម្ម ហែលទឹក បាល់បោះជិះរទេះនារី បាញ់ធ្នូ វាយកូនឃ្លីលើតុ និងកីឡាធែនពីនប៊ូលីង គឺអត្តពលិកទាំង ២៩ នាក់របស់កម្ពុជា ភាគច្រើនបានចាញ់នៅក្នុងវគ្គជម្រុះ ដែលធ្វើឲ្យពួកគេ ដណ្តើមមិនបានមេដាយឲ្យកម្ពុជាដូចកាលពីអតីតកាលនោះទេ។
គួររំឭកថា ការចូលរួមប្រកួតអាស៊ីប៉ារ៉ាហ្គេម លើកទី ១ (ពីមុនឈ្មោះថា FESPIC Game) កាលពីឆ្នាំ ១៩៩៩ នៅថៃ ក្រុមអត្តពលិកជនពិការកម្ពុជា បានឈ្នះមេដាយប្រាក់ ៣ និងសំរឹទ្ធ ២ ហើយការចូលរួមជាលើកទី ២ នៅប្រទេសកូរ៉េ កាលពីឆ្នាំ ២០០២ កម្ពុជា បានឈ្នះមេដាយមាស ៣ ប្រាក់ ២ និងសំរឹទ្ធ ១។
យ៉ាងណាក៏ដោយ លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា (NPCC) និងជានាយបេសកកម្មការប្រកួតកីឡាអាស៊ីប៉ារ៉ាហ្គេម លើកនេះ បានថ្លែងថា៖ «យើងពុំបានទទួលមេដាយទេ តែអ្វីដែលយើងបានមកវិញ គឺការបង្ហាញមោទនភាពជាតិខ្មែរ កិត្តិសព្ទកម្ពុជា ក្នុងតំបន់អាស៊ី ទង់ជាតិខ្មែរ សម្លេងខ្មែរ វប្បធម៌ខ្មែរ ត្រូវបានបង្ហាញ ប្រកបដោយការទទួលខុសត្រូវខ្ពស់របស់រាជរដ្ឋាភិបាល អត្តពលិក និងគ្រូបង្វឹក»។
លោកបានបន្ថែមថា៖ «ខ្ញុំជឿជាក់ថា បងប្អូនប្រាកដជាបន្តការគាំទ្រ មិនអាក់អន់ចិត្តឡើយ ហើយអត្តពលិក គ្រូបង្វឹក និងថ្នាក់ដឹកនាំ ប្តេជ្ញាបន្តប្រឹងប្រែង តាមទ្រឹស្តីជឿថា ខ្មែរនឹងធ្វើបាន។ សូមអរគុណបងប្អូនដែលផ្តល់ក្តី ស្រឡាញ់ និងបន្តការចូលរួមជួយដល់ជនពិការយើង ឲ្យក្លាយជាតំណាងជាតិដ៏ថ្លៃថ្នូរ និងសូមអភ័យទោសសម្តេចតេជោ ដែលតែងតែឧបត្ថម្ភគ្រប់បែបយ៉ាង និងផ្តល់ក្តីសង្ឃឹមជារៀងរហូតមក តែពេលនេះកូនចៅ មិនមានលទ្ធផល ១០០ ភាគរយនោះទេ»។
តាមតារាងចំណាត់មេដាយនៃការប្រកួតកីឡាអាស៊ីប៉ារ៉ាហ្គេម លើកនេះ ក្រុមអត្តពលិករបស់ចិន ឈរនៅលេខ ១ ដោយដណ្តើមបានមេដាយមាស ១៧២ ប្រាក់ ៨៨ សំរឹទ្ធ ៥៩ និងតាមពីក្រោយដោយកូរ៉េខាងត្បូង ដែលដណ្តើមបានមេដាយមាស ៥៣ ប្រាក់ ៤៥ សំរឹទ្ធ ៤៧ ប្រទេសអ៊ីរ៉ង់ បានមេដាយមាស ៥១ ប្រាក់ ៤២ សំរឹទ្ធ ៤៣ និងជប៉ុន ឈរនៅលេខ ៤ ដោយឈ្នះបានមេដាយមាស ៤៥ ប្រាក់ ៧០ និងសំរឹទ្ធ ៨៣។
ចំណែកម្ចាស់ផ្ទះឥណ្ឌូនេស៊ី នៅតែទទួលបានលទ្ធផលល្អដូចការប្រកួតកីឡាអាស៊ី ផងដែរ ដោយកីឡាករ កីឡាការិនីជនពិការរបស់ប្រទេសមួយនេះ ដណ្តើមបានមេដាយមាស ៣៧ ប្រាក់ ៤៧ និងសំរឹទ្ធ ៥១ ដើម្បីឈរនៅចំណាត់ថ្នាក់លេខ ៥ ក្នុងចំណោមប្រទេសទាំង ៣៣ ដែលដណ្តើមបានមេដាយ ក្នុងការប្រកួតកីឡាអាស៊ីប៉ារ៉ាហ្គេម លើកនេះ។
ជាមួយគ្នានេះ ប្រទេសក្នុងតំបន់អាស៊ាន មានថៃ ម៉ាឡេស៊ី ហ្វីលីពីន វៀតណាម សិង្ហបុរី ទីម័រខាងកើត និងឡាវ សុទ្ធតែដណ្តើមបានមេដាយមាស ខណៈមីយ៉ាន់ម៉ា បានត្រឹមឈ្នះមេដាយប្រាក់ ៤ និងសំរឹទ្ធ ២ ប៉ុន្តែកម្ពុជា បានក្លាយជាប្រទេស ១ ក្នុងចំណោមប្រទេសក្នុងទ្វីបអាស៊ីចំនួន ១១ ដែលមិនដណ្តើមបានមេដាយសោះពីការប្រកួតនេះ៕